ލަންޑަން، އިނގިރޭސިވިލާތް (އޮކްޓޯބަރު 22) - އިނގިރޭސި ޕާލިމެންޓު މެމްބަރު ޑޭވިޑް އެމެސް އަށް ވަޅިން ހަމަލާދީ އަވަހާރަކޮށްލުމުގެ ތުހުމަތުވާ 25 އަހަރުގެ މީހާގެ ޝަރީއަތް ފަށާނީ އަންނަ އަހަރު ކަމަށް ފަނޑިޔާރަކު ކަނޑައަޅައިފި އެވެ.
ލަންޑަންގެ އޯލްޑް ބެއިލީގައި ހުކުރު ދުވަހު ކުރިއަށް ދިޔަ އިދާރީ އަޑުއެހުމެއްގައި ފަނޑިޔާރު ނައިޖެލް ސްވީނީ ޝަރީއަތް ފަށާނެ ތާރީހެއްގެ ގޮތުގައި ކަނޑައެޅީ މާޗް 7، 2022 އެވެ.
މިދިޔަ ހުކުރު ދުވަހު ލަންޑަންގެ އިރުން އޮންނަ ލެއި-އޮން-ސީ ހިސާބުގައި ދާއިރާގެ ރައްޔިތުންނާ ބައްދަލުކުރަމުން ދަނިކޮށް އެމެސް އަށް ވަޅިން ހަމަލާދީ އަވަހާރަކޮށްލުމުގެ ތުހުމަތު ކުރެވެނީ އުތުރު ލަންޑަނަށް ނިސްބަތްވާ އަލީ ހަރްބީ އަލީ އަށެވެ.
ޕްރޮސެކިއުޓަރުން ބުނެފައި ވަނީ އެމެސް އަށް ދިން ހަމަލާއަކީ "ދީނީ އަދި ފިކުރީ ސަބަބުތަކާ ހެދި ދިން ޓެރަރިޒަމާ ގުޅުން އޮތް" ހަމަލާއެއް ކަމަށެވެ.
މަރުގެ ދައުވާގެ އިތުރުން މޭ 1، 2019 އާއި މި އަހަރުގެ ސެޕްޓެމްބަރު މަހާ ދެމެދު ޓެރަރިޒަމްގެ އަމަލުތައް ހިންގަން ތައްޔާރުވިކަމުގެ ދައުވާ ވެސް އަލީއާ ދެކޮޅަށް އުފުލާފައި ވެ އެވެ.
ހުކުރު ދުވަހުގެ އިދާރީ އަޑުއެހުމުގައި އޭނާ ބައިވެރިވީ ބެލްމާޝް ހައި ސެކިއުރިޓީ ޖަލުން ވީޑިއޯ މެދުވެރިކޮށެވެ. އަޑުއެހުމުގައި އޭނާ ވާހަކަ ދެއްކީ ހަމައެކަނި ނަމާއި އުފަން ދުވަހުގެ ތާރީހު ކިޔައިދިނުމަށެވެ.
ޝަރީއަތުގެ ކުރިން ނޮވެމްބަރު ފަސް ވަނަ ދުވަހު ބާއްވާ އިތުރު އަޑުއެހުމަކާ ހަމައަށް އޭނާ ބަންދުގައި ބެހެއްޓުމަށް ހުކުރު ދުވަހު ކޯޓުން ނިންމި އެވެ.
އުމުރުން 69 އަހަރުގެ އެމެސް އަކީ ގިނަ އަހަރުތަކެއް ވަންދެން އިނގިރޭސި ޕާލިމެންޓު މެމްބަރެއްގެ ގޮތުގައި ހުންނެވި ބޭފުޅެކެވެ. އޭނާ އަކީ ބޮޑު ވަޒީރު ބޮރިސް ޖޯންސަންގެ ކޮންޒަވޭޓިވް ޕާޓީ ތަމްސީލް ކުރި މެމްބަރެކެވެ.
މީގެ ކުރިން 2016 ވަނަ އަހަރު ވެސް އެމްޕީ އަކަށް މިފަދަ ހަމަލާއެއް ދީފައި ވެ އެވެ. އެ ފަހަރު ލޭބާ ޕާޓީގެ ޖޯ ކޮކްސް އަށް ހަމަލާ ދީ އަވަހާރަކޮށްލީ ކަނާއަތު ފިޔައިގެ ހަރުކަށި ފިކުރުގެ މީހެކެވެ.
އެމެސް އަވަހާރަކޮށްލުމާ އެކު ހޯމް ސެކެޓްރީ ޕްރިޓީ ޕަޓޭލް ވަނީ އިނގިރޭސިވިލާތުގެ 650 ޕާލިމެންޓު މެމްބަރުންގެ ސެކިއުރިޓީ ރިވިއު ކުރަން ފުލުހުންނަށް އަމުރު ކުރައްވާފަ އެވެ.
