އެމްއެމްޕީއާރްސީގެ ފަރާތުން 2014 ވަނަ އަހަރާއި 2015 ވަނަ އަހަރު ކުއްޔަށް ދިން 50 ފަޅު ރަށާއި ފަޅުތަކުގެ ތެރޭގައި ހިމެނޭ އ. މަތިވެރި ކައިރި އޮތް ފަޅު އެ ރަށުގެ އިހްތިސާސުގެ ތެރެއަށް ވެއްދުމަށް ރަށު ކައުންސިލްގެ ފަރާތުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އަރިހުގައި މިއަދު އެދެފި އެވެ.
އއ. އަތޮޅަށް ރައީސް ސޯލިހު މިހާރު ކުރައްވަމުންދާ ރަސްމީ ދަތުރުފުޅުގައި މަތިވެރިއަށް ވަޑައިގެންނެވުމުން އެރަށު ކައުންސިލުން އެދުނީ، މަތިވެރިއާ 100 އެއްހާ މީޓަރު ދުރުގައި އޮންނަ ފަޅު އެ ރަށުގެ އިހްތިސާސްގެ ތެރެއަށް އަލުން ވައްދައި، ފަޅުގެ ނަފާ ރަށު މީހުންނަށް ލިބޭނެ ގޮތް ހެދުން ކަމަށް ކައުންސިލްގެ ރައީސް އަހުމަދު އަސްލަމް ވިދާޅުވި އެވެ.
"އެއީ 2014 ވަނަ އަހަރު އެމްއެމްޕީއާރުސީގެ ދަށުން ދޫކޮށްފަ އޮތް ތަނެއް. އެތަން އަނބުރާ އަޅުގަނޑުމެންނަށް ލިބޭނެ ގޮތެއް ހައްދަވައިދެއްވަން އެދުނީ،" މި ނޫހާ ވާހަކަ ދައްކަވަމުން އަސްލަމް ވިދާޅުވި އެވެ.
އޭގެ އިތުރުން، ބިމުގެ ދަތިކަމެއް ހައްލެއް ހޯދުމަށް ބިން ހިއްކުމަށާއި ހެލްތު ޕޯސްޓުގެ ހިދުމަތް 24 ގަޑިއިރު ލިބޭނެ ގޮތް ހަދައިދިނުމަށާއި ފުޓްސަލް ދަނޑު ތަރައްގީ ކުރުމަށް ވެސް ރައީސްގެ އަރިހުން އެދުނު ކަމަށް ވެސް ކައުންސިލުން މައުލޫމާތު ދިނެވެ.
މަތިވެރިއަށް ކުރި ދަތުރުފުޅުގައި ރައީސް ސޯލިހު އެ ރަށު ރައްޔިތުންނާ ވެސް ބައްދަލުކުރައްވައި ރަށު މީހުންގެ ކަންބޮޑުވުންތައް ވެސް ރަައީސް އެއްސެވި އެވެ. އެ ބައްދަލުވުމުގައި މަތިވެރިއަށް ހަޔާ ސެކަންޑަރީ ތައުލީމު ތައާރަފްކުރަން ރައްޔިތުން ވަނީ ރައީސްގެ އަރިހުން އެދިފަ އެދިފަ އެވެ.
ރައީސް ސޯލިހު ރަށަށް ވަޑައިގަތުމުން އެރަށުން އެމަނިކުފާނަށް ހޫނު މަރުހަބާއެއް ވަނީ ކިޔައިފަ އެވެ. އަދި ރައީސަށް ހާއްސަކޮށް ލަވައެއް ވެސް އެރަށުގެ ރައްޔިތުން ވަނީ މިއަދު އިއްވައިފަ އެވެ.
ރައީސް ސޯލިހާއެކު އިކޮނޮމިކް މިނިސްޓަރު ފައްޔާޒް އިސްމާއިލާއި ޔޫތު މިނިސްޓަރު އަހުމަދު މަހުލޫފާއި އެޑިއުކޭޝަން މިނިސްޓަރު ޑރ. އައިޝަތު އަލީ އަދި ޕްލޭނިން މިނިސްޓަރު މުހައްމަދު އަސްލަމް ވަޑައިގެންނެވި އެވެ.
އަސްލަމް ވިދާޅުވި ގޮތުގައި ރައީސްއާއެކު މިނިސްޓަރުން ވެސް ވަނީ ރައްޔިތުންގެ ކަންބޮޑުވުންތައް އައްސަވައި، އެކަންކަމަށް ހައްލު ހޯއްދަވައިދެއްވަން މަސައްކަތްކުރައްވާނެކަމުގެ ފެހި ސިގްނަލް ދެއްވާފަ އެވެ. އަދި އަންނަ އަހަރުގެ ބަޖެޓުގައި ހިމަނައިގެން ރައްޔިތުންގެ ހުރި އެންމެ ބޮޑެތި ކަންބޮޑުވުންތަކަށް ހައްލެއް ހޯދައިދިނުމަށް މަސައްކަތް ކުރައްވާނެ ކަމަށް ރައީސް ވަނީ ވިދާޅުވެފަ އެވެ.
"ކުޑަ ވަގުތުކޮޅަކަށް ވިޔަސް، ރައްޔިތުން ތިބީ ރައީސްގެ ދަތުރަށް ވަރަށް ހިތްހަމަޖެހިގެން، އުފަލުން ފޮޅިފަ ތިބީ. މަތިވެރިއަކީ ބޮޑު ފަޅެއް އޮތުމުން ލާމަރުކަޒީ ގާނޫނު އެންމެ ރަނގަޅަށް ހިންގޭނެ އެއް ރަށް. ދެން ރައީސްގެ ފަރާތުން ވަރަށް ހެޔޮ އެދެވޭ ޖަވާބެއް ލިބުނު ހަމަ،" އަސްލަމް ވިދާޅުވި އެވެ.
