ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ލީޑާޝިޕުގެ ސަބަބުން ދިވެހިރާއްޖޭގައި ޑިމޮކްރަސީ ވަރުގަދަވަމުން އަންނަ ކަމަށް އެމެރިކާ ސަފީރު އެލައިނާ ޓެޕްލިޓްޒް ވިދާޅުވެއްޖެ އެވެ.
މިވަގުތު ރާއްޖެގައި ހުންނެވި ޓެޕްލިޓްޒް ވަޑައިގެން އުޅުއްވަނީ ދައުރު ހަމަވާތީ އޭނާގެ ވަދާއި ދަތުރުގަ އެވެ. ޓެޕްލިޓްޒް ވަނީ އިއްޔެ ރައީސް ސޯލިހާ އެމަނިކުފާނުގެ އޮފީހުގައި ބައްދަލު ކުރައްވައިފަ އެވެ.
ސަފީރު މިއަދު ސޯޝަލް މީޑިޔާގައި ކުރެއްވި ޓުވީޓެއްގައި ވިދާޅުވީ ރައީސް ސޯލިހުގެ ދައުރުގައި އެމެރިކާ އާއި ރާއްޖެއާ ދެމެދު އޮންނަ ގުޅުން ވަރުގަދަވެފައިވާ ކަމަށާއި އެކަމަށް އޭނާ ޝުކުރުވެރިވާ ކަމަށެވެ.
"އަޅުގަނޑުގެ ފުރަތަމަ ރާއްޖެ އައި ދަތުރުގައި ރައީސް ސޯލިހުގެ ހުވާ ކުރެއްވުމުގެ ރަސްމިއްޔާތަށް ދިޔައިން މިފަހަރު އެމަނިކުފާނާ މި ބައްދަލު ކުރީ އަޅުގަނޑުގެ އެންމެ ފަހު ދަތުރުގައި. ރައީސްގެ ލީޑާޝިޕްގެ ސަބަބުން ރާއްޖޭގެ ޑިމޮކްރަސީ ވަރުގަދަވެ، ތިމާވެއްޓަށް ވަމުންދާ ގެއްލުން ފާހަގަކޮށް، ސަރަހައްދުގެ ސަލާމަތީ ކަންކަން ވެސް އަންނަނީ ރަނގަޅުވަމުން،" އޭނާ ވިދާޅުވި އެވެ.
އިއްޔެ ރައީސް އޮފީހުގައި ބޭއްވި ބައްދަލުވުމުގައި ރާއްޖެ އާއި އެމެރިކާއާ ދެމެދު އޮތް ގުޅުން މިއަށްވުރެ ވެސް އިތުރަށް ބަދަހި ކުރުމަށް މަޝްވަރާ ކުރެއްވި ކަމަށް އެ އޮފީހުން ބުނެ އެވެ. އަދި އިންސާނީ ހައްގުތައް ރައްކާތެރިކުރުމަށާއި ކައުންޓާ ޓެރެރިޒަމްގެ ކަންކަން ކުރިއަށްގެންދިއުމުގައި އެމެރިކާއިން އެހީތެރިކަން ފޯރުކޮށްދޭތީ ރައީސް ވަނީ ސަފީރަށް ޝުކުރު އަދާކުރައްވައިފަ އެވެ.
"ކުރިއަށް އޮތް ދުވަސްތަކުގައި ވެސް އިތުރު ދާއިރާތަކުން ގުޅުން ގާއިމްވެގެންދާނެ ކަމަށް އުންމީދުކުރައްވާކަމަށާއި އެމެރިކާގެ ސަރުކާރުން ރާއްޖެއާއެކު ގުޅުން ގާއިމުކުރުމަށް އެހީތެރިކަމާއި އެއްބާރުލުން ދެއްވާނެކަމުގެ ޔަގީންކަން [ރައީސް ސޯލިހު، ސަފީރަށް] ވަނީ ދެއްވާފައި،" އެ ބައްދަލުވުމަށްފަހު ރައީސް އޮފީހުން ނެރުނު ބަޔާނެއްގައިވެ އެވެ.
