ކޮލެޖް އަދި ޔުނިވާސިޓީތަކުގައި ކިޔަވަމުންދާ ދަރިވަރުން ލިޔާ އިލްމީ ލިޔުންތަކާއި، ދިރާސާތައް ފޮރުވާފައި ބެހެއްޓުމުގެ ބަދަލުގައި، އެ ލިޔުންތައް އާންމުކޮށް، އެންމެންނަށް ފެންނަ ގޮތަށް ޝާއިއުކުރުމަށް ހަޔާ އެޑިއުކޭޝަން މިނިސްޓަރު އިބްރާހިމް ހަސަން އިލްތިމާސްކުރައްވައިފި އެވެ.
ދިވެހިރާއްޖޭގެ އިސްލާމިކް ޔުނިވާސިޓީ (އައިޔޫއެމް) ގެ ދަރިވަރުން ދަސްވެނިވުނު ޖަލްސާ ޝަރަފްވެރިކޮށްދެއްވަމުން ރޭ މިނިސްޓަރު އެންމެ ބޮޑަށް އަލިއަޅުވާލި އެއްކަމަކީ އިލްމު ފެތުރުމުގެ މުހިންމު ކަމުގެ މައްޗަށެވެ.
"ތިޔަ ބޭފުޅުންނަށް އެނގިވަޑައިގެންފައިވާ އިލްމެއް އެހެން މީހުންނަށް ފަހުމްވާ ގޮތަށް ލިޔެ، ޝާއިއުކުރުމަކީ ތައުލީމީ ތަހުޒީބީ މުޖްތަމައުތައް ބިނާ ކުރުމަށްޓަކައި އަޅުގަނޑުމެން ކޮންމެ މީހަކަށްވެސް ކުރެވިދާނެ ވަރަށް މުހިންމު ގައުމީ މަސައްކަތެއް" މިނިސްޓަރު ވިދާޅުވި އެވެ.
މީގެ އިތުރުން އިލްމީ މުޖުތަމައުއެއް ބިނާ ކުރުމަށްޓަކައި އިލްމާއި މެދު ހިޔާލު ބަދަލުކޮށް، އިލްމީ ބަހުސްތަކަށް ޖާގަދެވުމަކީވެސް މުހިންމު ކަމެއް ކަމަށް ވިދާޅުވި އެވެ. އަދި ތިމާއަށް އިނގިފައިވާ މިންވަރު އަނެއްކާއަށް އުގަންނައިދިނުމަށާއި، ލިބުނު އިލްމާއި އެއްގޮތަށް ހަޔާތް ބައްޓަން ކުރުމަށް މަސައްކަތް ކުރުމަށްވެސް މިނިސްޓަރު ނަސޭހަތްތެރިވި އެވެ.
ދަސްވެނިވުމާއި ހަމައަށް ވާސިލްވާއިރު، އެތައް އިލްމީ އަދި ދިރާސީ ލިޔުންތަކެއް ލިޔުނު ނަމަވެސް އެ މައުލޫމާތުތައް އާންމުކުރަނީ ނިސްބަތުން މަދު ދަރިވަރެކެވެ.
އޭގެ ބަދަލުގައި މިނިސްޓަރު އިލްތިމާސްކުރެއްވީ އެފަދަ އިލްމީ ލިޔުންތައް އެއްކުރުމަށްފަހު ފޮތެއްގެ ސިފައިގައި ޗާޕްކުރުމަށެވެ. ނުވަތަ އޮންލައިންކޮށް، އެ މައުލޫމާތުތައް އެހެން މީހުންނަށްވެސް ލިބޭނެ ގޮތަށް ވެބްސައިޓެއްގައި ޝާއިއުކުރުމަށެވެ.
