މި އަހަރުގެ ކުރީކޮޅު މިޔަންމާގައި ހިންގި އަސްކަރީ ބަގާވާތާ ދެކޮޅަށް އަޑު އުފުލުމުން ބަންދު ކުރި 5،600 އަށް ވުރެ ގިނަ ގައިދީން މިނިވަން ކުރަން ނިންމައިފި އެވެ.
އެއާއެކު ގައިދީންގެ އާއިލާތަކުން ވަނީ ޖަލުތައް ކައިރިއަށް އެއްވެފަ އެވެ. ފޮޓޯ އާއި ވީޑިއޯތަކުން ފެންނަނީ ގައިދީން ޖަލުން ނުކުމެ އާއިލާއާ ބައްދަލުކުރާ މަންޒަރެވެ.
ދައުލަތުގެ ޓީވީން ކުރި އިއުލާނެއްގައި ބުނީ ސަރުކާރުން ނިންމާފައި ވަނީ މުޒާހަރާ ކުރި މީހުންނަށް މައާފު ދިނުމަށް ކަމަށެވެ. ގިނަ ބަޔަކު މުޒާހަރާ ކުރީ ފެބްރުއަރީ އެއް ވަނަ ދުވަހު އިންތިހާބީ ލީޑަރު އަންގް ސަންގް ސޫ ކީ ހައްޔަރު ކުރުމަށް ފަހު ސިފައިން ވެރިކަމާ ހަވާލުވުމުންނެވެ.
ރިޕޯޓުތަކުން ބުނާ ގޮތުގައި ގައިދީން މިނިވަން ކުރަން ނިންމީ އެސޯސިއޭޝަން އޮފް ސައުތު އީސްޓް އޭޝިއަން ނޭޝަންސް (އޭޝިއާން) ގެ ޕްރެޝަރު ބޮޑުވުމުންނެވެ.
ޔަންގޯން ގައި ހުންނަ އިންސެއިން ޖަލުގެ ބޭރުގައި އާއިލާތައް ޖަމާވެފައި އޮތް އިރު، ގައިދީން ޖަލުން ނެރިގެން އާއިލާތަކާ ހަމައަށް ގެންދިޔެއީ ބަސްތަކެއްގަ އެވެ.
ދައުލަތުގެ ޓީވީން ބުނީ އެ ޖަލުން 1،316 ގައިދީން މިނިވަން ކުރި ކަމަށާއި 4،320 މީހުންނާ ދެކޮޅަށް އުފުލި ދައުވާ ސަސްޕެންޑުކޮށްފައިވާ ކަމަށެވެ.
އެސިސްޓެންސް އެސޯސިއޭޝަން ފޯ ޕޮލިޓިކަލް ޕްރިޒަނާޒް އިން ބުނާ ގޮތުގައި އަސްކަރީ ބަގާވާތަށް ފަހު މަދުވެގެން 9،043 މީހުން ހައްޔަރުކޮށްފައި ވެ އެވެ. މައާފު ދޭނެކަން އިއުލާނު ކުރިއިރު ބަންދުކޮށްފައި ތިބީ 7،355 މީހުންނެވެ.
ގިނަ ގައިދީންތަކެއް މިނިވަންކޮށްފައި ވާއިރު، ސޫ ކީ އަދިވެސް ހުންނެވީ ޖަލު ބަންދުގަ އެވެ. އެކަމަނާގެ ސަރުކާރު ވައްޓާލުމުން ބޭއްވި އެއްވުންތަކުގައި މަރުވި މީހުންގެ އަދަދު 1،000 އަށް ވުރެ މަތިވާނެ ކަމަށް ބެލެވެ އެވެ.
އަސްކަރީ ބަގާވާތަށް ފަހު މިޔަންމާ އޮންނަ ސަރަހައްދުގެ ގައުމުތައް ނިސްބަތްވާ އޭޝިއާން އިން އަންނަނީ ޕްރެޝަރު ކުރަމުންނެވެ. މިޔަންމާ އަލުން ޑިމޮކްރަސީގެ މަގަށް ގެންނަން އޭޝިއާން އިން އެ ގައުމަށް ހުށަހެޅީ ފަސް ނުކުތާ ހިމެނޭ މަގު ޗާޓެކެވެ. ނަމަވެސް އެއަށް އެ ގައުމުން އަމަލުކޮށްފައެއް ނުވެ އެވެ.
އެހެންވެ އޭޝިއާންގެ ކުރިއަށް އޮތް ސަމިޓަށް ދައުވަތު ދީފައި ވަނީ މިޔަންމާގެ ސިޔާސީ ނޫން މަންދޫބަކަށެވެ. ސަރުކާރުގެ ތެރެއިން މަންދޫބަކަށް ދައުވަތު ނުދިނީ ފިއްތުންތައް ކުރިމަތި ކުރުވުމަށެވެ.
ރައްދުގައި އަސްކަރީ ބަގާވާތުގެ ވެރިޔާ މިން އޯންގް ލެއިންގް ވިދާޅުވީ އެ ގައުމުން އަމަލު ކުރާނީ ފަސް މަރުހަލާއަކަށް ބަހާލައިގެން ހިންގާ އަމިއްލަ މަގު ޗާޓަކަށް ކަމަށެވެ.
