މިލާން (17 އޮކްޓޫބަރު) - އިޓާލިއަން ލީގުގައި ރޭ އެންމެ ފަހުގެ ޗެމްޕިއަން އިންޓަ މިލާން އަތުން ފަހަތުން އަރައި 3-1 އިން ލާޒިއޯ މޮޅުވެއްޖެ އެވެ.
މިއީ މި ސީޒަންގެ އިޓާލިއަން ލީގުގައި އިންޓަ ބަލިވި ފުރަތަމަ ފަހަރެވެ. ލީގުގައި ރޭ ހެލަސް ވެރޯންޔާ އަތުން 3-2 އިން މޮޅުވެ، އޭސީ މިލާން ވަނީ ތާވަލްގެ އެއް ވަނަ އަށް ޖެހިލައިފަ އެވެ.
މިލާން ތާވަލްގެ އެއް ވަނަ އަށް ޖެހިލީ 22 ޕޮއިންޓާ އެކު އެވެ. ދެ ވަނައިގައި 21 ޕޮއިންޓާ އެކު އޮތީ ނަޕޯލީ އެވެ. އިޓާލިއަން ލީގުގައި މިރޭ ޓޮރީނޯއާ ދެކޮޅަށް ކުޅޭ މެޗުން މޮޅުވެއްޖެ ނަމަ، ނަޕޯލީ ތާވަލްގެ އެއް ވަނަ އަށް އަލުން އެރޭނެ އެވެ.
ލާޒިއޯގެ ދަނޑުގައި ކުޅުނު މެޗުގެ ފުރަތަމަ ހާފުގެ ކުރީކޮޅު އިންޓަ އަށް ލިބުނު ޕެނަލްޓީއަކުން އެ ޓީމަށް ލީޑު ނަގައިދިނީ ކްރޮއޭޝިއާގެ މިޑްފީލްޑަރު އީވާން ޕެރިސިޗެވެ. އިންޓަ އަށް ޕެނަލްޓީއެއް ލިބުނީ އެ ޓީމުގެ ނިކޯލޯ ބަރޭލާ އަށް ލާޒިއޯގެ ކުޅުންތެރިއެއް ކުރި ފައުލަކާ ގުޅިގެނެވެ.
މެޗުގެ ދެ ވަނަ ހާފުގައި ލާޒިއޯ އަށް ލިބުނު ޕެނަލްޓީއަކުން އެ ޓީމަށް މެޗުގެ ނަތީޖާ ހަމަހަމަކޮށްދިނީ ޗީރޯ އިމޯބިލޭ އެެވެ. އަދި މެޗުގެ 81 ވަނަ މިނިޓުގައި ލާޒިއޯ އިން ލީޑު ނެގީ ފެލިޕޭ އެންޑަސަން ޖެހި ލަނޑުންނެވެ.
އެންޑަސަން ލަނޑު ޖެހިއިރު، އިންޓާގެ ފެޑްރީކޯ ޑިމާކޯ އޮތީ އަނިޔާވެގެން ދަނޑުމަތީގައި އޮށޯވެގެނެވެ. އެހެންވެ، ލާޒިއޯގެ ކުޅުންތެރިން ކުޅުން ހުއްޓާލުމުން އިންޓަ މިލާންގެ ކުޅުންތެރިން ވަނީ ހިތްހަމަނުޖެހުން ފާޅުކޮށްފަ އެވެ. ދެ ޓީމުގެ ކުޅުންތެރިންގެ މެދުގައި މައްސަލަ ހޫނުވެގެން ދިޔައިރު، ރެފްރީ ވަނީ ފަސް ރީނދޫ ކާޑު ދައްކައިފަ އެވެ.
މެޗުގެ އިތުރު ވަގުތުގައި، ލާޒިއޯގެ ތިން ވަނަ ލަނޑު ޖެހީ ސާބިއާގެ މިޑްފީލްޑަރު ސަރްގޭ މިލަންކޮވިޗް-ސަވިޗެވެ. މެޗުގެ އިތުރު ވަގުތުގައި ލާޒިއޯ ރާމޯސް މާރްޗީ އަށް ރަތްކާޑު ދެއްކުމާ ގުޅިގެން، އެ ޓީމު މެޗު ނިންމާލީ 10 ކުޅުންތެރިންނާ އެކު އެވެ.
މި މެޗުން މޮޅުވެ މައުރީޒިއޯ ސާރީގެ ކޯޗުކަމުގައި ކުޅޭ ލާޒިއޯ ވަނީ ތާވަލްގެ ފަސް ވަނަ އަށް ޖެހިލައިފަ އެވެ. އިންޓަ އޮތީ ތާވަލްގެ ތިން ވަނައިގަ އެވެ.
ފުރަތަމަ ހާފުގައި ވެރޯނާގެ ޖިއަންލޫކާ ކަޕްރާރީ އާއި އެންޓޮނިން ބަަރަކްގެ ގޯލުތަކުން އެ ޓީމު ދެ ގޯލުގެ ލީޑެއް ނެގި އެވެ. ފަހަތުން އަރައި މިލާން މޮޅުވިއިރު، ލަނޑުތައް ޖެހީ އޮލިވިއޭ ޖިރޫ އާއި ފްރޭންކް ކެސިއޭ އެވެ. މިލާންގެ ތިން ވަނަ ލަނޑަަކީ ވެރޯނާގެ ކޯރޭ ގަންޓާ އަތުން ބައިކޮޅަށް ވަތް ލަނޑެކެވެ. -- ބީބީސީ
