އދ. ދަނގެތީގައި އަނިޔާވެރިކޮށް މަރާލާފައި އޮއްވާ އިއްޔެ ފެނުނު އެ ރަށުގެ މަޝްހޫރު ވިޔަފާރިވެރިޔާ މަހުމޫދު އަބޫބަކުރުގެ މައްސަލައިގައި ފުލުހުންގެ ހިމާޔަތުގެ ދަށަށް ގެންދިޔަ ތިން މީހުން ވެސް އެހެން މައްސަލައަކާ ގުޅިގެން ހައްޔަރުކޮށްފި އެވެ.
ފުލުހުންގެ މީޑިއާ އޮފިޝަލް ވަނީ އެ ތިން މީހުން ވެސް ބަންދުގައި ތިބިކަން ކަށަވަރުކޮށްދީފަ އެވެ.
ނަމަވެސް އެމީހުން ބަންދުގައި ތިބީ ސީދާ ކޮން މައްސަލައަކާ ގުޅިގެން ކަމެއް އަދި ފުލުހުން ހާމަކޮށްފައެއް ނުވެ އެވެ.
"އެ ތިން މީހުން ވެސް މިވަގުތު ތިބީ ފުލުހުން ތަހުގީގުކުރަމުންދާ އިތުރު އެހެން މައްސަލައަކާ ގުޅިގެން ހައްޔަރުގައި. ދަނގެތީގައި ހިނގައިދިޔަ މަރުގެ މައްސަލައާ ގުޅިގެން އަދި އެއްވެސް މީހަކު ހައްޔަރުކޮށްފައެއް ނުވޭ،" ފުލުހުންގެ މީޑިއާ އޮފިޝަލް ވިދާޅުވި އެވެ.
ފުލުހުންގެ ހިމާޔަތުގެ ދަށުގައި ތިބި އެ ތިން މީހުން ވެސް މިއަދުގެ ފަތިހުގެ ވަގުތެއްގައި ވަނީ ދަނގެތިން އދ. މަހިބަދޫ އަށް ބަދަލުކޮށްފަ އެވެ. އެ ތިން މީހުންގެ ތެރޭގައި ހިމެނެނީ އަންހެނަކާއި ދެ ފިރިހެނުންނެވެ.
"އަދަދު"އަށް ކަށަވަރުވެފައިވާ ގޮތުގައި އޭގެ ތެރޭގައި ހިމެނޭ ދެ ފިރިހެނުންނަކީ އަލީ ޖަމްޝާދު އާއި ޝާރިހު އަލީ އެވެ.
އެ ދެ މީހުންނަކީ އއ. ތޮއްޑޫގެ އެއް ގެޔަކަށް ނިސްބަތްވާ ދެ ބެއިންގެ ދެ ދަރި މީހުންނެވެ.
އަދި އެ ދެ މީހުންގެ މަސްތަވާތަކެއްޗާއި ވައްކަމުގެ މައްސަލަތަކުގައި ކުށުގެ ރެކޯޑު ވެސް އޮވެ އެވެ.
ދަނގެތިން ވާހަކަ ދެއްކި ބައެއް މީހުން ބުނާ ގޮތުގައި އެ ތިން މީހުންނަކީ ވެސް ކުށުގެ ވެށީގައި އިސްކޮށް އުޅޭ މީހުންނެވެ.
އެ ތިން މީހުންނަށް ފުލުހުންގެ ހިމާޔަތް ދޭން ޖެހުނީ، ދަނގެތީގައި މަހުމޫދުގެ މަރާއި ގުޅިގެން އިތުރު ހަމަނުޖެހުމެއް ހިނގިޔަނުދިނުމަށްޓަކައި ދަނގެތީ ކައުންސިލްގެ އެދުމުގެ މަތިންކަމަށް ދަނގެތީ ކައުންސިލުން ވަނީ މީގެ ކުރިން ބުނެފަ އެވެ.
އަނިޔާވެރި ގަތުލެއް
މަހުމޫދު މަރާލުމަށް ފަހު ދަނގެތީގެ ފަޅުގެއްގެ ވަޅަކަށް އެއްލާލާފައި އޮއްވާ ފެނުނީ އޭނާ ގެއްލިގެން ހޯދަމުން ދަނިކޮށް އިއްޔެގެ މެނދުރުފަހުގެ ވަގުތެއްގަ އެވެ.
ހަށިގަނޑު ފުރަތަމަ ފެނުނު މީހުން ބުނާ ގޮތުގައި, މަހުމޫދުގެ ފަޔާއި ބޮލުގައި ގޯނިތަކެއް އައްސާފައި ހުއްޓެވެ. އަދި ވަޅިއަކުން ހަމަލާދީ ވަރަށް އަނިޔާކޮށްފައި ވެސް ހުއްޓެވެ.
އެ ސަރަހައްދުގައި އެ ވަޅި އާއި ދަގަނޑު ބުރިއެއް ވެސް އޮތެވެ.
ޖީބުގައި އަބަދުވެސް ގިނަ އަދަދެއްގެ ފައިސާ ގެންގުޅޭ މަހުމޫދު މަރާލާފައިވަނީ ފޭރުމުގެ ތެރެއިން ކަމަށް އެ ރަށު މީހުން ތުހުމަތު ކުރެ އެވެ.
އެ މައްސަލަ ތަހުގީގުކުރަން ފުލުހުންގެ ފޮރެންސިކް ޓީމެއް އެ ރަށުގައި އަދިވެސް ހަރަކާތްތެރިވަމުންދާއިރު، އިތުރު ޓެސްޓުތަކެއް ހެދުމަށް މަހުމޫދުގެ ހަށިގަނޑު މިއަދު ހެނދުނު މާލެ ގެނައި އެވެ.
އޭގެ ފަހުން، ހަށިގަނޑު އަނބުރާ ދަނގެއްޗަށް ގެންގޮސް، މަހުމޫދުގެ ޖަނާޒާ މިއަދު ވަނީ ބާއްވައިފަ އެވެ.
މަހުމޫދު އެ ރަށުގައި ވަޅުލާފައިވަނީ މިއަދު އަސުރު ނަމާދަށްފަހު އެވެ.
