،މިލާން (އޮކްޓޫބަރު 11) - ފައިނަލުގައި މިރޭ ފަހަތުން އަރައި ސްޕެއިންގެ މައްޗަށް 2-1 އިން ކުރިހޯދައި ފްރާންސް އިން ނޭޝަންސް ލީގުގެ ޗެމްޕިއަންކަން ހޯދައިފި އެެވެ.
ފްރާންސް އިން ސެމީ ފައިނަލުގައި ބެލްޖިއަމްގެ މައްޗަށް ކުރިހޯދީ އެ ޓީމުން ދެ ގޯލު ޖަހާފައިވަނިކޮށް ފަހަތުން އަރައި 3-2 އިން މޮޅުުވެގެންނެވެ. ޔޫރޯގެ ޗެމްޕިއަން އިޓަލީން ވަނީ މިރޭ ކުޅުނު ނޭޝަންސް ލީގުގެ ތިން ވަނަ ހޮވާ މެޗުން 2-1 އިން ބެލްޖިއަމް ބަލިކޮށްފަ އެވެ.
މިލާންގެ ސެން ސީރޯގައި ކުޅުނު މިރޭ ސްޕެއިނާއި ފްރާންސް އިން ކުޅުނު މެޗުގެ ހުރިހާ ގޯލެއް ވެސް ފެނުނީ ދެ ވަނަ ހާފްގަ އެވެ. ފްރާންސްގެ އެންޓޮއިން ގްރީޒްމަން އާއި ތިއޯ ހެނާންޑޭޒަށް ލަނޑު ޖަހާނެ ރަނގަޅު ފުރުސަތުތަކެއް ނަގާލި އެވެ.
ސްޕެއިން އިން ލީޑުނެގީ މެޗުގެ 64 ވަނަ މިނިޓްގައި އޭރިއާތެރެއިން މިކޭލް އޮޔާޒަބާލް ޖެހި ގޯލުންނެވެ. ސްޕެއިންގެ ކެޕްޓަން ސާޖީ ބުސްކެޓްސް ދިން ބޯޅައެއް ހިފައިގެން އޭރިއާތެރެއަށް ވަދެ އޮޔާޒަބާލް ފޮނުވާލި ބޯޅަ ވަނީ ގޯލުގެ ދުރު ކަަނަށެވެ.
ބުސްކެޓްސް (ކ) އާއި ޕޮގްބާ ބޮލުން ބޯޅަ ފޮނުވާލަނީ.-- ފޮޓޯ: އޭއެފްޕީ
ސްޕެއިނަށް ލީޑު ހިފަަހައްޓައިލެވުނީ ގާތްގަނޑަކަށް ދެ މިނިޓެވެ. މެޗުގެ 66 ވަނަ މިނިޓްގައި ކަރިމް ބެންޒެމާ ވަނީ ފްރާންސަށް އެއްވަރުކޮށްދީފަ އެވެ. އޭރިއާ ރޮނގުކައިރިން ބެންޒެމާ ފޮނުވާލި ބޯޅަ ސްޕެއިންގެ ކީޕަރު އުނާއި ސިމޯން އަތުގައި ޖެހިފައި ވަނީ މަތީ ކަނަށެވެ.
ފްރާންސް މޮޅުވި ގޯލު ޖެހީ މެޗުގެ 80 ވަނަ މިނިޓްގައި ކީލިއަން އެމްބާޕޭ އެެވެ. ހެނާންޑޭޒް ދިން ބޯޅައެއް ހިފައިގެން އޭރިއާތެރެއަށް ވަދެ އެމްބާޕޭ ވަނީ ހަމަޖެހިލާފައި ގޯލުގެ ތެރެއަށް ފޮނުވާލައިފަ އެވެ. އެމްބާޕޭ އޮފްސައިޑް ކަމަށް ސްޕެއިން ޑިފެންޑަރުން އެޕީލް ކުރި ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު ދަނޑު މަތީގައި ހުރި ރެފްރީ ނިންމީ އޮފްސައިޑްނުވާ ކަމަށެވެ.
ނަތީޖާ ހަމަހަމަކުރަން ސްޕެއިންގެ އޮޔާޒަބާލް އާއި ޔެރެމީ ފޮނުވާލި ބޯޅަތައް ފްރާންސްގެ ކީޕަރު ހޫގޯ ލޮރީސް ވަނީ ހުށިޔާރުކަމާ އެކު މަތަކޮށްފަ އެވެ. ފަހުން ޕަބްލޯ ފޯނާލްސް ކުޅެން އަރައި ޖެހި ގިނަ ޝޮޓް ވަނީ ބްލޮކްވެފަ އެވެ.
ނޭޝަންސް ލީގުގެ ފުރަަތަމަ ޗެމްޕިއަނަކީ ޕޯޗުގަލް އެވެ. އެ ޓީމުން ތަށި ހޯދީ 2019 ވަނަ އަަހަރު ނެދަލެންޑްސް ބަލިކޮށްފަ އެވެ. ރަޝިއާގައި 2018 ވަނަ އަހަރު ބޭއްވި ވޯލްޑް ކަޕް ކާމިޔާބުކުރި ފްރާންސް އިން މި ފަހަރު ނޭޝަންސް ލީގު ކާމިޔާބު ކުރިއިރު، މިއީ އެ ޓީމުގެ ކޯޗުކަމާ ޑިޑިއޭ ޑެޝޯމްޕްސް ހަވާލުވެ ހުރެ ލިބުނު އިތުރު ކާމިޔާބެކެވެ. އޭނާ އަކީ ކުޅުމުގެ ކެރިއަރަށް ބަލާއިރު، ފްރާންސްގެ ކާމިޔާބު ކެޕްޓަނެކެވެ.
