ފިލިޕީންސް އާއި ރަޝިއާގައި ހިޔާލު ފާޅުކުރުމުގެ މިނިވަންކަން ދިފާއު ކުރުމަށް މާރިޔާ ރެސާ އާއި ޑިމިޓްރީ މުރަޓޯވް ކުރި މަސައްކަތުގެ އަގު ވަޒަންކުރުމުގެ ގޮތުން އެ ދެ ނޫސްވެރިންނަށް ނޯބެލް ސުލްހައިގެ އިނާމު ދީފި އެވެ.
ނޯބެލް ކޮމިޓީން ބުނީ އެ ދެ ނޫސްވެރިންނަކީ "ހިޔާލު ފާޅުކުރުމުގެ މިނިވަންކަމުގެ ދިފާއުގައި މަސައްކަތް ކުރާ ހުރިހާ ނޫސްވެރިންގެ މަންދޫބުން" ކަމަށެވެ.
ފިލިޕީންސްގެ ރެސާ އާއި ރަޝިއާގެ މުރަޓޯވް މަޝްހޫރުވެފައި ވަނީ ތަހުގީގީ ނޫސްވެރިކަމުގެ ސަބަބުން ސަރުކާރުގެ ނުރުހުން އަމާޒުވެފައިވާ ބަޔެއްގެ ގޮތުގަ އެވެ.
ނޯބެލް ސުލްހައިގެ އިނާމު ލިބުމުން، ދެ މީހުން ވެސް ވަނީ ނޫސްވެރިކަމުގެ މިނިވަންކަން ދިފާއުކުރުމުގެ މުހިއްމުކަމާ ގުޅޭ ގޮތުން ވާހަކަދައްކާފަ އެވެ.
ނޫސް ވެބްސައިޓް "ރެޕްލާ" އުފެއްދި ރެސާއާ ގުޅޭ ގޮތުން ނޯބެލް ކޮމިޓީން ބުނީ އޭނާ ވަނީ ހިޔާލު ފާޅުކުރުމުގެ މިނިވަންކަމުގެ އެހީގައި "ބާރުގެ ބޭނުން ނާޖައިޒު ގޮތުގައި ހިފާކަމާއި، އަނިޔާ އާއި ހުދުމުހުތާރު ސިފަތައް ފިލިޕީންސްގައި އާއްމުވަމުންދާކަން ފަޅާއަރުވާލާފައި" ކަމަށެވެ.
ނޮވަޔާ ގެޒެޓާ ނޫހުގެ ފައުންޑަރު އަދި އެޑިޓަރުގެ ގޮތުގައި މުރަޓޯވް ވަނީ ގޮންޖެހުން ގިނަ ހާލަތްތަކް ކުރިމަތިވަމުން ދިޔައިރު ވެސް އަހަރުތަކެއް ވަންދަން ރަޝިއާގައި ހިޔާލު ފާޅުކުރުމުގެ މިނިވަންކަމުގެ ދިފާއުގައި މަސައްކަތްކޮށްފައި ކަމަށް ނޯބެލް ކޮމިޓީން ބުންޏެވެ.
"މިނިވަންކަމާއެކު ނުފޫޒެއް ނެތި ހަގީގަތުގެ މައްޗަށް ބިނާކޮށް ކުރާ ނޫސްވެރިކަމަކީ ބާރުގެ ބޭނުން ނާޖައިޒު ގޮތުގައި ހިފުމާއި، ދޮގާއި، ހަނގުރާމައިގެ ޕްރޮޕެގެންޑާ ފެތުރުމާ ދެކޮޅަށް މުހިއްމު އާލާތެއް،" ނޯބެލް ކޮމިޓީން ބުންޏެވެ.
ނޯބެލް ސުލްހައިގެ އިނާމު ލިބޭ މީހުން ކަނޑައެޅީ 329 ކެންޑިޑޭޓުންގެ ތެރެއިންނެވެ. މި އެވޯޑަކީ 1.1 މިލިއަން ޑޮލަރުގެ އަގުހުރި އެވޯޑެކެވެ.
