ބައެއް ކަހަލަ ކުދި ކުށްތަކަށް ކޮމިއުނިޓީ ސާވިސް އަދަބެއްގެ ގޮތުގައި ދޭން ފަށާފައިވާއިރު، އެފަދަ ހުކުމެއް ތަންފީޒުކުރުމަށް ބޭނުންވާ އުސޫލެއް އަދިވެސް ނިމިފައި ނުވަނީ އެފަދަ އުސޫލެއް ޑްރާފްޓްކުރުމަށްފަހު އެ ޑްރާފްޓަށް ބޭނުންވާ ރެކޮމެންޑޭޝަންސްތަކާއި ކޮމެންޓްތައް ހޯދުމަށް އެކި އިދާރާތަކަށް ފޮނުވާފައިވުމާއެކު، އެ ކޮމެންޓްތައް ނުލިބި ހުރުމުންކަމަށް މޯލްޑިވްސް ކަރެކްޝަނަލް ސާވިސަސްއިން ބުނެފި އެވެ.
ރާއްޖޭގެ ބައެއް ކޯޓުތަކުން މިހާރު އަދަބެއްގެ ގޮތުގައި މުޖުތަމައުއަށް ފައިދާ ކުރާ ހިދުމަތެއް ނުވަތަ ކޮމިއުނިޓީ ސާވިސްއަށް ހުކުމްކުރަން ފަށާފައިވާއިރު، އަދިވެެސް ކަރެކްޝަންސްއަށް ކޮމިއުނިޓީ ސާވިސް އަދަބެއް ތަންފީޒުކުރާނޭ އުސޫލެއް ނިމިފައިނުވާ މައްސަލައިގަ ކަރެކްޝަންސްއިން ބުނީ އެ އުސޫލު ހެދުމަށްޓަކައި ތައްޔާރުކޮށް ކޮމެންޓް ހޯދުމަށް މީގެ ކުރިން ކަމާބެހޭ އެކި އިދާރާތަކަށާއި މުއައްސަސާތަކަށް ފޮނުވާފައިވާ ކަމަށެވެ.
އަދި އެފަހަރު ލިބުނު ކޮމެންޓްތަކަށް ބަލައި، އުސޫލުގައި ހުރި ނުރަނގަޅު ކަންކަން އިސްލާހު ކުރުމަށްފަހު އަނެއްކާވެސް ޑްރާފްޓެއް ތައްޔާރުކުރުމަށްފަހު އެ ޑްރާފްޓަށް ކޮމެންޓް ހޯދަން މިހާރު ފޮނުވާފައިވާ ކަމަށެވެ. އެ އުސޫލަށް ކޮމެންޓް ހޯދުމަށް ފޮނުވާފައިވާ އެކި އިދާރާތަކުގެ ތެރޭގައި މޯލްޑިވްސް ޕޮލިސް ސާވިސް، ޕްރޮސެކިއުޓާ ޖެނެރަލްގެ އޮފީސް، އެޓާނީ ޖެނެރަލްގެ އޮފީހުގެ އިތުރުން ސުޕްރީމް ކޯޓު ވެސް ހިމެނޭކަމަށް ކަރެކްޝަންސްއިން ބުނެ އެވެ.
އެހެންކަމުން އެ ހުރިހާ އިދާރާއަކާއި މުއައްސަސާއަކުން އެ އުސޫލަށް ގެންނަން ފެންނަ އިތުރު ބަދަލުތަކެއްގެ މައުލޫމާތު ލިބި، އެ އުސޫލު މުޅިން ނިމުމުން ނޫނީ ކޮމިއުނިޓީ ހިދުމަތަށް ހުކުމް ކުރަން ފަށާފައިވީނަމަވެސް، އެ އަދަބު ތަންފީޒުނުކުރެވޭނެކަމަށް ކަރެކްޝަންސްއިން ބުނެ އެވެ.
އަދި އެހާ ގިނަ މުއައްސަސާތަކެއް އެ މަސައްކަތުގައި ހިމެނޭތީ، އެ ޑްރާފްޓް އުސޫލުގެ ކޮމެންޓްތަކާއި ރެކޮމެންޑޭޝަންސްތައް ލިބެން ކިހާ މުއްދަތެއް ހޭދަވާނެ ކަމެއް ވެސް ލަފާކުރަން ދަތިކަމަށް ކަރެކްޝަންސްއިން ބުނެ އެވެ.
ރާއްޖޭގައި ކޮމިއުނިޓީ ސާވިސް ނުވަތަ މުޖުތަމައުއަށް ހިދުމަތްކޮށްދިނުން އަދަބެއްގެ ގޮތުގައި ދެވިދާނެ ކަމަށް ގާނޫނުލްއުގޫބާތުގައި ބުނާއިރު އެފަދަ އަދަބުތައް ހުކުމެއްގެ ގޮތުގައި ކޯޓުތަކަށް ކަނޑައެޅޭނެ އުސޫލެއް ސުޕްރީމް ކޯޓުން ވަނީ މިދިޔަ ޖުލައި މަސްތެރޭ ކަނޑައަޅާފަ އެވެ.
އެ އުސޫލުގެ ދަށުން އެފަދަ އަދަބުތައް ތަންފީޒުކުރާނޭ ގޮތުގެ އުސޫލެއް 60 ދުވަސް ތެރޭ ކަނޑައެޅުމަށް ސުޕްރީމް ކޯޓުން ވަނީ ކަރެކްޝަންސްގެ މައްޗަށް ލާޒިމުކޮށްފަ އެވެ. އެ މުއްދަތު މިހާރު ވަނީ ފަހަނައަޅައި ގޮސްފަ އެވެ.
ކޮމިއުނިޓީ ސާވިސް އަދަބެއްގެ ގޮތުގައި ކަނޑައަޅާފައިވާ ބައެއް ކަހަލަ ކުށްތަކުގެ ތެރޭގައި ލައިސަންސް ނެތި އެއްގަމު އުޅަނދުފަހަރު ދުއްވައިގެން ކޮށްފައިވާ ޖޫރިމަނާގެ މައްސަލަތަކާއި ކުދި ވައްކަމުގެ މައްސަލަތައް ހިމެނެ އެވެ.
ކޮމިއުނިޓީ ސާވިސް އަކީ އާންމުކޮށް ޖަލުތަކުގައި ހުންނަ ޖާގައިގެ ދަތިކަމަށާއި ބައެއް ކަހަލަ ބޮޑެތި ޖޫރިމަނާގެ ކުށްތަކަށް ފައިސާ ދައްކައި ހަލާސްކުރުމުގައި ޖޫރިމަނާ ދައްކަން ޖެހޭ ފަރާތްތަކަށް ލުޔެއް ދިނުމުގެ ގޮތުން ދުނިޔޭގެ އެކި ގައުމުތަކުގައި އާންމުކޮށް ކަނޑައަޅައި އަދަބެކެވެ.
ކަރެކްޝަންސްއިން ބުނި ގޮތުގައި އެފަދަ އަދަބުތައް ތަންފީޒުކުރުމުގައި ބޭނުންވާ އުސޫލެއް ތައްޔާރުކުރުމަކީ ގިނަ ކަންކަމަށް ވިސްނަން ޖެހޭ އުނދަގޫ މަސައްކަތެކެވެ.
އެހެންނަމަވެސް އެފަދަ އަދަބު ތަންފީޒުކުރާނީ ސަރުކާރު ހިއްސާވާ ކުންފުނިތައް މެދުވެރިކޮށް ކަމަށް ކަރެކްޝަންސްއިން ޔަގީންކަމާއެކު ބުނެ އެވެ.
