އުރީދޫ ސާފް ޗެމްޕިއަންޝިޕްގައި މާދަމާ ރޭ ބަންގްލަދޭޝާ ދެކޮޅަށް ރާއްޖެ ނުކުންނައިރު، މުބާރާތުގައި ކުޅުނު ފުރަތަމަ މެޗުގައި ހެދުނު ގޯސްތައް ރަނގަޅުކުރާނެ ކަމަށް ގައުމީ ޓީމުގެ ކޯޗު އަލީ ސުޒޭން ބުނެފި އެވެ.
މުބާރާތުގައި ކުޅުނު ފުރަތަމަ މެޗުގައި ރާއްޖެ ވަނީ ނޭޕާލް އަތުން 1-0 އިން ބަލިވެފަ އެވެ. މިއީ ސާފް ޗެމްޕިއަންޝިޕްގެ ތާރީހުގައި ނޭޕާލް އަތުން ރާއްޖެ ބަލިވި ފުރަތަމަ ފަހަރެވެ.
އަނެއްކޮޅުން، މި މެޗަށް ކުރިމަތިލާއިރު، ބަންގްލަދޭޝް ވަނީ ދެ މެޗުން ހަތަރު ޕޮއިންޓް ހޯދައިފަ އެވެ. ރާއްޖެ ބަލިކުރި ނޭޕާލް އޮތީ ހަ ޕޮއިންޓާ އެކު އެއް ވަނައިގަ އެެވެ. ފައިނަލަށް ދާނީ އެންމެ ގިނަ ޕޮއިންޓް ހޯދާ ދެ ޓީމެވެ. ރާއްޖެ އަށް އަދި އޮތީ ޕޮއިންޓެއް ނުލިބި އެވެ.
މުބާރާތުގައި ކުޅުނު ފުރަތަމަ މެޗުގައި ސްރީލަންކާ އަތުން ބަންގްލަދޭޝް މޮޅުވީ 1-0 އިންނެވެ. ދެވަނަ މެޗުގައި އިންޑިއާއާ 1-1 އިން އެއްވަރުކުރީ ދިހަ މީހުންނާއެކު އެވެ.
މެޗުގެ ކުރިން މިއަދު އޮތް ނޫސްވެރިންގެ ބައްދަލުވުމުގައި ސުޒޭން ބުނީ ނޭޕާލް މެޗުގައި ރާއްޖޭގެ ޓީމުން "ވަރަށް ގިނަ ކަންތައްތައް" ރަނގަޅަށް ކުރި ކަމަށެވެ. އަދި އެ މެޗުގައި ހަމައެކަނި މަދުވީ "ސްކޯ" ކުރުން ކަމަށެވެ.
"ފުރަތަމަ މެޗަށް ބަލާއިރު ދިވެހި ޓީމު ބޭނުންވި ކާމިޔާބެއް ނުލިބުނުކަމުގައިވިޔަސް، އެ މެޗުގައި ދެއްކި ކުޅުމާއި އެ މެޗުން ރަނގަޅުކުރަންޖެހިފައި ހުރި ބައިވަރު ކަންތައްތަކެއް މިިދިޔަ ޓްރެއިނިންތަކުގައި ރަނގަޅުކުރެވުމާއެކު ހިތްހަމަޖެހޭ،" ސުޒޭން ބުންޏެވެ.
"ބަންގްލަދޭޝް އަކީ ވަރުގަދަ ޓީމެއް. އަދި މި މުބާރާތުގައި އެ ޓީމު އޮތީ ވަރަށް ރަނގަޅު ފޯމެއްގައި. އެކަމަކު އަޅުގަނޑު ގަބޫލްކުރަނީ ރާއްޖެ ވަރަށް ރަނގަޅަށް ތައްޔާރުވެފައި އޮތް ކަމަށް."
ރާއްޖެ ފުރަތަމަ މެޗުން ބަލިވުމުން، ޓީމަށް ޕްރެޝަރު ކުރިމަތިވާނެ ކަމަށް އެ މެޗަށް ފަހު ސުޒޭން ބުންޏެވެ.
އެކަމަކު ސުޒޭން ބުނީ ޕްރެޝަރު އޮތް ކަމަށް މާނަކުރީ އެ މެޗުގެ ނަތީޖާއާއެކު "ގޮތްހުސްވާ ހިސާބަށް" ދިއުން ނޫން ކަމަށެވެ.
"ޕްރެޝަރަކޭ މި ބުނަނީ އަޅުގަނޑުމެން އެއް މެޗު ކުޅެފައި، ދެން ދެ މެޗު ކުޅުނު ދެ ޓީމެއް މި އޮތީ ތާވަލްގައި އަޅުގަނޑުމެންނަށްވުރެ ކުރީގައި. ނޭޕާލްގެ ވަރަށް ކޮމްފަޓަބަލްކޮށް ދެ މެޗުން ހަ ޕޮއިންޓް ނަގައިގެން އެ އޮތީ. އަނެއްކާ ބަންގްލަދޭޝް ވަނީ ވަރުގަދަ އިންޑިއާއެކު ދިހަ މީހުންނާއެކު އެއްވަރުވެފަ. އެ ނަމްބާސް މި އޮތީ ފެންނަން،" ސުޒޭން ބުންޏެވެ.
ޓީމަށް ބޮޑު ބަދަލެއް ނުގެންނާނެ
ފުރަތަމަ މެޗުން ބަލިވިޔަސް، ސުޒޭން ބުނީ މާދަމާ ރޭގެ މެޗަށް މާ ބޮޑެތި ބަދަލުތަކެއް ޓީމުން ނުފެންނާނެ ކަމަށެވެ. އޭގެ އެންމެ ބޮޑު ސަބަބަކީ އެ މެޗުގައި ޓީމުން ދެއްކި ކުޅުމާމެދު ހިތްހަމަޖެހޭތީ ކަމަށް އޭނާ ބުންޏެވެ.
އެކަމަކު، އަނިޔާގެ މައްސަލަތަކެއް އުޅޭތީ، ދެތިން ބަދަލެއް ފެނުމަކީ އެކަށީގެންވާ ކަމެއް ކަމަށް ސުޒޭން ވަނީ ބުނެފަ އެވެ.
" ކުޑަކުޑަ އިންޖަރީ އިޝޫތަކެއް (މައްސަލަތަކެއް) އެބައުޅޭ. އެހެން ނޫނީ މާ ބޮޑު ބަދަލެއް އަންނާނެ ސަބަބެއް ނެތް. ސްކޯ ކުރުން ފިޔަވައި، އެހެން ގިނަ ކަންތައްތައް (ފުރަތަމަ މެޗުގައި) ރަނގަޅަށް ދިޔައީ. ކުޅުންތެރިންގެ ފަރާތުން ވަރަށް ގިނަ ރަނގަޅު ކަންތައްތައް ފެނުނު،" ސުޒޭން ބުންޏެވެ.
ސުޒޭން ބުނީ ފުރަތަމަ މެޗުގައި ވެސް، ރާއްޖޭގެ ސަޕޯޓަރުން "ޒިންމާ" އަދާކުރި ކަމަށެވެ. އަދި މާދަމާ ރޭ ވެސް ސަޕޯޓަރުންގެ އެހީތެރިކަން ޓީމަށް ބޭނުންވާނެ ކަމަށެވެ.
"ފުރަތަމަ މެޗުގައި އަޅުގަނޑުމެންގެ 12 ވަނަ ކުޅުންތެރިޔާގެ ޒިންމާ އަދާކުރި. މާދަމާ ރޭ ވެސް އެކަމާ (12 ކުޅުންތެރިޔާ ޒިންމާ އަދާކުރާނެކަމާ މެދު) ޝައްކެއް ވެސް ނެތް،" ސުޒޭން ބުންޏެވެ.
ބަންްގްލަދޭޝް އިން ސާފް ޗެމްޕިއަންޝިޕެއްގައި ރާއްޖެ އަތުން މޮޅުވީ މީގެ 18 ވަރަކަށް އަހަރު ކުރިންނެވެ. ބަންގްލަދޭޝް އިން 2003 ވަނަ އަހަރުގެ ފައިނަލުގައި ރާއްޖެ ބަލިކުރި ފަހުން ސާފް ޗެމްޕިއަންޝިޕްގައި ރާއްޖެ އަތުން މޮޅެއް ނުހޯދަ އެވެ.
ސުޒޭން ބުނީ މީގެ ކުރިން ހިނގާފައި ހުރި ކަންތައްތަކަކީ މުޅިން އެހެން ކަމެއް ކަަމަށާއި މިހާރު އޮތް ބަންގްލަދޭޝްގެ ޓީމު އޮސްކާ ބްރުޒޮންގެ ކޯޗުކަމުގައި ރަނގަޅަށް ކުޅެމުން އަންނަ ކަމަށެވެ. އަދި އޮސްކާ އަކީ ރާއްޖޭގައި މަސައްކަތް ކޮށްފައި ހުރި ކޯޗެއް ވުމުން ދިވެހި ފުޓްބޯޅަ އެނގޭނެ ކަމަށާއި ރާއްޖޭން ނުކުންނާނީ އެ ހުރިހާ ކަަމަކަށް ވިސްނައިގެން ރަނގަޅު ޕްލޭނަކާ އެކު މެޗުން މޮޅުވާން ކަމަށް ސުޒޭން ވަނީ ބުނެފަ އެވެ.
އޮސްކާ އަކީ ކުރިން ރާއްޖޭގެ ނިއު ރޭޑިއަންޓާ އެކު ގިނަ ކާމިޔާބީތަކެއް ހޯދި ކޯޗެކެވެ. ބަންގްލަދޭޝްގެ ޗެމްޕިއަން ބަޝުންދަރާ ކިންގްސް ކޯޗެއްގެ ގޮތުގައި ހުރެ އޭނާ ވަނީ އެކުވެރިކަމުގެ މެޗެއްގައި ނިއު ބަލިކުރުމުގެ އިތުރުން އޭއެފްސީ ކަޕްގައި ޓީސީ ސްޕޯޓްސް ކްލަބާއި މާޒިޔާ ބަލިކޮށްފަ އެވެ.
ގަލޮޅު ދަނޑުގައި އެންމެ ފަހުން ބަންގްލަދޭޝްއާ އެކު ރާއްޖޭން ކުޅުނީ 2016 ވަނަ އަހަރު އެކުވެރިކަމުގެ މެޗެކެވެ. އެ މެޗުން ރާއްޖެ ވަނީ 5-0 އިން މޮޅުވެފަ އެވެ. މާދަމާރޭ ރާއްޖެ އާއި ބަންގްލަދޭޝް ކުޅޭ މެޗު ފަށާނީ ރޭގަނޑު ނުވައެއް ޖަހާއިރު އެވެ.
