އުރީދޫ ސާފް ޗެމްޕިއަންޝިޕްގައި މިއަދު އިންޑިއާ އާއި ބަންގްލަދޭޝް ބައްދަލުކުރި މެޗު 1-1 އިން އެއްވަރުވިއިރު، މި މެޗުން މޮޅުނުވެވުނީ އިންޑިއާ އިން އަމިއްލަ އަށް ހެދި ގޯސްތަކުން ކަމަށް އެ ޓީމުގެ ކޯޗު އީގޯ ސްޓިމަކް ބުނެފި އެވެ.
މެޗުގެ ފުރަތަމަ ހާފުގައި ސުނިލް ޗެތުރީ ޖެހި ލަނޑާއެކު އިންޑިއާ އިން ލީޑު ނަގާފައިވަނިކޮށް، ބަންގްލަދޭޝުން ދެވަނަ ހާފުގައި މެޗުގެ ނަތީޖާ އެއްވަރުކުރީ ދިހަ ކުޅުންތެރިންނަށް އެ ޓީމު މަދުވެފައިވަނިކޮށެވެ.
މެޗަށް ފަހު ވާހަކަދައްކަމުން، ސްޓިމަކް ބުނީ މެޗުން މޮޅުވުމަށް އިންޑިއާ އަށް ހުރިހާ ކަމެއް ވެސް ފަހިވެފައި އޮތް ނަމަވެސް، މެޗުން މޮޅުނުވެވުނީ އަމިއްލަ އަށް ހެދުނު ގޯސްތަކެއްގެ ސަބަބުން ކަމަށެވެ. އަދި އިންޑިއާގެ ކުޅުންތެރިން އަމިއްލަ އަށް ޕްރެޝަރަށް ދާންޖެހުނު ސަބަބެއް ނުވިސްނޭ ކަމަށެވެ.
"މެޗު ކޮންޓުރޯލްކުރީ އަހަރަމެން. އަހަރަމެން އޮތީ 1-0 އިން ލީޑުގައި. އެއް ކުޅުންތެރިއެއް އިތުރަށް. އެކަމަކަު އަހަންނަކަށް ނޭނގެ އިންޑިއާ ޓީމުން އަމިއްލަ އަށް ޕްރެޝަރަށް ވެއްޓި، ގިނަ ޕާސްތަކެއް ގެއްލުވާލައި، ވަރަށް ގިނަ މިސްޓޭކްތަކެއް ހެދި. އޭގެން ކޮންމެ ފަހަރަކު އިދިކޮޅު ޓީމަށް ކައުންޓާކުރަން ފުރުސަތު ލިބި، އެމީހުންގެ ކޮންފިޑެންސް ރަނގަޅުވީ،" ސްޓިމަކް ބުންޏެވެ.
"މެޗުގައި އިންޑިއާ އިން 75 މިނިޓު ވަރަށް ރަނގަޅަށް ކުޅުނު. އަނެއް 15 މިނިޓުގައި ބޮޑެތި ގޯސްތަކެއް ހެދީ ކީއްވެ ކަމެއް ނޭނގެ."
މި މެޗުގައި ވެސް ބަންގްލަދޭޝްގެ ގިނަ އަދަދެއްގެ ސަޕޯޓަރުން ދަނޑަށްވަދެ، އެ ޓީމަށް ތަރުހީބު ދިނެވެ. ސްޓިމަކް ބުނީ ބަންގްލަދޭޝްގެ ސަޕޯޓަރުންގެ ފަރާތުން އެ ޓީމަށް އިތުރު ހިތްވަރެއް ލިބުނު ކަމަށެވެ.
"ބަންގްލަދޭޝަށް ރަނގަޅު ސަޕޯޓެއް އޮތް. އެހެންވެ، އެ ޓީމު ތަންކޮޅެއް ދަށްވެލާއިރަށް، ސަޕޯޓަރުން އަޑުގަދަކޮށްގެން ވެސް އެ ޓީމަށް ހިތްވަރު އެބަދޭ،" ސްޓިމަކް ބުންޏެވެ.
ސްޓިމަކް އިންޑިއާގެ ކޯޗުކަމާ ހަވާލުވި ފަހުން، ބަންގްލަދޭޝާ ދެކޮޅަށް މިހާތަނަށް ކުޅުނު ތިން މެޗުގެ ތެރެއިން މޮޅުވެވުނީ އެންމެ މެޗަކުންނެވެ. ދެ މެޗު ނިމުނީ އެއްވަރުވެގެނެވެ. އެންމެ ފަހުން ކުޅުނު މެޗުގައި މިދިޔަ ޖޫން މަހު ވަނީ ޗެތުރީގެ ދެ ގޯލާ އެކު 2-0 އިން މޮޅުވެފަ އެވެ.
ތަޖުރިބާކާރު ކުޅުންތެރިންގެ ފަރާތުން އުންމީދުކުރި ކަންތައްތައް ނުފެނުނު
ސްޓިމަކް ބުނީ މިހާރު އޮތް އިންޑިއާގެ ޓީމުގައި ތަޖުރިބާކާރު ގިނަ ކުޅުންތެރިންތަކެއް ތިބިއިރު، މިއަދުގެ މެޗުގައި އެ ކުޅުންތެރިންގެ ތަޖުރިބާގެ ބޭނުން ހިފި މަންޒަރު ނުފެނުނު ކަމަށެވެ. އަދި އަމިއްލަ އަށް ހާސްވެގެން މެޗުގެ މުހިއްމު ވަގުތުތަކުގައި އެ ކުޅުންތެރިންނަށް ހެދުނު މިސްޓޭކް ކުރިއަށް ހުރި މެޗުތަކުގައި ރަނގަޅުކުރުން މުހިއްމު ކަމަށް ސްޓިމަކް ވަނީ ފާހަގަކޮށްފަ އެވެ.
"އަހަރެން އެންމެ ހިތްހަމަނުޖެހެނީ ތަޖުރިބާކާރު ކުޅުންތެރިން ތިބިއިރު، އެ ކުޅުންތެރިންގެ ފަރާތުން އެ ތަޖުރިބާގެ ބޭނުން ހިފި މަންޒަރު ނުފެނުން. އެ ކުޅުންތެރިންގެ ފަރާތުން އަހަރެން އުންމީދުކުރި ކަންތައްތަކެއް ނުފެނުނު،" ސްޓިމަކް ބުންޏެވެ.
ސްޓިމަކް ބުނީ މި މެޗުން އެއްވަރުވިޔަސް، އިންޑިއާ އަށް ފައިނަލްގެ އުންމީދު ނުގެއްލޭ ކަމަށެވެ. އަދި ކުރިއަށް އޮތް މެޗުތަކަށް ވިސްނައިގެން، މި މެޗުގައި ހެދުނު ގޯސްތައް ރަނގަޅުކުރަން މަސައްކަތްކުރާނެ ކަމަށެވެ.
"ކޮންމެ ޓީމަކަށް ވެސް ހަތަރު މެޗު އޮންނާނެ. އެހެންވީމަ އަހަރެމެން ހުރިހާ މެޗެއް ކުޅޭއިރު އޮންނަ ހިސާބެއް ބަލަމާ. މި ވަގުތު ވަރަށް އުނދަގޫވާނެ ހުރިހާ ކަމަކާ ބެހޭގޮތުން ވާހަަކަ ދައްކަން،" ސްޓިމަކް ބުންޏެވެ.
މިއަދުގެ މެޗުގައި ބަންގްލަދޭޝްގެ ބިޝްވަނަތަށް ދެއްކި ރަތް ކާޑަކީ ދެ ރަތް ކާޑު ވެސް ދެއްކިދާނެ ފަދަ ފައުލެއް ކަމަށާއި އެ ކާޑާ މެދު ސުވާލު އުފެއްދޭނެ އެއްވެސް ޖާގައެއް ނެތް ކަމަށް ސްޓިމަކް ބުންޏެވެ.
އިންޑިއާ އިން މުބާރާތުގައި ކުޅޭ ދެވަނަ މެޗުގައި ބުރާސްފަތި ދުވަހު ހަވީރު ނުކުންނާނީ ސްރީލަންކާއާ ދެކޮޅަށެވެ. މިރޭ ކުޅޭ މެޗުގައި ލަންކާ ބައްދަލުކުރާނީ ނޭޕާލްއާ އެވެ.
