ވޮޝިންޓަން، އެމެރިކާ (އޮކްޓޯބަރު 3) - އެމެރިކާގެ ކުރީގެ ރައީސް ޑޮނަލްޑް ޓްރަމްޕުގެ ޓްވިޓާ އެކައުންޓް އަލުން އެކްޓިވޭޓް ކުރަން އެދި ކޯޓަށް މައްސަލަ ހުށަހަޅުއްވައިފި އެވެ.
ޓްވިޓާ އާއި ސޯޝަލް މީޑިއާ އެހެން ޕްލެޓްފޯމުތަކުން ޓްރަމްޕް ބޭރުކުރީ މިދިޔަ ޖެނުއަރީ މަހު އެމެރިކާގެ ކެޕިޓަލް އިމާރާތުގެ ތެރެއަށް ޓްރަމްޕްގެ ސަޕޯޓަރުންތަކެއް ވަދެގަނެ، ހިންގި ހަމަނުޖެހުމަށް ފަހު އެވެ.
ސަޕޯޓަރުން ރުޅި ގަދަވީ، ރިޔާސީ އިންތިހާބުގެ ވޯޓު އޮޅުވާލާފައިވާ ކަމަށް ވިދާޅުވެ، ސާބިތު ނުހިފޭ ވާހަކަތަކެއް ޓްރަމްޕް ދެއްކެވުމުގެ ސަބަބުންނެވެ.
ޓްވިޓާ އިން ބުނީ ޓްރަމްޕްގެ ބައެއް ޓްވީޓުތަކުގައި ކުންފުނީގެ ޕޮލިސީއާ ހިލާފު ވާހަކަތައް ހިމެނޭ ކަމަށާއި އޭގެ ތެރޭގައި ހަމަނުޖެހުމަށް ހިތްވަރު ލިބޭ ފަދަ ވާހަކަ ހިމެނޭ ކަމަށެވެ.
މިދިޔަ ހުކުރު ދުވަހު ފްލޯރިޑާގެ ފެޑެރަލް ކޯޓަށް ހުށަހެޅުއްވި މައްސަލާގައި ޓްރަމްޕް ވިދާޅުވީ އެތައް މިލިއަން ސަޕޯޓަރުންނާ ގުޅުން ބޭއްވުމަށް އޮތް ޕްލެޓްފޯމް ބަންދުވީ ކޮންގްރެސް މެމްބަރުންގެ ޕްރެޝަރާ ހެދި ކަމަށެވެ.
ޓްވިޓާ އިން ޓްރަމްޕްގެ އެކައުންޓް ސަސްޕެންޑު ކުރިއިރު 88 މިލިއަން ފޮލޯވަރުން ތިއްބެވެ.
އަފްގާނިސްތާނުގެ ވެރިކަމުގައި އޮތް ތާލިބާނުންނަކީ ޓެރަރިސްޓު ޖަމާއަތެއްގެ ގޮތުގައި އެމެރިކާ އިން ކަނޑައަޅާފައި ވާއިރު، ތާލިބާނުންގެ ވެސް ޓްވިޓާ އެކައުންޓެއް ހިންގާ ކަމަށް ޓްރަމްޕް ވިދާޅުވި އެވެ.
"ތާލިބާނުންގެ އެކައުންޓު ފާޅުވީ އޯގަސްޓު 8 ގައި. އޭގެ ފަހުން ތާލިބާނުން އަސްކަރީ ގޮތުން ހޯދި ކުރިއެރުންތަކާ ގުޅޭ ގޮތުން ގަވާއިދުން ޓްވީޓު ކުރަމުން ދިޔައިރު ވެސް ޓްވިޓާ އިން އެކަން ހުއްޓުވާފައެއް ނުވޭ."
ޓްވިޓާ އިން ވަނީ ކޯޓަށް ހުށަހެޅި މައްސަލައާ ގުޅޭ ގޮތުން އެއްޗެއް ބުނަން ދެކޮޅު ހަދާފަ އެވެ.
މިދިޔަ އަހަރުގެ ރިޔާސީ އިންތިހާބުގައި ދެ ވަނަ ދައުރަކަށް ރައީސް ކަމަށް ކުރިމަތިލައިގެން ނާކާމިޔާބީއާ ކުރިމަތިވެވަޑައިގެންނެވި ޓްރަމްޕް އަންނަނީ 2024 ގައި ވެސް ރައީސް ކަމަށް ވާދަކުރައްވާނެކަމުގެ އިޝާރާތެއް ދެއްވައިފަ އެވެ.
