މެނީލާ، ފިލިޕީންސް (އޮކްޓޯބަރު 3) - އަންނަ އަހަރުގެ އިންތިހާބުގައި ނައިބު ރައީސް ކަމަށް ވާދަނުކުރައްވާނެ ކަމަށާއި ސިޔާސީ ދާއިރާ އިން ރިޓަޔާ ވާން ނިންމަވާފައިވާ ކަމަށް ފިލިޕީންސްގެ ރައީސް ރޮޑްރިގޯ ޑުޓާޓޭ ވިދާޅުވެއްޖެ އެވެ.
މީގެ ކުރިން ޑުޓާޓޭ ވަނީ އަންނަ އަހަރުގެ އިންތިހާބުގައި ނައިބު ރައީސް ކަމަށް ވާދަކުރައްވާނެކަން އިއުލާނު ކުރައްވާފަ އެވެ. ނަމަވެސް ވާދަނުކުރައްވާނެ ކަމަށް ވިދާޅުވެފައި މި ވަނީ ޑުޓާޓޭގެ ދަރިކަނބަލުން އިންތިހާބަށް ނުކުންނަން ނިންމަވާފައި ވަނިކޮށެވެ.
ހިޔާލު ހޯދުމުގެ ސާވޭތަކުން ދައްކާ ގޮތުގައި 2016 ވަނަ އަހަރު ވެރިކަމަށް ވަޑައިގެންނެވި ޑުޓާޓޭ އަކީ އަދިވެސް ފިލިޕީންސްގެ އެންމެ މަގްބޫލު ސިޔާސީ ލީޑަރެވެ. އޭނާގެ އެންމެ ބޮޑު ވައުދަކީ މަސްތުވާތަކެއްޗާ ދެކޮޅަށް ހަނގުރާމަ ކުރުމެވެ.
ފިލިޕީންސްގެ ގާނޫނު އަސާސީގެ ދަށުން ދެ ވަނަ ދައުރަކަށް ރައީސް ކަމަށް ކުރިމަތިނުލެވެ އެވެ. އުމުރުން 76 އަހަރުގެ ޑުޓާޓޭ ވިދާޅުވީ ގާނޫނު އަސާސީގެ އެގޮތަށް ވަނިކޮށް ނައިބު ރައީސް ކަމަށް ވާދަކުރެއްވުމަކީ ގާނޫނު އަސާސީގެ ރޫހާ ހިލާފުކަމެއްގެ ގޮތުގައި ދެކިވަޑައިގަންނަވާ ކަމަށެވެ.
"އެހެންވީމަ މިއަދު އަޅުގަނޑު މި އިއުލާނު ކުރަނީ ސިޔާސީ ދާއިރާއިން ރިޓަޔާ ވާން ނިންމިކަން،" ޑުޓާޓޭ ވިދާޅުވި އެވެ.
ސޯޝަލް ވެދާ ސްޓޭޝަންސް އިން ހެދި ދިރާސާއަކުން ދެއްކި ގޮތުގައި ޑުޓާޓޭ ނައިބު ރައީސް ކަމަށް ވާދަކުރެއްވުމަކީ ގާނޫނު އަސާސީގެ ރޫހާ ހިލާފު ކަމެއްގެ ގޮތުގައި ފިލިޕީންސްގެ 60 ޕަސެންޓު މީހުން ދެކެ އެވެ.
ޑުޓާޓޭގެ ބަދަލުގައި ވެރިކަން ކުރާ ޕާޓީން ނައިބު ރައީސް ކަމަށް ވާދަކުރައްވާނީ ސެނެޓާ ކްރިސްޓޮފާ ލޯރެންސް "ބޮންގް" ގޯ އެވެ. ރައީސް ކަމަށް ވާދަކުރާ ކެންޑިޑޭޓު އަދި އިއުލާނުކޮށްފައި ނުވާއިރު، ގިނަ ބަޔަކު ދެކޭ ގޮތުގައި ޓިކެޓު ލިބޭނީ ޑުޓާޓޭގެ ދަރިކަނބަލުން ސާރާ އަށެވެ.
މަސްތުވާތަކެއްޗާ ދެކޮޅަށް ހިންގާ ހަނގުރާމައިގައި ގާނޫނާ ހިލާފު އެތައް ކަމެއް ހިންގި ކަމުގެ ތުހުމަތުގައި ފިލިޕީންސް އާއި އިންޓަނޭޝަނަލް ކްރިމިނަލް ކޯޓު (އައިސީސީ) ގައި ޑުޓާޓޭއާ ދެކޮޅަށް އުފުލާފައިވާ ދައުވާތަކުން ބައްޕަ ހިމާޔަތް ކުރަން ސާރާ މަސައްކަތް ކުރައްވާނެ ކަމަށް ބެލެވެ އެވެ.
ދެކުނު ޑަވާއޯ ސިޓީގެ މޭޔަރު ކަމުގައި މި ވަގުތު ހުންނެވި ސާރާ ވިދާޅުވެފައި ވަނީ ބައްޕަ ނައިބު ރައީސް ކަމަށް ވާދަކުރައްވާ ނަމަ، އިންތިހާބުގައި ވާދަނުކުރައްވާނެ ކަމަށެވެ.
ކެންޑިޑޭޓުން ލިޔުންތައް ހުށަހަޅަން އޮތް ސުންގަޑިއަކީ އޮކްޓޯބަރު 8 އެވެ. ނަމަވެސް އެ ތާރީހުގެ ފަހުން ވެސް "ލޭޓް އެންޓްރީ"ގެ ގޮތުގައި ނޮވެމްބަރު 15 ގެ ކުރިން ލިޔުންތައް ހުށަހެޅޭނެ އެވެ.
