ލަންޑަން، އިނގިރޭސިވިލާތް (ސެޕްޓެމްބަރު 29) - އިނގިރޭސިވިލާތަށް ކުރިމަތިވެފައިވާ ފިޔުލް ސަޕްލައި ކުރުމުގެ ކާރިސާއާ ގުޅިގެން ޑެލިވެރީގެ މަސައްކަތަށް ވަރަށް އަވަހަށް ސިފައިން ނުކުންނާނެ ކަމަށް ސަރުކާރުން ބުނެފި އެވެ.
ބިޒްނަސް ސެކެޓްރީ ކްވާސީ ކްވާޓެންގް ސްކައި ނޫހަށް ވިދާޅުވީ ތެޔޮ ޑެލިވާ ކުރަން ސިފައިން ވަރަށް އަވަހަށް ނުކުންނާނެ ކަމަށާއި އޭގެ ބޭނުމަކީ ޕެޓްރޯލް ސްޓޭޝަންތަކުގެ ބޭރުގައި ދިގު ކިޔުތައް ހަދާފައިވާ މައްސަލަ ހައްލު ކުރުން ކަމަށެވެ.
ސަރުކާރުގެ އިތުރު އޮފިޝަލަކު އިނގިރޭސިވިލާތުގެ ޕްރެސް އެސޯސިއޭޝަން ނިއުސް އެޖެންސީ އަށް ބުނީ 150 އަސްކަރީ ޑްރައިވަރުން ތައްޔާރަށް ތިބި ކަމަށާއި އިތުރު 150 ޑްރައިވަރުން ވެސް ބެކަޕްގެ ގޮތުގައި ނެރެވިދާނެ ކަމަށެވެ.
ކްވާޓެންގްގެ ޑިޕާޓްމަންޓާއި މިނިސްޓްރީ އޮފް ޑިފެންސް ގުޅިގެން ޕެޓްރޯލް އިންޑަސްޓްރީއާ އެކު މަސައްކަތް ކުރަމުން ދަނީ ތެޔޮ ޑެލިވާ ކުރުމުގައި އެންމެ މުހިއްމު ސަރަހައްދުތައް ކަނޑައެޅުމަށެވެ.
ބޮޑު ވަޒީރު ބޮރިސް ޖޯންސަން އަންގާރަ ދުވަހު ވިދާޅުވީ ތެލުގެ ސްޓޮކް އެބަހުރި ކަމަށާއި ވަރަށް އަވަހަށް މި ހާލަތު ހަމައަކަށް އެޅިދާނެ ކަމަށެވެ.
ތެޔޮ ސަޕްލައި ކުރާ ޓޭންކަރުތައް ދުއްވާނެ ޑްރައިވަރުންގެ ދަތިކަން ދިމާވުމާއެކު ތެލުގެ ސަޕްލައި ހުއްޓިދާނެކަމުގެ ބިރުގައި ގިނަ އަދަދެއްގެ މީހުން ވަނީ ޕެޓްރޯލް ސްޓޭޝަންތަކުގައި ކިޔު ހަދާފަ އެވެ.
ފާއިތުވި ހަތަރު ދުވަހު ގިނަ އަދަދެއްގެ އާއްމުން ކިޔު ޖެހިގެން ބޭނުންވާ މިންވަރަށް ވުރެ އިތުރަށް ތެޔޮ ގަނެފައި ވާތީ ފްރަންޓްލައިނުގައި މަސައްކަތް ކުރާ ބައެއް ޕަބްލިކް ސެކްޓާ މުވައްޒަފުންނަށް ވަނީ ކާރު ދުއްވާނެ ތެޔޮ ނުލިބުމުން މަސައްކަތަށް ދެވޭ ގޮތް ނުވެފަ އެވެ.
އެހެންވެ، ޕެޓްރޯލް ސްޓޭޝަންތަކުން އެ މީހުންނަށް އިސްކަން ދިނުމަށް އިއްޔެ ސަރުކާރުން ގޮވާލި އެވެ.
ޓޭންކަރު ޑްރައިވަރުންގެ ދަތިކަން ދިމާވީ އިނގިރޭސިވިލާތުން ޔޫރަޕިއަން ޔޫނިއަން (އީޔޫ) އިން ވަކިވުމުން ކަމަށް ދެކެވޭ ވާހަކަ ސަރުކާރުން ދޮގުކުރެ އެވެ.
ސަރުކާރުން މިހާރު ވަނީ ކުރިއަށް އޮތް ތިން މަހަށް އިމިގްރޭޝަން ގަވާއިދުތަކަށް ލުއި ދީފަ އެވެ. އޭގެ ބޭނުމަކީ އިނގިރޭސިވިލާތް ދޫކޮށް ދިޔަ ޔޫރަޕުގެ އެހެން ގައުމުތަކުގެ ޑްރައިވަރުން އަނބުރާ މަސައްކަތަށް ގެނައުމެވެ.
ނަމަވެސް ފާޑުކިޔާ ފަރާތްތަކުން ބުނަނީ އިމިގްރޭޝަން ގަވާއިދުތަކަށް ލުއި ދީގެން ހައްލެއް ނުފެންނާނެ ކަމަށެވެ. މިދިޔަ ޖެނުއަރީ މަހު އިނގިރޭސިވިލާތުން ރަސްމީކޮށް އީޔޫ އިން ވަކިވި ނަމަވެސް، އެތައް ހާސް ޓޭންކަރު ޑްރައިވަރުން އަނބުރާ ގައުމަށް ދާން ޖެހިދާނެ ކަމަށް ވިސްނާފައެއް ނުވެ އެވެ.
ގާތްގަނޑަކަށް 30،000 އެއްހާ ޓޭންކަރު ޑްރައިވަރުން އިނގިރޭސިވިލާތުން ގޮސްފައި ވާއިރު، އެ ވަޒީފާތަކަށް އެހެން މީހުން ހޯދާފައެއް ނުވެ އެވެ. މައި އިދިކޮޅު ލޭބާ ޕާޓީން ބުނީ މިކަމުން ފެންނަނީ ސަރުކާރުގެ "ނާގާބިލްކަން" ކަމަށެވެ.
