އައްމާން، އުރުދުން (ސެޕްޓެމްބަރު 28) - ސީރިއާގެ ދާހިލީ ހަނގުރާމައާ ގުޅިގެން ވައިގެ ދަތުރުތައް މެދުކަނޑާލިތާ ނުވަ އަހަރު ފަހުން އަލުން ދަތުރުތައް ފެށުމަށް އުރުދުން އިން ތައްޔާރުވެއްޖެ އެވެ.
އުރުދުންގެ ގައުމީ އެއާލައިން، ރޯޔަލް ޖޯޑޭނިއަން އެއާލައިންސްގެ ދަތުރުތައް ސީރިއާ އަށް އަލުން ފަށާނެކަން އިއުލާނު ކުރީ ދެ ގައުމުގެ އޮފިޝަލުންގެ މެދުގައި ބޭއްވި ބައްދަލުވުމަކަށް ފަހު އެވެ.
އުރުދުންގެ ރަސްމީ ނިއުސް އެޖެންސީ، ޕެޓްރާ އިން ރިޕޯޓު ކުރި ގޮތުގައި ސީރިއާގެ މިނިސްޓަރުންގެ ވަފުދެއް އައްމާން އަށް ވަޑައިގެން ދެ ގައުމުގެ ގުޅުން ބަދަހިކުރުމާ ގުޅޭ މަޝްވަރާތަކުގައި ވަނީ ބައިވެރިވެފަ އެވެ.
ޖުލައި 2012 އާ ހަމައަށް ރޯޔަލް ޖޯޑޭނިއަންގެ ދެ ފްލައިޓް ކޮންމެ ދުވަހަކު ވެސް ސީރިއާ އަށް ދަތުރު ކުރި އެވެ. އެއީ ދިމިޝްކު އަދި އަލެޕޯ އަށެވެ.
ވައިގެ ދަތުރުތައް މެދުކަނޑާލީ ސީރިއާގައި ސަރުކާރާ ދެކޮޅަށް ފެށި އިންގިލާބެއް ބޮޑު ދާހިލީ ހަނގުރާމައަކަށް ބަދަލުވެ، އެ ގައުމުގެ ވައިގެ ސަރަހައްދު ނުރައްކާތެރިވުމުންނެވެ.
"ސިއްހީ ފިޔަވަޅުތަކަށް ފުރިހަމަ އަށް އަމަލު ކުރާނެކަމުގެ ޝަރުތާއެކު ރޯޔަލް ޖޯޑޭނިއަންގެ ފްލައިޓުތައް އާދީއްތަ ދުވަހުން ފެށިގެން އަލުން ސީރިއާ އަށް ފަށާނެ،" އުރުދުންގެ ޓްރާންސްޕޯޓް މިނިސްޓަރު ވަޖީހް އަޒައިޒާ ނެރުއްވި ބަޔާނެއްގައި ވިދާޅުވި އެވެ.
އޭނާ ވިދާޅުވީ ސީރިއާ އިން ދަތުރު ކުރާ ޕަސެންޖަރުންގެ އަތުގައު 72 ގަޑިއިރު ހަމަނުވާ ކޮވިޑް ނެގެޓިވް ނަތީޖާއެއް އޮންނަން ޖެހޭނެ ކަމަށާއި އައްމާން އަށް ފޭބުމަށް ފަހު އަލުން ކޮވިޑަށް ޓެސްޓު ކުރަން ޖެހޭނެ ކަމަށެވެ.
ސީރިއާގެ ވަފުދު ހޯމަ ދުވަހު އައްމާން އަށް ދަތުރު ކުރީ ޖާބިރް-ނައްސިބް ބޯޑަރު ކްރޮސިން އިންނެވެ. ދެކުނު ސީރިއާގައި އަލުން ހަމަނުޖެހުން ހިނގަމުން ދާތީ އެ ކްރޮސިން ބަންދުކޮށްފައި ހުންނަތާ ދެ މަސް ވެއްޖެ އެވެ.
އެ ކްރޮސިން އަކީ އުރުދުން އާއި ސީރިއާގެ ބޯޑަރު އެއްގަމު މަގުން ހުރަސް ކުރަން އޮންނަ އެންމެ ބޮޑު ކްރޮސިން އެވެ. ޕެޓްރާ އިން ރިޕޯޓު ކުރި ގޮތުގައި އެ ތަން ވެސް އާއްމުންނަށް ހުޅުވާލާނެ އެވެ.
ބޮޑު ކާރިސާއެއް ދިމާވެފައިވާ ލުބްނާނަށް މިސްރުގެ ގޭހާއި އުރުދުންގެ ކަރަންޓު ސީރިއާ މެދުވެރިކޮށް ފޯރުކޮށްދޭން މި މަހުގެ ތެރޭގައި އެ ހަތަރު ގައުމުން ވަނީ އެއްބަސްވެފަ އެވެ.
އދ. އިން ބުނެފައިވާ ގޮތުގައި ސީރިއާގެ 650،000 ރެފިއުޖީން ދިރިއުޅެމުން ދަނީ އުރުދުންގަ އެވެ. ނަމަވެސް އުރުދުން އިން ބުނާ ގޮތުގައި ސީރިއާގެ 1.3 މިލިއަން ރެފިއުޖީން އެ ގައުމުގައި އެބަ އުޅެ އެވެ.
