ލަންޑަން، އިނގިރޭސިވިލާތް (ސެޕްޓެމްބަރު 28) - އިނގިރޭސިވިލާތަށް ދިމާވެފައިވާ ތެލުގެ ކާރިސާގައި ޕެޓްރޯލް ޕަމްޕުތަކުން ތެޔޮ ވިއްކުމުގައި ނަރުހުންނާއި ފުލުހުން އަދި ޓީޗަރުން ފަދަ މުހިއްމު މަސައްކަތްތެރިންނަށް އިސްކަން ދިނުމަށް ސަރުކާރުން ގޮވާލައިފި އެވެ.
ތެޔޮ ސަޕްލައި ކުރާ ޓޭންކަރުތައް ދުއްވާނެ ޑްރައިވަރުންގެ ދަތިކަން ދިމާވުމާއެކު ތެލުގެ ސަޕްލައި ހުއްޓިދާނެކަމުގެ ބިރުގައި ގިނަ އަދަދެއްގެ މީހުން ވަނީ ޕެޓްރޯލް ސްޓޭޝަންތަކުގައި ކިޔު ހަދާފަ އެވެ. އެކަމަކު ސަރުކާރުން ބުނީ ތެލުގެ ދަތިކަމެއް ދިމާނުވާ ކަމަށެވެ.
ފާއިތުވި ހަތަރު ދުވަހު ގިނަ އަދަދެއްގެ އާއްމުން ކިޔު ޖެހިގެން ބޭނުންވާ މިންވަރަށް ވުރެ އިތުރަށް ތެޔޮ ގަނެފައި ވާތީ ފްރަންޓްލައިނުގައި މަސައްކަތް ކުރާ ބައެއް ޕަބްލިކް ސެކްޓާ މުވައްޒަފުންނަށް ވަނީ ކާރު ދުއްވާނެ ތެޔޮ ނުލިބުމުން މަސައްކަތަށް ދެވޭ ގޮތް ނުވެފަ އެވެ.
ޓްރާންސްޕޯޓް ސެކެޓްރީ ގްރާންޓް ޝެޕްސް ވިދާޅުވީ "ހާލަތު ހަމައަކަށް އެޅެމުންދާކަމުގެ ނިޝާންތައް ފެންނަން ފަށައިފި" ކަމަށެވެ. ޕެޓްރޯލް ސްޓޭޝަންތަކަށް ބޭނުންވާ ތެލުގެ ސްޓޮކް މިހާރު ފޯރުކޮށްދީފައިވި ނަމަވެސް، ކިޔުތަކުން މީހުން މަދެއް ނުވެ އެވެ.
ބްރިޓިޝް މެޑިކަލް އެސޯސިއޭޝަން އަދި ރޯޔަލް ކޮލެޖް އޮފް ނާސިން އިން ބުނީ ސިއްހީ މަސައްކަތްތެރިން އޮފީހަށް ނުދެވި ތާށިވަމުންދާ މައްސަލަ ހައްލު ކުރަން "އަވަސް ފިޔަވަޅު" އަޅަން ޖެހޭ ކަމަށެވެ.
"ޕެޓްރޯލް ނުވަތަ ޑީސެލް ގަންނަން ދެ ތިން ގަޑިއިރު ކިޔުގައި ތިބުމަކީ އަޅުގަނޑުމެންނަށް އުނދަގޫ ކަމެއް،" ބީއެމްއޭގެ ޑެޕިއުޓީ ޗެއާމަން ޑޭވިޑް ވްރިގްލީ ޓައިމްސް ރޭޑިއޯ އަށް ވިދާޅުވި އެވެ.
އިނގިރޭސިވިލާތުގެ ޕަބްލިކް ސެކްޓާގެ މަސައްކަތްތެރިންގެ އެންމެ ބޮޑު ޔޫނިއަން، ޔުނިސަން އިން ވެސް ސަރުކާރަށް ގޮވާލާފައި ވަނީ އެމެޖެންސީ ފިޔަވަޅުތަކެއް އަޅައިގެން ހައްލު ހޯދުމަށެވެ.
ސަރުކާރުން ބުނެފައި ވަނީ މި ކާރިސާ ދިމާވެފައި ތެޔޮ ސަޕްލައި ކުރާ ޓޭންކަރުތައް ދުއްވާނެ ޑްރައިވަރުންގެ ދަތިކަން ދިމާވުމާއި ކުއްލިއަކަށް ތެލުގެ ޑިމާންޑު އުފުލުމުގެ ސަބަބުން ކަމަށެވެ. ނަމަވެސް ވަރަށް އަވަހަށް ހާލަތު ހަމައަކަށް އެޅޭނެ ކަމަށް ބުނެފައި ވެ އެވެ.
ޕެޓްރޯލް ސްޓޭޝަންތަކަށް ސިފައިން ފޮނުވާފައި ނުވާނެ ކަމަށް ކުރިން ބޮޑު ވަޒީރު ބޮރިސް ޖޯންސަން ވިދާޅުވި ނަމަވެސް، ހޯމަ ދުވަހުގެ ރޭ ވިދާޅުވީ އެމެޖެންސީ ހާލަތެއް މެދުވެރިވެދާނެތީ ސިފައިން ތައްޔާރަށް ތިއްބެވެ.
ޓޭންކަރު ޑްރައިވަރުންގެ ދަތިކަން ދިމާވީ އިނގިރޭސިވިލާތުން ޔޫރަޕިއަން ޔޫނިއަން (އީޔޫ) އިން ވަކިވުމުން ކަމަށް ދެކެވޭ ވާހަކަ ސަރުކާރުން ދޮގުކުރެ އެވެ. ޓްރާންސްޕޯޓް ސެކެޓްރީ ޝެޕްސް ވިދާޅުވީ ޔޫރަޕުގެ އެހެން ގައުމުތަކަށް ވެސް މި މައްސަލަ ދިމާވެގެން އުޅޭ ކަމަށެވެ.
ސަރުކާރުން މިހާރު ވަނީ ކުރިއަށް އޮތް ތިން މަހަށް އިމިގްރޭޝަން ގަވާއިދުތަކަށް ލުއި ދީފަ އެވެ. އޭގެ ބޭނުމަކީ އިނގިރޭސިވިލާތް ދޫކޮށް ދިޔަ ޔޫރަޕުގެ އެހެން ގައުމުތަކުގެޑްރައިވަރުން އަނބުރާ މަސައްކަތަށް ގެނައުމެވެ.
ނަމަވެސް ފާޑުކިޔާ ފަރާތްތަކުން ބުނަނީ އިމިގްރޭޝަން ގަވާއިދުތަކަށް ލުއި ދީގެން ހައްލެއް ނުފެންނާނެ ކަމަށެވެ. މިދިޔަ ޖެނުއަރީ މަހު އިނގިރޭސިވިލާތުން ރަސްމީކޮށް އީޔޫ އިން ވަކިވި ނަމަވެސް، އެތައް ހާސް ޓޭންކަރު ޑްރައިވަރުން އަނބުރާ ގައުމަށް ދާން ޖެހިދާނެ ކަމަށް ވިސްނާފައެއް ނުވެ އެވެ.
ގާތްގަނޑަކަށް 30،000 އެއްހާ ޓޭންކަރު ޑްރައިވަރުން އިނގިރޭސިވިލާތުން ގޮސްފައި ވާއިރު، އެ ވަޒީފާތަކަށް އެހެން މީހުން ހޯދާފައެއް ނުވެ އެވެ. މައި އިދިކޮޅު ލޭބާ ޕާޓީން ބުނީ މިކަމުން ފެންނަނީ ސަރުކާރުގެ "ނާގާބިލްކަން" ކަމަށެވެ.
