އަންނަ މަހު 1-16 އަށް މާލޭގައި ބާއްވާ އުރީދޫ ސާފް ޗެމްޕިއަންޝިޕަށް ތައްޔާރުވުމުގެ ގޮތުން ރާއްޖޭގެ ގައުމީ ޓީމު ގަތަރުގައި ކުޅުނު ދެ ވަނަ މެޗުގައި ގަތަރުގެ އާމީ ނެޝަނަލް ޓީމު އަތުން 1-1 އިން އެއްވަރުވެއްޖެ އެވެ.
ސާފް ޗެމްޕިއަންޝިޕަށް ތައްޔާރުވުމުގެ ގޮތުން ގައުމީ ޓީމުން ގަތަރުގައި ކުރިއަށް ގެންދާ ޓްރެއިނިން ކޭމްޕްގައި ކުޅުނު ދެވަނަ މެޗުގެ ފުރަތަމަ ހާފު ނިމުނީ ލަނޑެއް ނުޖެހި ދެ ޓީމު އެއްވަރުވެގެނެވެ. ފުރަތަމަ ހާފުގައި ރާއްޖެ އަށް ލަނޑު ޖަހާނެ ފުރުސަތުތަކެއް ލިބުނެވެ. އެގޮތުން، މެޗުގެ 29 ވަނަ މިނިޓުގައި އަލީ ފާސިރު (ސެންޓޭ) ހިލޭ ޖެހުމަކުން ފޮނުވާލި ހަމަލާ އަމީ ޓީމުގެ ގޯލްކީޕަރު ވަނީ ދިފާއުކޮށްފަ އެވެ. އަދި ފުރަތަމަ ހާފު ނިމެނިކޮށް، އަލީ އަޝްފާގް (ދަގަނޑޭ) ތަނަވަސްކޮށްދިން ރަނގަޅު ފުރުސަތެއްގައި އިބްރާހިމް މަހުދީ (ފޭދޫ އިއްބެ) އަށް ގޯލަށް ނުރައްކާކުރަން ލިބުނު ފުރުސަތު އެންމެ ރަނގަޅަށް ބޭނުމެއް ނުހިފުނެވެ. .
މެޗުގެ 57 ވަނަ މިނިޓުގައި ލީޑު ނެގީ އާމީ ޓީމުންނެވެ. އޭރިއާތެރެއަށް ހުރަސްވި ބޯޅަ އާމީ ޓީމުގެ ފޯވާޑް ވަނީ ބޮލުން ގޯލުގެ ތެރެއަށް ފޮނުވާލައިފަ އެވެ. ބަދަލުތަކާ އެކު ރާއްޖޭން ކުޅުން ރަނގަޅުކޮށް ފުރުސަތު ތަނަވަސްކުރަން ފެށި އެވެ.
ރާއްޖެ އަށް އެއްވަރުކޮށްދިން ގޯލު ޖެހީ ސެންޓޭ އެވެ. މެޗުގެ 68 ވަނަ މިނިޓުގައި ސެންޓޭ ވަނީ ލަނޑެއް ޖަހައި މެޗުގެ ނަތީޖާ ހަމަަހަމަކޮށްދީފަ އެވެ. ހުސެއިން ސިފާއު ޔޫސުފް (ކުރޯ) ތަނަވަސްކޮށްދިން ހުސް ފުރުސަތެއްގައި ސެންޓޭ ލަނޑު ޖެހީ ގޯލްކީޕަރު ކައިރިން ވެސް ނައްޓާލުމަށް ފަހު އެވެ.
މެޗުގެ ބާކީ އޮތް ވަގުތުގައި ވެސް ރާއްޖެ އަށް ލަނޑު ޖަހާނެ ދެ ފުރުސަތެއްވަރު ލިބުނަސް، ނަތީޖާ ބަދަލުކުރެވޭ ގޮތެއް ނުވި އެވެ. އެންމެ ރަނގަޅު ހަމަލާތަކެއް އުފެއްްދީ ބަދަލު ކުޅުންތެރިންގެ ގޮތުގައި ކުޅެން އެރި ހަސަން ރާއިފް އަހުމަދު (ހަންނަ) އާއި މުހައްމަދު އުމެއިރު އެވެ. ދެ ކުޅުންތެރިން ފޮނުވާލި ބޯޅަތައް ދިޔައީ ގޯލާ ސީދާނުވެ އެވެ.
މިއީ ގައުމީ ޓީމުގެ ހެޑް ކޯޗު އަލީ ސުޒޭން ޓީމުގެ ކޭމްޕާ ގުޅުނު ފަހުން ކުޅުނު މެޗެކެވެ. މިދިޔަ ހަފްތާގެ އަންގާރަ ދުވަހުގެރޭ ގަތަރުގެ ދެ ވަަނަ ޑިވިޝަނުގެ ލުސައިލް އެފްސީ އަތުން ރާއްޖެ 4-3 އިން މޮޅުވި މެޗުގައި ޓީމު ލީޑްކުރީ އެސިސްޓަންޓް ކޯޗު އިސްމާއިލް މަހްފޫޒް (އިންމަ) އެވެ. އޭރު ކޯޗު ސުޒޭން ޓީމާ ނުގުޅެ އެވެ. މިރޭގެ މެޗުގައި ކުޅުނު ގަތަރު އާމީ ޓީމުގައި ހިމެނެނީ އެކި ޑިިވިޝަންތަކުގައި ކުޅޭ އާމީ ޓީމުތަކުގެ ކުޅުންތެރިންނެވެ.
މިރޭގެ މެޗަށް ނިކުތް ގައުމީ ޓީމުގެ ފުރަތަމަ 11:
މުހައްމަދު ފައިސަލް (ގޯލްކީޕަރު)، އަކުރަމް އަބްދުލް ގަނީ، ސަމޫހް އަލީ (ސަމުއްޓެ)، ހުސެއިން ސިފާއު (ކުރޯ)، ހައިޝަމް ހަސަން (ބިޑި)، ހުސެއިން ނިހާން (ނިހާޓް، އަސްހަދު އަލީ (އަޑުބަރޭ)، ހަމްޒާ މުހައްމަދު (ހަމްޕު)، އިބްރާހިމް މަހުދީ (ފޭދޫ އިއްބެ)، އަލީ އަޝްފާގް (ދަގަނޑޭ)
މިއީ އަންނަ މަހުގެ 1-16 އަށް ރާއްޖޭގައި ބޭއްވުމަށް ހަމަޖެހިފައިވާ ސާފް ޗެމްޕިއަންޝިޕްގެ ކުރިން ރާއްޖޭގެ ގައުމީ ޓީމު ކުޅުނު އެކުވެރިކަމުގެ ފަހު މެޗެވެ. ގަތަރުގެ ޓްރެއިނިން ކޭމްޕް ފުރިހަމަކުރުމަށް ފަހު، ރާއްޖޭގެ ގައުމީ ޓީމު އެނބުރި މާލެ އައުމަށް ހަމަޖެހިފައިވަނީ މި މަހުގެ 27 ވަނަ ދުވަހު އެވެ.
ގައުމީ ޓީމުން މި މަހު 10 ވަނަ ދުވަހު ގަތަރު ޓްރެއިނިން ކޭމްޕަށް އައިއިރު، ސްރީލަންކާއާ ދެކޮޅަށް މެޗެއް ކުޅެން ރޭވި އެވެ. އެކަމަކު، އެ މެޗު ކުޅެން ކުރި ހުރިހާ މަސައްކަތެއް ނާކާމިޔާބުވީ ލަންކާގެ ކޮވިޑް-19 ހާލަތުގެ ސަަބަބުން އެ ޓީމަށް ގަތަރުގެ ވިސާ ހަމަނުޖެހުމުންނެވެ. ގަތަރަށް އާދެވޭ ގޮތް ނުވުމުން ލަންކާ އިން މިހާރު ވަނީ ސައުދީ އަރަބިއްޔާ އަށް ގޮސްފަ އެވެ. އެއީ ސައުދީ ފުޓްބޯޅަ ފެޑެރޭޝަނުން ހަމަޖައްސައިދިން ކޭމްޕެކެވެ.
މި ފަަހަރުގެ ސާފް ޗެމްޕިއަންޝިޕްގައި ވާދަކުރާ ގައުމުތަކަކީ ރާއްޖެ އާއި އިންޑިއާ، ބަންގްލަދޭޝް، ނޭޕާލް އަދި ސްރީލަންކާ އެވެ.
