އަންނަ މަހު 1-16 އަށް މާލޭގައި ބޭއްވުމަށް ނިންމާފައިވާ އުރީދޫ ސާފް ޗެމްޕިއަންޝިޕް ފުޓްބޯޅަ މުބާރާތަށް ގައުމީ ފުޓްބޯޅަ ޓީމުގެ އޮފިޝަލް ކިޓް ޕާޓްނަރަކަށް އައިލެންޑް އެޕެރަލްސް ހަމަޖައްސައިފި އެވެ.
މިއީ ގައުމީ ޓީމުގެ އޮފިޝަލް ކިޓް ޕާޓްނަރަކަށް ރާއްޖޭގެ ކުންފުންޏެއް ހަމަޖެއްސި ފުރަތަމަ ފަަހަރެވެ. ގައުމީ ޓީމަށް އެންމެ ފަހުން ކިޓް ފޯރުކޮށްދީފައިވަނީ ސްޕެއިނުގެ ކެލްމީ އިންނެވެ.
އެފްއޭއެމުން ނިންމީ މި ފަހަރުގެ ސާފް ޗެމްޕިއަންޝިޕްގައި ދިވެހި ވަންތަކޮށް ކުރިއަށް ދިއުމަށް ރާއްޖޭގެ ބްރޭންޑަކާ އެކު ކުރިއަށް ދިއުމަށެވެ. އެހެންވެ، އައިލެންޑް އެޕެރަލްސްއާ އެކު އެއްބަސްވުމެއް ގާއިމްކުރީ އެވެ.
ގައުމީ ޓީމުގެ އޮފިޝަލް ކިޓް ޕާޓްނަރަކަށް އައިލެންޑް އެޕެރެލްސް ހަމަޖެއްސުމަށް އެއްބަސްވުމުގައި ސޮއިކުރުން އޮތީ މިއަދު ގަލޮޅު ދަނޑުގައި ބޭއްވި ރަސްމިއްޔާތެއްގަ އެވެ. އެފްއޭއެމްގެ ފަރާތުން އެ އެސޯސިއޭޝަންގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ކޮންޓްރެކްޓްގައި ސޮއިކުރެއްވިއިރު، އައިލެންޑް އެޕަރަލްސްގެ ފަރާތުން ސޮއިކުރެއްވީ އޮޕަރޭޝަންސް މެނޭޖަރު އަލީ މުޝްހަދު އެވެ.
ސަޕޯޓަރުން ޖޯޒީ އަށް ޕްރީއޯޑާ ކުރުމުގެ ފުރުސަތު މި މަހު 25 އިން ފެށިގެން
ސާފް ޗެމްޕިއަންޝިޕްގައި ގައުމީ ފުޓްބޯޅަ ޓީމުން ބޭނުންކުރާ ޖޯޒީގެ ހުރިހާ މަސައްކަތެއް ކުރާނީ ރާއްޖޭގަ އެވެ.
އައިލެންޑް އެޕަރަލްސް އިން ބުނީ މުބާރާތުގައި ގައުމީ ޓީމު ބޭނުންކުރާ ޖޯޒީ އަށް ޕްރީއޯޑާ ކުރަން ބޭނުންވާ ފަރާތްތަކަށް މިމަހުގެ 25 ވަނަ ދުވަހުން ފެށިގެން އެ ފުރުސަތު ހުޅުވާލުމަށް ނިންމާފައިވާ ކަމަށެވެ. އަދި ޖޯޒީއަށް ޕްރީއޯޑާ ކުރަން ބޭނުންވާ ފަރާތްތަކުން 9721111 އަށް ވައިބާ ކުރުމަށް އައިލެންޑް އެޕެރަލްސް އިން ވަނީ އެދިފަ އެވެ.
ސާފް ޗެމްޕިއަންޝިޕްގައި ރާއްޖޭން ބޭނުންކުރާ ޖޯޒީ ދައްކާލުމަށް ހަމަޖެހިފައިވަނީ މި މަހުގެ 30 ވަނަ ދުވަހު ބާއްވާ ހާއްސަ އިވެންޓެއްގަ އެވެ. ގައުމީ ޓީމުގެ ޖޯޒީ ޑިޒައިންކޮށްފައިވަނީ ޢަބްދުﷲ ނަޝާތު އެވެ.
މީގެ ކުރިން ގައުމީ ޓީމުން ރާއްޖޭގައި ކުޅުނު އެކި މުބާރާތްތަކުގެ ޖޯޒީގެ ޑިމާންޑް ވަރަށް ބޮޑުވި އެވެ. އެ ގޮތުން 2008 ވަނަ އަހަރުގެ ސާފް ޗެމްޕިއަންޝިޕްގެ ޖޯޒީ އާއި 2014 ވަނަ އަހަރުގެ އޭއެފްސީ ޗެލެންޖް ކަޕްގައި ގައުމީ ޓީމުން ބޭނުންކުރި ޖޯޒީ ގިނަ ބަޔަކު ވަނީ ގަނެފަ އެވެ.
މި ފަހަރުގެ ސާފް ޗެމްޕިއަންޝިޕަކީ ރާއްޖޭން ހަމައެކަނި ހޯސްޓެއްގެ ގޮތުގައި އޮވެގެން ސާފްގެ މުބާރާތެއް ހޯސްޓްކުރާ ފުރަތަަމަ ފަހަރެވެ. ރާއްޖޭން 2008 ވަނަ އަހަރުގެ ސާފް ޗެމްޕިއަންޝިޕް ހޯސްޓްކުރީ ސްރީލަންކާއާ ގުޅިގެންނެވެ.
