މޫސުމީ ބަދަލުތަކުގެ ސަބަބުން މުޅި ދުނިޔެއަށް ކުރިމަތިވެފައިވާ ނުރައްކަލަށް ބޮޑެތި ގައުމުތައް ހޭލުމަށް ގޮވާލައްވަމުން، ރައީސް އިބްރާހިމް މުހައްމަދު ސޯލިހު މިއަދު އަސަރާ އެކު، ވަރުގަދަ އިންޒާރެއް ދުނިޔެ އަށް ދެއްވައިފި އެވެ.
އދ.ގެ 76 ވަނަ އާންމު މަޖިލީހުގައި ތަގުރީރުކުރައްވަމުން ރައީސް ސޯލިހު ވިދާޅުވީ މޫސުމަށް އަންނަ ބަދަލާ ތިމާވެއްޓަށް ލިބޭ ގެއްލުމުގެ އަގު އިންސާނިއްޔަތަށް މާބޮޑު ކަމަށާއި މިއީ އަދުގެ ދިރާސާތަކާއި އިލްމީ ހަގީގަތްތަކުގެ އިތުރުން ސައިންޓިފިކް ރައުޔު ހެކިދޭ ކަމެއް ކަމަށެވެ.
ދާދިފަހުން އައިޕީސީސީން އާންމުކުރި ރިޕޯޓަށް ހަވާލާ ދެއްވައި އެމަނިކުފާނު ވިދާޅުވި ގޮތުގައި ފާއިތުވި ފަސް އަހަރަކީ 19 ވަނަ ގަރުނުގެ މެދުތެރެއިން ފެށިގެން މިހާތަނަށް ދުނިޔެ ތަހަންމަލުކުރި އެންމެ ހޫނުގަދަ ފަސް އަހަރެވެ.
"އެ ރިޕޯޓުގައި ފާހަގަކޮށްފައިވާ ކަންކަމުގެ ތެރެއިން ކަންބޮޑުވާންޖެހޭ މާބޮޑު އެހެންކަމެއްވޭ. އެއީ ރިޕޯޓުގާ ފާހަގަކޮށްފައިވާ ކަންކަން ހައްލު ކުރުމަށް އިންސާނުންނަށް ވަގުތު ކުޑަތަންވެފައިވާކަމުގެ އިންޒާރު،" ދިވެހި ބަހުން ތަގުރީރުކުރައްވަމުން ރައީސް ވިދާޅުވި އެވެ.
އެގޮތުން، ދުނިޔެ ހޫނުވުން 1.5 ޑިގްރީ ސެލްސިއަސް ގާ ހިފެހެއްޓުމަށްޓަކާ މިހާރު ޖައްވަށް ބޭރުކުރާ ގެނދަބުޅީގެ މިންވަރު 2030 އާ ހަމައަށް 45 އިންސައްތަ ދަށްކުރަންޖެހޭއިރު، މިއަމާޒަށް ވާސިލުވެވޭނީ 2050 ގެ ނިޔަލަށް މުޅި ދުނިޔެ ނެޓްޒީރޯ ހާސިލުކޮށްގެން ކަން އެމަނިކުފާނު ފާހަގަކުރެއްވި އެވެ.
"1.5 ޑިގްރީ ސެލްސިއަސް އާއި 2 ޑިގްރީ ސެލްސިއަސްގެ ތަފާތަކީ މަރުގެ ހުކުމެއް އައުމާ ނައުމާ ދެމެދުހުރި ފަރަގު،" ރައީސް ވިދާޅުވި އެވެ.
ރައީސް އިތުރަށް ވިދާޅުވީ ބޮޑެތި ގައުމުތަކުން މިއަދު ގަބޫލުކުރަންޖެހޭ ހަގީގަތަކީ، ކުދި ޖަޒީރާތައް ނެތި ދަނީ މިއަދު އައި ތިމާވެށީގެ ސަބަބަކުން ކަމުގައިވާ ނަމަ، ބޮޑެތި ބައްރުތަކުގެ ފަހަތުން ހަމަ އެ ސަބަބު މާދަމާ އަންނާނެކަން ކަމަށެވެ.
"ދިވެއްސަކަށް ދިރިނޫޅެވި - ދިވެހިރާއްޖެއަށް ދެމިނޯވެވުނު ދުނިޔެއަކު އެހެން ގައުމަކަށް ވަކި އޮވެވޭނެ ކަމުގެ ޔަގީންކަމެއް ނޯންނާނެ،" ރައީސް ސޯލިހު ވިދާޅުވި އެވެ.
ތުއްތު ދިވެހި ޖީލުގެ އާދޭސް
އެހެން ވިދާޅުވުމާއެކު ރައީސް ސޯލިހު ވަނީ ދިވެހި ކުދިންތަކެއް އެމަނިކުފާނަށް ފޮނުވި ސިޓީތައް ނަންގަވައި، މުޅި ދުނިޔެއަށް ދައްކަވާލައްވައިފަ އެވެ.
ރައީސް ވިދާޅުވި ގޮތުގައި، މިއީ އެ ކުދިންވެސް ހެދި ބޮޑުވެ ހަޔާތުގެ އުންމީދުތައް ފުރިހަމަ ކުރަން އެދޭ ގައުމުގެ ނާޒުކު ތިމާވެއްޓާ ގުޅޭ ގޮތުން މިމަޖިލީހަށް ހުށަހަޅައިދިނުމަށް އެދި ލިޔެފައި ހުރި ސިޓީ ކަމަށެވެ.
"މިއީ ދުނިޔޭގެ ހުރިހާ ކަންކޮޅުތަކެއްގެ އަންނަންއޮތް ޖީލުގެ ނިދާ. އަޅުގަނޑުމެން އެންމެންވެސް މިއަދު މިއަޑު އަހަންޖެހޭ،" އެމަނިކުފާނު ވިދާޅުވި އެވެ.
އެމަނިކުފާނު ވިދާޅުވީ ސަލާމަތުގެ އައްސޭރި އަށް ވާސިލުވުމުގެ އުންމީދު އަދި މުޅީން ނުގެއްލޭ ކަމަށާއި، މޫސުމަށް އަންނަ ބަދަލުތަކާ ގުޅޭގޮތުން އަމަލު ކުރަމުން އަންނަ ދުވަސްވީ ސިޔާސަތުތަކަށް އިންގިލާބީ ބަދަލެއް ގެނައުން ވަރަށް މުހިންމު ކަމަށެވެ.
އެގޮތުން، ގައުމުތަކުން ބޭރުކުރާ ވިހަ މާއްދާތައް މަދުކުރުމަށް އަޅަންޖެހޭ ފިޔަވަޅުތައް ވަރުގަދަ ކުރަންޖެހޭ ކަމަށާއި، ވަކިން ހާއްސަކޮށް އިއާދަ ކުރަނިވި ހަކަތައަށް ހިޖުރަ ކުރުމަށް ކުރާ މަސައްކަތް އިތުރުކުރަންޖެހޭ ކަމަށް ވިދާޅުވި އެވެ.
