ނައިޖީރިއާގައި ފެތުރެމުންދާ ކޮލެރާ ބަލީގެ ސަބަބުން 2،300 އަށް ވުރެ ގިނަ މީހުން މަރުވެ، ގިނަ ކުޑަކުދިން ހިމެނޭ ގޮތަށް، އެތައް ހާސް ބަޔަކު އިންފެކްޓުވެއްޖެ އެވެ.
ނައިޖީރިއަކީ އެފްރިކާ ބައްރުގެ އެންމެ އާބާދީ ބޮޑު ގައުމެވެ. އިންފްރާސްޓްރަކްޗާ ނެތުމުގެ ސަބަބުން ފެނުގެ ޒަރިއްޔާއިން ފެތުރޭ ބަލިތައް ނައިޖީރިއާގައި ވަރަށް އާއްމުކޮށް ފެތުރެ އެވެ.
"ސެޕްޓެމްބަރު 5، 2021 އާ ހަމައަށް، ކޮލެރާ ކަމަށް ޝައްކު ކުރެވޭ 69،925 ކޭސް އަދި 2،323 މަރު ރިޕޯޓުކޮށްފައިވޭ،" ނައިޖީރިއާ ސެންޓާ ފޯ ޑިޒީޒް ކޮންޓްރޯލް (އެންސީޑީސީ) ގެ ވެރިޔާ ޔަހްޔާ ދިސޫ ވިދާޅުވި އެވެ.
ސިއްހީ ތަޖުރިބާކާރުން ބުނާ ގޮތުގައި މި ފަހަރު ނައިޖީރިއާގައި ކޮލެރާ ފެތުރެމުން ދަނީ އެހެން ފަހަރުތަކަށް ވުރެ ހަލުވިކޮށެވެ. އެއީ ކޮވިޑް ބަލިމަޑުކަމަށް ސަރުކާރުން ދޭ ސަމާލުކަމުގެ ސަބަބުންނެވެ.
ފެބްރުއަރީ 2020 އިން ފެށިގެން ނައިޖީރިއާގައި 200،000 އަށް ވުރެ ގިނަ މީހުންނަށް ކޮވިޑް ޖެހިފައި ވާއިރު، 2،655 މީހުން އެ ބަލީގައި މަރުވެފައި ވެ އެވެ.
ދިސޫ ވިދާޅުވީ ކޮލެރާ ކޭސްތައް ފެނިފައި ވަނީ 36 ސްޓޭޓުގެ ތެރެއިން 25 ސްޓޭޓަކާއި ވެރިރަށް އަބޫޖާ އިން ކަމަށެވެ. ބަލީގެ އަސަރު އެންމެ ބޮޑަށް ކުރަނީ އުމުރުން ފަސް އަހަރާޢި 14 އަހަރާ ދެމެދު ކުދިންނަށެވެ. ކޭސްތަކުގެ 98 ޕަސެންޓު ނިސްބަތް ވަނީ އުތުރުގެ ސްޓޭޓުތަކަށެވެ.
ދިސޫ ވިދާޅުވީ މި އަހަރު ނައިޖީރިއާގައި ކޮލެރާ ފެތުރެން ފެށީ މޫސުމީ ބަދަލާ ހެދި އާދަޔާ ހިލާފަށް ބޯކޮށް ވާރޭވެހި، ފެންބޮޑުވުމުން ކަމަށެވެ. ނައިޖީރިއާގައި ރަނގަޅު ނަރުދަމާގެ ނިޒާމެއް ނޯވެ އެވެ.
މީގެ ކުރިން 1991، 2010، 2014 އަދި 2017 ގައި ވެސް އެ ގައުމުގެ ކޮލެރާ ފެތުރުނެވެ. މި ފަހަރު ފެންނަ ކޭސްތައް ކުރީ ފަހަރުތަކަށް އިތުރުވުމުގެ ބިރު އެބަ އޮތެވެ.
ބަލި އެންމެ ބޮޑަށް ފެތުރިފައިވާ ހިސާބުތަކަށް ސިއްހީ އޮފިޝަލުންނާއި ބޭސް ފޮނުވާފައި ވާއިރު، ސަރުކާރުން ވަނީ ސާފުތާހިރުކަމާއި ރައްކާތެރިކަމާއެކު ފެން ބޭނުން ކުރާނެ ގޮތާ މެދު އާއްމުން ހޭލުންތެރި ކުރުވަން ފަށާފަ އެވެ.
ކޮލެރާއަކީ ފެނުގެ ޒަރިއްޔާއިން ފެތުރޭ ބެކެޓީރިއަލް އިންފެކްޝަނެކެވެ. ގޮހޮރަށް ބެކްޓީރިއާ ފޯރުމުން ފެންނަ އަލާމާތްތަކުގެ ތެރޭގައި ހޮޑުލުމާއި، ބޭރަށް ހިންގުން، ޑީހައިޑްރޭޓްވެ، ވަރުބަލިވުން ހިމެނެ އެވެ.
މި ބެކްޓީރިއާ ހަށިގަނޑުގައި އެކުލެވޭ މަހި، ކާބޯތަކެތީގައި ޖައްސައި، އެ ތަކެތި ކައިފި ނަމަ އިންސާނުންނަށް ބަލި ޖެހޭނެ އެވެ. އަވަސް ފަރުވާ ނުދީފި ނަމަ ކޮލެރާއަކީ މަރުވުން އެކަށީގެންވާ ބައްޔެކެވެ.
