މި ފަހަރުގެ ސާފް ޗެމްޕިއަންޝިޕަކީ ރާއްޖޭން ހޯސްޓްކުރާ ބައިނަލްއަގްވާމީ ހަތަރު ވަނަ މުބާރާތަށެވެ. އަނެއް ތިން މުބާރާތަކީ 2008 ވަނަ އަހަރުގެ ސާފް ޗެމްޕިއަންޝިޕުގެ އިތުރުން 2000 ވަނަ އަހަރުގެ ގޯލްޑަން ޖުބިލީ މުބާރާތާއި 2014 ވަނަ އަހަރުގެ އޭއެފްސީ ޗެލެންޖް ކަޕެވެ. މީގެއިން ކޮންމެ މުބާރާތެއްގައި ވެސް ޒުވާން ކުޅުންތެރިންތަކެއް ވަނީ ފެނިގެންގޮސްފަ އެވެ.
އަންނަ މަހު 1-16 އަށް ކުރިއަށްދާ އުރީދޫ ސާފް ޗެމްޕިއަންޝިޕްގައި ވެސް ޒުވާން ކުޅުންތެރިންތަކެއް ފެނިގެންދާނެ އެވެ. އޭގެ ތެރެއިން އެއް ކުޅުންތެރިއަކަށް ވުމުގެ ބޮޑު ފުރުސަތެއް އޮތީ ޒުވާން ފުލްބެކް ހައިޝަމް ހަސަން (ބިޑި) އެވެ.
އުމުރުން 22 އަހަރުގެ ހައިޝަމް ވަނީ ޒުވާން އުމުރުގައި ސީނިއާ ގައުމީ ޓީމުން ފުރުސަތު ހޯދައިފަ އެވެ. ވޯލްޑް ކަޕް ކޮލިފައިންގައި ގައުމީ ޓީމުގެ ފުރަތަމަ އެގާރައިގައި ގިނަ މެޗުތަކެއްގައި ކުޅުނު ހައިޝަމް އަކީ ކުރިއަށް އޮތް ސާފް ޗެމްޕިއަންޝިޕްގައި ވެސް ގައުމީ ޓީމުގެ މެޗުތަކުން ފެނުމުގެ ބޮޑު ފުރުސަތެއް އޮތް ކުޅުންތެރިއެކެވެ.
ސާފް ޗެމްޕިއަންޝިޕްގެ ކުރިން ގަތަރުގައި މިހާރު ކުރިއަށްދާ ގައުމީ ޓީމުގެ ޓްރެއިނިން ކޭމްޕްގެ ތެރެއިން ހައިޝަމް ބުނީ މި ފަހަރުގެ ސާފް ޗެމްޕިއަންޝިޕް އަމިއްލަ ގައުމުގައި ހޯސްޓްކުރާއިރު، މިއީ ޓީމުގައި ތިބި ޒުވާން ކުޅުންތެރިންނަށް ލިބޭ ރަނގަޅު ފުރުސަތެއް ކަމަށެވެ.
"ވަރަށް މަދު ފަހަރަކު ނޫނިއްޔާ ނުލިބޭ ރާއްޖޭގައި މުބާރާތެއް ކުޅެލަން. މިއީ ވަރަށް ރަނގަޅު ފުރުސަތެއް ކަންނޭނގެ ޒުވާން ކުޅުންތެރިންނަށް ލިބޭ،" ކްލަބް އީގަލްސްގެ ފުލްބެކް ހައިޝަމް ބުންޏެވެ.
ގަތަރު ޓްރެއިނިން ކޭމްޕްގެ ތެރެއިން ބޭއްވުނު ޕްރެކްޓިހެއްގައި ހައިޝަމް ބޯޅަ ހިފައިގެން.-- ފޮޓޯ: އަދަދު
ފަަހަކަށް އައިސް ގައުމީ ޓީމުގެ ކުޅުންތެރިންނަށް އަމިއްލަ ގައުމުގައި ތަޖުރިބާ ކޮށްލަން ނުލިބޭ ކަމަކީ ގަލޮޅު ދަނޑު ފުރިފައި އޮއްވައި މެޗުތައް ކުޅެލުމެވެ. މި ފަހަރުގެ ސާފް ޗެމްޕިއަންޝިޕްގައި އެކަން ބަދަލުވުމުގެ ފުރުސަތު އޮތްއިރު، ހައިޝަމް ވެސް ހުރީ އެ އުއްމީދުގަ އެވެ.
"ޒުވާން ކުޅުންތެރިން ކުރިއަރަން ވެސް ވަރަށް މުހިއްމު ކަމެއް ކަންނޭނގެ ވީހާވެސް ގިނަ ބަޔަކު ދަނޑަށް އައިސް ސަޕޯޓް ދިނުމަކީ،" ހައިޝަމް ބުންޏެވެ.
ފުޓްބޯޅައިގައި މަޝްހޫރު ރަށެއް ކަމަށްވާ ބ.އޭދަފުށްޓައް އުފަން ހައިޝަމް އަކީ މި ފަހަރުގެ ސާފް ޗެމްޕިއަންޝިޕަށް ފަހު 23 އަހަރުން ދަށުގެ ޓީމުގެ ކޮލިފައިން މެޗުތަކަށް ވެސް ދާނެ ކުޅުންތެރިއެކެވެ.
ހައިޝަމްގެ އިތުރުން މި ވަގުތު ސީނިއާ ޓީމުގައި ހިމެނޭ ކުޅުންތެރިންގެ ތެރެއިން 23 އަހަރުން ދަށުގެ ކޮލިފައިންގައި ވާދަކުރާ ޓީމުގައި ހިމެނެނީ ހަސަން ނަޒީމް (ޗޯޓު) އާއި ޒުވާން ކީޕަރު އަލީ ނާޖިހު (ނާޖީ) އެވެ.
ފަސް ޓީމު ވާދަކުރާ މި ފަހަރުގެ ސާފް ޗެމްޕިއަންޝިޕްގައި ފުރަތަމަ ކުޅޭނީ ލީގު ބުރެކެވެ. ރާއްޖެ ކުޅޭ ފުރަތަމަ މެޗުގައި އަންނަ މަހު އެއް ވަނަ ދުވަހުގެރޭ ނޭޕާލާ ކުޅުމަށް ފަހު ދެ ވަނަ މެޗުގައި ހަތް ވަނަ ދުވަހުގެރޭ ބަންގްލަދޭޝްއާ ބައްދަލުކުރާނެ އެވެ. ތިން ވަނަ މެޗުގައި 10 ވަނަ ދުވަހު ހަވީރު ލަންކާއާ ކުޅުމަށް ފަހު ލީގު ބުުރުގެ ފަހު މެޗުގައި އަންނަ މަހު 13 ވަނަ ދުވަހުގެރޭ ކުޅޭނީ އިންޑިއާއާ އެވެ. ލީގު ބުރަށް ފަހު އެންމެ ގިނައިން ޕޮއިންޓް ހޯދާ ދެ ޓީމެއްގެ މެދުގައި އަންނަ މަހު 16 ވަނަ ދުވަހުގެރޭ ފައިނަލް ކުޅޭނެ އެވެ.
