ޓްރެއިނިން ކޭމްޕެއްގެ އެންމެ މުހިއްމު ބޭނުމަކީ ފަރިތަކުރެވުނު މިންވަރުު ވަޒަންކޮށްލުމެވެ. އަންނަ މަހު 1-16 އަށް މާލޭގައި ކުރިއަށްދާ އުރީދޫ ސާފް ޗެމްޕިއަންޝިޕަށް ތައްޔާރުވާން ގަތަރުގައި މިހާރު ކުރިއަށްދާ ޓްރެއިނިން ކޭމްޕްގައި ގައުމީ ޓީމަށް ވަނީ ދެ ޓްރެއިނިން މެޗެއް ހަމަޖެހިފަ އެވެ. ގައުމީ ޓީމުގެ މިޑްފީލްޑަރު ހުސެއިން ނިހާން (ނިހާޓް) ވަނީ ކޮންމެ ކުޅުންތެރިއަކު ވެސް ޓްރެއިނިން މެޗުތަކުގެ ބޭނުން ހިފުމަކީ ވަރަށް މުހިއްމު ކަމެއް ކަން ފާހަގަކޮށްފަ އެވެ.
ގައުމީ ޓީމުން ގަތަރު ޓްރެއިނިން ކޭމްޕަށް އައީ މި މަހު 10 ވަނަ ދުވަހު އެވެ. ޕްރެކްޓިސް ފެށީ 11 ވަނަ ދުވަހު އެވެ. ގަތަރުގައި ޕްރެކްޓިސް ފެށިތާ 10 ދުވަސް ތެރޭ ފުރަތަމަ ޓްރެއިން މެޗުގައި މިއަދު ގައުމީ ޓީމު ނުކުންނާނީ ގަތަރުގެ ދެ ވަނަ ޑިވިޝަނުގައި ވާދަކުރަމުން އަންނަ ލުސައިލް އެފްސީއާ ދެކޮޅަށެވެ. ދެ ވަނަ މެޗުގައި އަންނަ ހޮނިހިރު ދުވަހު ބައްދަލުކުރާނީ ގަތަރުގެ އާމީ ނެޝަނަލް ޓީމާ އެވެ.
"ޓީމު ޓްރެއިނިން ކޭމްޕެއް ޖަހާފައި މި ގޮތަށް ލިބޭ ޕްރެކްޓިސް މެޗުތަކަކީ އަސްލު އަހަރެމެން މުބާރާތަކަށް ދާއިރު ވަރަށް ބޮޑު ކުރިއެރުމަކަށް ވާނެ. އެހެންވީމަ ހުރިހާ ޕްލޭޔަރުން ވެސް މި ލިބުނު މެޗުގެ ބޭނުން ހިފާނެ ކަމަށް މި ބަލަނީ،" ލުސައިލާ ދެކޮޅަށް ކުޅޭ މެޗުގެ ކުރިން އެންމެ ފަހުން ބޭއްވި ޕްރެކްޓިހަށް ފަހު ނިހާޓް ބުންޏެވެ.
ލުސެއިލް އެފްސީ މި ވަގުތު އޮތީ ދެ ވަނަ ޑިވިޝަން ޓޭބަލުގެ އަށް ޓީމުގެ ތެރެއިން ކުޅުނު ހަމައެކަނި މެޗުން މޮޅުވެގެން ހަތަރު ވަނައިގަ އެވެ. މިއީ 2019 ވަނަ އަހަރު ގަތަރުގައި ރަޖިސްޓްރީ ކުރި ކުލަބެކެވެ.
2018 ވަނަ އަހަރުގެ ސާފް ޗެމްޕިއަންޝިޕަށް ފަހު ނިހާޓް ގައުމީ ދިދަ ހިފައިގެން.
ނިހާޓަކީ 2018 ވަނަ އަހަރުގެ ސާފް ޗެމްޕިއަންޝިޕްގެ ޗެމްޕިއަންކަން ރާއްޖޭން ހޯދިއިރު، މުބާރާތުގެ ސެމީ ފައިނަލުގައި ނޭޕާލާއި ފައިނަލްގައި އިންޑިއާއާ ދެކޮޅަށް ކުޅުނު މެޗުގައި މޮޅު ކުޅުމެއް ދެއްކި ކުޅުންތެރިއެކެވެ. އޭގެ ފަހުން ގިނަ މެޗުތަކެއްގައި ގައުމީ ޓީމުގެ ފުރަތަމަ އެގާރައިގައި ކުޅުނުއިރު، މި ފަހަރުގެ ސާފް ޗެމްޕިއަންޝިޕާ މެދު ވެސް ނިހާޓް ހުރީ އުއްމީދުގަ އެވެ.
"2018 ގައި ތަށި ނަގާފައި މި ފަހަރު އަހަރެމެން ޕާފޯމް ކުރަން ލިބުނީ ސާފް ޗެމްޕިއަންޝިޕް. ދެން، ސާފް ޗެމްޕިއަންޝިޕް ޕާފޯމްކުރަން މި ލިބުނީ އަމިއްލަ ފަސްގަނޑުގައި. ހުރިހާ ޕްލޭޔަރުން (ކުޅުންތެރިން) ވެސް ދެކެނީ. ސަޕޯޓަރުން ކުރިމަތީ މުބާރާތް ކުޅެން ލިބުމަކީ އަހަރެެމެންނަށް ލިބޭނެ ވަރަށް ބޮޑު ކުރިއެރުމެއް (ފުރުސަތެއް) ކަމަށް. ޓީމުގެ ފަރާތުން މުބާރާތް ނެގުމަށް ކުރެވެން ހުރި ހުރިހާ ކަމެއް ކުރަން ތައްޔާރަށް މި ތިބީ،" މާޒިޔާ އަށް ކުޅެމުން އަންނަ މިޑްފީލްޑަރު ބުންޏެވެ.
މީގެ ކުރިން 2018 ވަަނަ އަހަރުގެ ސާފް ޗެމްޕިއަންޝިޕަށް ތައްޔާރުވާން ގަތަރުގައި ޓްރެއިނިން ކޭމްްޕް ފުރިހަމަކުރިއިރު، އެ ފަހަރު ގައުމީ ޓީމު ވަނީ ގަތަރުގެ ދެ ވަނަ ޑިވިޝަން ޓީމެއް ކަމަށްވާ އަލް-މަރްޚިޔާ ސްޕޯޓްސް ކްލަބާ ދެކޮޅަށް ކުޅެ 4-3 އިން މޮޅުވެފަ އެވެ.
މި ފަހަރުގެ ސާފް ޗެމްޕިއަންޝިޕްގައި ވާދަކުރާ ގައުމުތަކަކީ ރާއްޖެ، އިންޑިއާ، ބަންގްލަދޭޝް، ނޭޕާލް އަދި ސްރީލަންކާ އެވެ. މުބާރާތުގައި ވާދަކުރާ ފަސް ގައުމުގެ މެދުގައި ކުޅޭނީ ފުރަތަމަ ލީގު ބުރެކެވެ. އެ ތަނުން އެންމެ ގިނަ ޕޮއިންޓް ހޯދާ ދެ ޓީމެއް ފައިނަލަށް ދާނެ އެވެ.
މުބާރާތުގައި ރާއްޖެ ކުޅޭ ފުރަތަމަ މެޗުގައި އަންނަ މަހު އެއް ވަނަ ދުވަހުގެރޭ ނޭޕާލާ ކުޅުމަށް ފަހު ދެ ވަނަ މެޗުގައި ހަތް ވަނަ ދުވަހުގެރޭ ބަންގްލަދޭޝްއާ ބައްދަލުކުރާނެ އެވެ. ތިން ވަނަ މެޗުގައި 10 ވަނަ ދުވަހު ހަވީރު ލަންކާއާ ކުޅުމަށް ފަހު ލީގު ބުުރުގެ ފަހު މެޗުގައި އަންނަ މަހު 13 ވަނަ ދުވަހުގެރޭ ކުޅޭނީ އިންޑިއާއާ އެވެ.
