މެނީލާ، ފިލިޕީންސް (ސެޕްޓެމްބަރު 19) - އަންނަ އަހަރުގެ ރިޔާސީ އިންތިހާބުގައި ފިލިޕީންސްގެ ބޮކްސިން ތަރި މެނީ ޕަކިޔާއޫ 'ޕެކްމޭން' ވާދަކުރާނެކަން އިއުލާނުކޮށްފި އެވެ.
"ވަގުތު އައިސް ޖެހިއްޖެ. ލީޑާޝިޕްގެ ގޮންޖެހުމާ ކުރިމަތިލާން އަޅުގަނޑުމެން މި ތިބީ ތައްޔާރަށް،" ރައީސް ރޮޑްރިގޯ ޑުޓާޓޭއާ ވާދަވެރި ފެކްޝަންގެ ރިޔާސީ ކެންޑިޑޭޓުކަން ލިބުމުން ޕަކިޔާއޫ ވިދާޅުވި އެވެ.
ދުނިޔޭގެ އަށް ޑިވިޝަންގެ ޗެމްޕިއަންކަން ހޯދާފައިވާ ޕަކިޔާއޫ އަކީ ފިލިޕީންސްގެ ރައްޔިތުންގެ މެދުގައި ގައުމީ ބަތަލެކެވެ. އޭނާ ސިޔާސީ ދާއިރާގެ މަސައްކަތް ފެއްޓެވީ 2010 ގައި ކޮންގްރެސް އިންނެވެ.
އެއަށްފަހު މިހާރު ފުރުއްވަމުން ގެންދަވަނީ ސެނެޓުގެ ގޮނޑި އެކެވެ. އުމުރުން 42 އަހަރުގެ ޕަކިޔާއޫ ފިލިޕީންސްގައި މަގްބޫލުވެފައި ވަނީ ދީލަތި ބޭފުޅެއްގެ ގޮތުގަ އެވެ.
ކުޑައިރު އުޅެން ޖެހުނު ފަގީރުކަމުގެ ތެރެއިން އަރައިގަނެ ދުނިޔޭގެ އެންމެ ވަރުގަދަ އެއް ބޮކްސިން ލެޖެންޑުގެ ގޮތުގައި ޕަކިޔާއޫ މަޝްހޫރުވެފައި ވާތީ އޭނާއާ މެދު ރައްޔިތުން ފަހުރުވެރިވެ އެވެ.
ބެލެވޭ ގޮތުގައި ޕަކިޔާއޫގެ ރިޔާސީ ކެމްޕޭނުގެ މައިގަނޑު ވައުދުތަކުގެ ތެރޭގައި ހިމެނޭނީ ފަގީރުކަމާއި ކޮރަޕްޝަނާ ދެކޮޅަށް މަސައްކަތް ކުރުމެވެ.
"އަޅުގަނޑު މި މަގާމަށް ޝަރުތުހަމަވޭތޯ ސުވާލު ކުރާ މީހުންގެ ކިބައިން އަހާލަން ބޭނުން. ދުވަހަކު ވެސް ކާ އެއްޗެއް ނުލިބި ބަނޑުހައި ހޫނުކަން އިހުސާސް ކުރަން ޖެހުނުތަ؟،" އިދިކޮޅު ކޯލިޝަންގެ ޖަލްސާގައި އޭނާ ވިދާޅުވި އެވެ.
"ކާ އެއްޗެއް ނެތި ހުންނަން ޖެހުން، އަވައްޓެރިންގެ އަތުން ފައިސާއަށް ސަލާން ޖަހަން ޖެހުން، ކާ އެއްޗެހި ވިއްކާ ތަނެއްގައި ވާކީވާ އެތިކޮޅު ލިބޭނެކަމުގެ އިންތިޒާރު ކުރުން، މި ކަންކަން ދުވަހަކު ވެސް އިހްސާސް ކުރިންތަ؟ މިއަދު މިތަނުގައި މި ފެންނަ މެނީ ޕަކިޔާއޫ އަކީ ފަގީރުކަމުގެ ތެރެއިން ބައްޓަންވެފައި ހުރި މީހެއް."
ތަރިއެއްގެ ގޮތުގައި ޕަކިޔާއޫގެ މަގްބޫލުކަމާ ހެދި ރިޔާސީ ރޭހުގައި ކުރި ހޯދަން ފަސޭހަވާނެ އެވެ. ނަމަވސް ތަޖުރިބާކާރުން ބުނާ ގޮތުގައި ޕަކިޔާއޫ އަށް ވުރެ ބޮޑު މަގްބޫލްކަމެއް ރައީސް ޑުޓާޓޭ އަށް ރައްޔިތުންގެ މެދުގައި އޮވެ އެވެ.
ގާނޫނު އަސާސީގައިވާ ގޮތުން ފިލިޕީންސްގެ ރައީސް އަށް މަގާމުގައި ހުރެވޭނީ އެންމެ ދައުރެކެވެ. އެހެންވެ، ޑުޓާޓޭ ވަނީ އަންނަ އަހަރުގެ އިންތިހާބުގައި ނައިބު ރައީސްކަމަށް ވާދަކުރައްވާނެކަން އިއުލާނު ކުރައްވާފަ އެވެ. މި ވަގުތު ޑުޓާޓޭގެ ގާތް އެކުވެރި، ސެނެޓަރު ކްރިސްޓޮފާ ލޯރެންސް ގޯ ރައީސްކަމަށް ގެނައުމަށް ބައެއް ފެކްޝަންތަކުން ދަނީ މަސައްކަތް ކުރަމުންނެވެ.
ރައީސް ޑުޓާޓޭ އަދި ދަރިކަނބަލުން ސާރާ.
އޭގެ އިތުރުން ޑުޓާޓޭގެ ދަރިކަނބަލުން ސާރާ، ރައީސްކަމަށް ވާދަކުރެއްވުމަކީ ވެސް އެކަށީގެންވާ ކަމެއް ކަމަށް ތަޖުރިބާކާރުން ބުނެ އެވެ. ސާރާއަކީ މި ވަގުތު ޑަވާއޯ ސިޓީގެ މޭޔަރެވެ. ހިޔާލު ހޯދުމުގެ ވޯޓުތަކުން ދައްކާ ގޮތުގައި ރިޔާސީ އިންތިހާބުގައި ވާދަކުރާނެ ކަމަށް ބެލެވޭ ކެންޑިޑޭޓުންގެ ތެރެއިން އެންމެ ބޮޑު މަގްބޫލުކަމެއް އޮތީ ސާރާ އަށެވެ.
އިންތިހާބުގައި ވާދަކުރަން ބޭނުންވާ ކެންޑިޑޭޓުންނަށް އެކަން ހުށަހެޅުމަށް އޮތް ސުންގަޑިއަކީ އޮކްޓޯބަރު 8 އެވެ.
