އައްޑޫ ސިޓީގައި މިއަދު މެންދުރުގެ ވަގުތެއްގައި ވަޅިން ހަމަލާދީ ޒަހަމް ކޮށްލި މީހާ އިތުރު ފަރުވާއަށް މާލެ ގެންނަން ނިންމައިފި އެވެ.
އެ މީހާއަށް ހަމަލާ ދީފައިވަނީ މިއަދު މެންދުރުގެ ވަގުތެއްގައި، އައްޑޫ ސިޓީގެ ފްލެޓެއްގެ ތެރޭގަ އެވެ. އެ ހަމަލާގެ ރިޕޯޓް ފުލުހުންނަށް ލިބިފައިވަނީ 12:08 ހާއިރު އެވެ. ހަމަލާގައި ޒަހަމްވެފައިވަނީ އުމުރުން 29 އަހަރުގެ ފިރިހެނަކަށް ކަމަށް ފުލުހުން ބުނެ އެވެ.
އެ މީހާ މާލެ ބަދަލުކުރުމަށް ހަމަޖެހިފައިވާކަން އައްޑޫ އިކުއެޓޯރިއަލް ހޮސްޕިޓަލުގެ އޮފިޝަލަކު ވަނީ ޔަގީންކޮށްދީފަ އެވެ. އެހެންނަމަވެސް, އެ މީހާ މާލެ ބަދަލުކުރަނީ ހާލު ސީރިއަސް ވެގެން ނޫން ކަމަށް އެ އޮފިޝަލް ވިދާޅުވި އެވެ.
"އެއީ އިންޓާނަލް ބްލީޑިން ހުރެގެން ބަދަލުކުރަނީ. މިރޭގެ ވަގުތެއްގައި ވެސް ފަހަރެއްގަ ބަދަލުކުރެވިދާނެ. މޯލްޑިވިއަން އިން އަދި ވަގުތެއް ހަމަނުޖެހި އޮތީމަ ބަދަލު ނުކުރެވެނީ،" އެ އޮފިޝަލް ވިދާޅުވި އެވެ.
އެ މާރާމާރީއާ ގުޅިގެން އަދި އެއްވެސް މީހަކު ހައްޔަރުކޮށްފައެއް ނުވެ އެވެ. ހޮސްޕިޓަލުން މީގެ ކުރިން ބުނީ އެމީހާގެ ބޮލަށް ގިނަ ޒަހަމްތަކެއް ލިބިފައިވާ ކަމަށެވެ.
އައްޑޫގައި މިއަދު އިތުރު މާރާމާރީއެއް ވެސް ވަނީ ހިނގައިފަ އެވެ. އެ މާރާމާރީގައި އަންހެނަކާއި ފިރިހެނަކަށް ވަނީ އަނިޔާވެފަ އެވެ. ހޮސްޕިޓަލުން މައުލޫމާތު ދިން ގޮތުގައި އެ މާރާމާރީގައި ފިރިހެން މީހާގެ ކޮނޑަށް އަދި އަންހެން މީހާގެ އަތަށް ވަނީ ޒަހަމްތަކެއް ލިބިފަ އެވެ.
އައްޑޫގައި ހިނގި ދެ މާރާމާރީގެ އިތުރުން މިރޭ މާލޭގެ މުލިއާގެ ކައިރިންވެސް ވަނީ މީހަކަށް ހަމަލާދީ ޒަހަމްކޮށްލާފަ އެވެ. އެ ހަމަލާގައި އަނިޔާވި މީހާއަށް އައިޖީއެމްއެޗުގައި ވަނީ ފަރުވާ ދީފަ އެވެ.
