ސާފް ޗެމްޕިއަންޝިޕް ބޯމަތީގައި އޮއްވާ ބަންގްލަދޭޝް ގައުމީ ފުޓްބޯޅަ ޓީމުގެ ކޯޗުކަމުން ޖެމީ ޑޭ ވަގުތީ ގޮތުން ދުރުކޮށް އެ ގައުމުގެ ބަންޝުންދުރާ ކިންގްސްގެ ކޯޗު އަދި ދިވެހި ފުޓްބޯޅައިގައި ބޮޑެތި ކާމިޔާބީތަކެއް ހޯދާފައިވާ ސްޕެއިނުގެ އޮސްކާ ބްރުޒޮންއާ ޓީމު ހަވާލުކޮށްފި އެވެ.
ބަންގްލަދޭޝްގެ މީޑިއާތަކުން ބުނި ގޮތުގައި މި ނިންމުން ނިންމީ މިއަދު ބޭއްވި ބަންގްލަދޭޝް ފުޓްބޯޅަ ފެޑެރޭޝަނުގެ ގައުމީ ޓީމު ކޮމިޓީންނެވެ. ޑޭގެ ކޮންޓްރެކްޓުގައި ބާކީ އަހަރެއް އޮތްއިރު، އޭނާ ވަކިނުކޮށް ފެޑެރޭޝަނުން ނިންމީ އޭނާ ދެ މަސް ދުވަހަށް ގައުމީ ޓީމުގެ ޒިންމާ އިން ވީއްލާށެވެ.
އިންގްލެންޑުގެ އާސެނަލްގެ ޔޫތު ޓީމަށާއި އެ ގައުމުގެ ޔޫތު ގައުމީ ޓީމުތަކަށް ކުޅެފައިވާ ޑޭ، ބަންގްލަދޭޝްގެ ސީނިއާ ޓީމާއި 23 އަހަރުން ދަށުގެ ޓީމާ ހަވާލުވީ 2018 ވަނަ އަހަރު އެވެ. އޭނާގެ ކޯޗުކަމުގައި ބަންގްލަދޭޝް އެ އަހަރުގެ ސާފް ޗެމްޕިއަންޝިޕުގައި ވާދަކޮށް ގްރޫޕް ސްޓޭޖުން ކެޓީ އެއް ވަނަ ހޯދި ނޭޕާލާއި ދެ ވަނަ ހޯދި ޕާކިސްތާނަށް ވުރެ ފައިދާ ލަނޑު މަދުވުމުންނެވެ.
އޭނާގެ ކޯޗުކަމުގައި ހަމަ އެ އަހަރު ބަންގްލަދޭޝްގެ 23 އަހަރުން ދަށުގެ ޓީމު ވަނީ އޭޝިއަން ގޭމްސްގައި ގަތަރު ބަލިކޮށް ތައިލެންޑާ އެއްވަރުކޮށް ފުރަތަމަ ފަހަރަށް ދެ ވަނަ ބުރަށް ގޮސްފަ އެވެ. އެ ބުރުން ކެޓީ އުތުރު ކޮރެއާ އަތުންނެވެ.
ބަންގްލަދޭޝްގެ މީޑިއާތަކުން ބުނަނީ ޓީމު ގޮވައިގެން ޑޭ ތަޖުރިބާތައްކުރާތީ ފެޑެރޭޝަނުން ހިތްހަމަނުޖެހުނީ ކަމަށެވެ. އޮސްކާ އަކީ އިންޑިއާ އާއި ރާއްޖޭގައި މަސައްކަތްކޮށް ދެކުނު އޭޝިއާގެ ފުޓްބޯޅައަށް ފަރިތަ އަދި ކާމިޔާބު ވެސް ހޯދާފައިވާ ކޯޗަކަށްވާތީ އޭނާއާ އެކު ނުކުމެ ކާމިޔާބު ހޯދޭނެ ކަމަށް ފެޑެރޭޝަނުން ގަބޫލުކުރެ އެވެ.
ބަންގްލަދޭޝްގެ އާ ކޯޗު އޮސްކާ އަކީ ރާއްޖޭގެ ނިއު ރޭޑިއަންޓަށް 2017-2018 އަށް ކޯޗުކޮށްދީ ކާމިޔާބު ހޯދާފައިވާ ދިވެހި ފުޓްބޯޅައަށް ވަރަށް ފަރިތަ ކޯޗެކެވެ. އޭނާ ވަނީ ނިއު އަށް 2017 ވަނަ އަހަރުގެ ދިވެހި ޕްރިމިއާ ލީގާއި އެފްއޭ ކަޕާއި ޕްރެޒިޑެންޓްސް ކަޕް އަދި 2018 ވަނަ އަހަރުގެ މާލޭ ލީގު ކާމިޔާބުކޮށްދީފަ އެވެ. އަދި 2018 ވަނަ އަހަރުގެ އޭއެފްސީ ކަޕުގެ ގްރޫޕް ސްޓޭޖުގައި ރަނގަޅު ނަތީޖާތަކެއް ނެރުނެވެ. އެކަމަކު ފަހު މެޗުން ހައިރާންކުރުވަނިވި ގޮތަކަށް ބަލިވެ ކެޓީ އެވެ.
އޮސްކާ ވަނީ އަލީ އަޝްފާގް (ދަގަނޑޭ) އާއި މުހައްމަދު އުމެއިރާއި އަލީ ފާސިރު (ސެންޓޭ) އާއި އިމްރާން މުހައްމަދު އަދި އަކްރަމް އަބްދުލްގަނީ ހިމެނުނު ނިއުގެ އެ ޓީމު ލައްވާ ރީތި ޕާސިން ގޭމެއް ކުޅުވައިފަ އެވެ. އޭނާ ވަނީ 2017 ވަނަ އަހަރުގެ "މިހާރު" އެވޯޑްސްގެ އެންމެ މޮޅު ކޯޗުގެ މަގާމް ވެސް ހޯދައިފަ އެވެ. އޮސްކާ އެ އަހަރުގެ ވަކި ހިސާބަކުން ނިއު ދޫކޮށްލީ ބަންގްލަދޭޝްގެ ބަޝުންދުރާ އިން ބޮޑު އޮފާއެއް ލިބުމުންނެވެ. އޭރު ނިއު ވެސް އޮތީ މާލީ ގޮތުން ބަލިކަށިވެފަ އެވެ. އޮސްކާ ވަނީ ބަޝުންދުރާއަށް އެ ގައުމުގެ ލީގާއި ފެޑެރޭޝަން ކަޕް ކާމިޔާބުކޮށްދީފަ އެވެ.
ނިއުއާ ހަވާލުވުމުގެ ކުރިން އޮސްކާ ވަނީ ސްޕެނިޝް ލީގުގެ ސެލްޓާ ވީގޯގެ ޔޫތު ޓީމުގެ ކޯޗުކަމާއި ސްޕެނިޝް ދެ ވަނަ ޑިވިޝަނުގެ މަޔޯކާގެ އެސިސްޓަންޓް ކޯޗުކުކަންކޮށްފަ އެވެ. އަދި އިންޑިއާގެ އައި ލީގުގެ ސްޕޯޓިން ކްލަބް ޑި ގޯއާގެ ކޯޗުކަމާއި އިންޑިއަން ސުޕަ ލީގުގެ މުމްބާއީ ސިޓީ އެފްސީގެ އެސިސްޓަންޓް ކޯޗުކަންކުރި އެވެ. އޭރު އެ ޓީމުގެ ކޯޗަކީ ފްރާންސުގެ ކުރީގެ މަޝްހޫރު ފޯވާޑް ނިކްލަސް އަނެލްކާ އެވެ.
އޮސްކާ ވަނީ ދާދި ފަހުން އޭއެފްސީ ކަޕް ގްރޫޕް ސްޓޭޖުގައި ކުޅެން ބަޝުންދުރާ ގޮވައިގެން ރާއްޖެ އައިސްފަ އެވެ. އެ ޓީމު ދިޔައީ ތިން ވަނަ އަށެވެ.
އަންނަ މަހު 1 ވަނަ ދުވަހު މާލޭގައި ފަށާ މުބާރާތުގައި ވާދަކުރަނީ ރާއްޖެ އާއި ބަންގްލަދޭޝްގެ އިތުރުން އިންޑިއާ އާއި ނޭޕާލާއި ސްރީ ލަންކާ އެވެ. ބަންގްލަދޭޝް އިން ވަނީ މުބާރާތް އެއް ފަހަރު ހޯދައިފަ އެވެ. އެއީ އަމިއްލަ ގައުމުގައި 2003 ގައި ބޭއްވި މުބާރާތުގައި ޕެނަލްޓީ ޖަހައިގެން ރާއްޖެ ބަލިކޮށްގެންނެވެ.
