ކްރިކެޓް ބޯޑް އޮފް މޯލްޑިވްސް (ސީބީއެމް)ގެ އަހަރީ އާންމު ޖަލްސާ މާދަމާ ބާއްވަން ނިންމާފައިވާ ކަމަށް އެ ބޯޑުން ބުނެފި އެވެ.
ސީބީއެމް އިން ބުނީ އަހަރީ އާންމު ޖަލްސާ ތާވަލުކޮށްފައިވަނީ މާދަމާ ހަވީރު ހަތަރެއް ޖަހާއިރު ސޯޝަލް ސެންޓަރު ސެމީނާ ރޫމުގައި ކުރިއަށްގެންދާ ގޮތަށެވެ.
އެހެން އަހަރުތަކެކޭ ވެސް އެއްގޮތަށް އާންމު ޖަލްސާގައި ކުރިއަށްދާނީ އަހަރީ ބަޖެޓް ފާސްކުރުމާއި ކަލަންޑަރު ފާސްކުރުމުގެ އިތުރުން އެސޯސިއޭޝަންގެ ރިޕޯޓް މެމްބަރު ކްލަބްތަކަށް އިއްވުމުގެ އިތުރުން ދެން އެސޯސިއޭޝަނުގެ ހިންގުމުގެ ކަންތައްތަކާ ބެހޭ ނިންމުންތަކެވެ.
ކްރިކެޓް ބޯޑުގެ ލީޑަޝިޕްގައި މިހާރު ހުންނެވީ ކުރިން އެ ބޯޑްގެ ނައިބް ރައީސްކަމާއި ޖެނެރަލް ސެކްރެޓަރީކަން ކުރެއްވި މުހައްމަދު ފައިސަލް އެވެ. ފައިސަލް ރައީސަކަށް އިންތިހާބުވެވަޑައިގަތީ މިދިޔަ އަހަރުގެ ސެޕްޓެމްބަރު މަހު ބޭއްވި އިންތިހާބު ކާމިޔާބު ކުރެއްވުމަށް ފަހު އެވެ.
ފައިސަލްގެ ލީޑަޝިޕުން ދުރުރާސްތާ އާއި ކައިރި މުސްތަގުބަލުގައި ހާސިލްކުރަން ބޭނުންވާ ކަންތައްތައް ކުރަން ވަނީ ޕްލޭނެއް އެކުލަވާލައިފަ އެވެ. އޭގެ ތެރެއިން އެއް މަސައްކަތެއްގެ ގޮތުގައި ބޯޑުގެ ގިނަ ކަންކަން ޑިޖިޓަލްކޮށް ކުރިއަށް ގެންދިއުމުގެ ގޮތުން "މޯލްޑިވްސް ކްރިކެޓް އެޕް" ވަނީ ލޯންޗްކޮށްފަ އެވެ.
މިދިޔަ އަހަރެއްހާ ދުވަހު ކޮވިޑް-19 އިން ރައްކާތެރިވުމުގެ ގޮތުން ގިނަ އެސޯސިއޭޝަންތަކެއްގެ ހަރަކާތްތައް ހުއްޓިފައިވާއިރު، ކްރިކެޓަށް ވެސް އޭގެ ދަތިތައް ވަނީ ކުރިމަތިވެފަ އެވެ. އެކަމަކު، ފަހަކަށް އައިސް ކްރިކެޓްގެ ހަރަކާތްތައް ކޮންމެ ވެސް ވަރަކަށް ވަނީ ކުރިއަށް ގެންގޮސްފަ އެވެ.
ކްރިކެޓުގެ ޓީ20 ވޯލްޑް ކަޕް ކޮލިފައިންގައި އަންނަ މަހު ކުޅޭ މެޗުތަކަށް ތައްޔާރުވާން ގައުމީ ކްރިކެޓް ޓީމުން އަންނަނީ ޕްރެކްޓިސް ކުރަމުންނެވެ.
ކޮލިފައިން މެޗުތަކަށް ތައްޔާރުވުމުގެ ގޮތުން ގައުމީ ކްރިކެޓް ޓީމުން އިންޑިއާގެ ކްލަބަކާ ދެކޮޅަށް މެޗުތަކެއް ކުޅެން އަންނަނީ މަސައްކަތް ކުރަމުންނެވެ. ކޮލިފައިންގައި ރާއްޖެ ކުޅެން ހަމަޖެހިފައިވަނީ ސައުދީ އަރަބިއްޔާ، ގަތަރު، ބަހްރެއިން އަދި ކުވެއިތާ ދެކޮޅަށެވެ.
