މިލާން (ސެޕްޓެމްބަރު 14) - ޔުއެފާ ޗެމްޕިއަންސް ލީގުގައި މާދަމާ ރޭ ލިވަޕޫލާ ދެކޮޅަށް ކުޅޭ މެޗުގައި އޭސީ މިލާންގެ ތަޖުރިބާކާރު ފޯވާޑް ޒްލަޓާން އިބްރަހިމޮވިޗަށް ނުކުޅެވޭނެ ކަމަށް އެ ކްލަބުން ބުނެފި އެވެ.
އުމުރުން 39 އަހަރުގެ އިބްރަހިމޮވިޗް ވަނީ މި ހަފްތާގައި މިލާނުން 2-0 އިން ލާޒިއޯ ބަލިކުރި މެޗުގައި ގޯލު ޖަހައިފަ އެވެ. މި ގޯލާ އެކު އިބްރަހިމޮވިޗް ވަނީ ފާއިތުވި 24 އަހަރު އޭނާ ކުޅުނު ކޮންމެ ކްލަބެއް ވާދަކުރާ ލީގުގައި ގޯލެއް ޖަހައިފަ އެވެ. އިބްރަހިމޮވިޗަށް ލިވަޕޫލް ދަނޑުގައި ކުޅޭ މެޗު ގެއްލުނީ ފައިގެ ފުއްނާބަށް ލިބުނު އަނިޔާއެއްގެ ސަބަބުންނެވެ.
"އެ މެޗު (ލާޒިއޯ މެޗަށް) ފަހު އިބްރަހިމޮވިޗް ފަޔަށް ކޮންމެ ވެސް ވަރެއްގެ އަނިޔާއެއްވި. އަހަރެމެން ހީކުރީ މި މެޗަށް (ލިވަޕޫލް މެޗަށް) ރަނގަޅުވާނެ ކަމަށް. އެކަމަކު އަދިވެސް އިބްރަހިމޮވިޗް އުޅެނީ ތަދުވާތީ. އެހެންވެ އޭނާ ރިސްކު ނުކުރަން މެޗުގައި ނުކުޅުވަން ނިންމީ،" އޭސީ މިލާންގެ ކޯޗު ސްޓެފާނޯ ޕިއޯލީ ބުނެފި އެވެ.
ލިވަޕޫލްގެ ކޯޗު ޔާގެން ކްލޮޕް ވެސް ވަނީ އިބްރަހިމޮވިޗަށް ތައުރީފްކޮށް ވާހަަކަ ދައްކައިފަ އެވެ.
ޔޫރަޕްގެ ޗެމްޕިއަންކަން ހަތް ފަހަރު ހޯދާފައިވާ މިލާނުން މި ފަހަރު ޗެމްޕިއަންސް ލީގުގައި މި ވާދަކުރަނީ 2014 ވަނަ އަހަރުގެ ފަހުން ފުރަތަމަ ފަހަރަށެވެ. މި ފަހަރުގެ ސީޒަނުގައި އިޓާލިއަން ލީގުގައި މިހާތަނަށް ކުޅުނު ތިން މެޗުން ވެސް މިލާން އޮތީ މޮޅުވެފަ އެވެ.
ކްލޮޕް ބުނީ އޭނާގެ ޓީމުން މި ފަހަރު މި ނުކުންނަން ޖެހެނީ ފާއިތުވި އަހަރުތަކަށް ބަލާއިރު މިލާނުގެ އެންމެ ވަރުގަދަ ޓީމާ ދެކޮޅަށް ކަމަށެވެ. އަދި ލިވަޕޫލާއި މިލާނަކީ ޗެމްޕިއަންސް ލީގުގައި ވަރަށް ރަނގަޅު ތާރީހެއް އޮތް ދެ ކްލަބް ކަމަށްވާއިރު، ގިނަ ބަޔެއްގެ ޝައުގުވެރިކަން މި މެޗަށް ހުއްޓޭނެ ކަމަށް ކްލޮޕް ބުނެފައިވެ އެވެ.
"ޗެމްޕިއަންސް ލީގުގައި މި ފަހަރު ވަރަށް ރަނގަޅު މެޗުތަކެއް ގްރޫޕް ސްޓޭޖުގައި ވެސް އެބައޮތް. އޭގެއިން އެއް މެޗު މިއީ (ލިވަޕޫލާއި މިލާން)ގެ މެޗަކީ،" ކްލޮޕް ބުންޏެވެ.
ލިވަޕޫލާއި މިލާންގެ އިތުރުން ދެން އެ ގްރޫޕްގައި އޮތީ ސްޕެއިނުގެ އެތުލެޓިކޯ މެޑްރިޑާއި ޕޯޗުގަލްގެ ޕޯޓޯ އެވެ.
ކްލޮޕް ބުނީ ލިވަޕޫލަށް މި ފަހަރުގެ ޗެމްޕިއަންސް ލީގުގެ ގްރޫޕް ސްޓޭޖާ ހަމައިން ވެސް އޮތީ އާންމުކޮށް ނޮކައުޓް ބުރުގައި ޖެހޭ ލެވަލްގެ މެޗުތަކެއް ކަމަށާއި އެހެން ކަމުން އެއްވެސް މެޗެއްގެ އެއްވެސް ވަގުތެއްގައި ގޯހެއް ހެދިގެން ނުވާނެ ކަމަށެެވެ.
ލިވަޕޫލާއި މިލާން ކުޅޭ މެޗު ފަށާނީ މާދަމާރޭ ރާއްޖެ ގަޑިން 12 ޖަހާއިރު އެވެ.
