އ.ދ ގެ އާއްމު މަޖިލީހުގެ 76 ވަނަ ސެޝަންގެ ރިޔާސަތާ މިރޭ ދިވެހިރާއްޖޭގެ ފޮރިން މިނިސްޓަރު އަބްދުﷲ ޝާހިދު ހަވާލުވެވަޑައިގަންނަވާނެ އެވެ.
ފޮރިން މިނިސްޓްރީން ބުނީ ޝާހިދު ޒިންމާއާ ރަސްމީކޮށް ހަވާލުވެވަޑައިގަންނަވާނީ މިހާރު ކުރިއަށްދާ 75 ވަނަ ސެޝަންގެ އެންމެ ފަހު ދަންފަޅި މިރޭ ރާއްޖެ ގަޑިން މެންދަމުގެ ވަގުތެއްގައި ނިމުމާ އެކު ކަމަށެވެ.
"އެއާ އެކު އާއްމު މަޖިލީހުގެ 76 ވަނަ ސެޝަން ފަށައި، ރިޔާސަތާ މިނިސްޓަރު ޝާހިދު ހަވާލުވެވަޑައިގަންނަވާނެ އެވެ،" މިނިސްޓްރީން ބުންޏެވެ.
ރިޔާސަތާ ހަވާލުވާން މިދިޔަ މަހުގެ 29 ގައި އެމެރިކާ އަށް ވަޑައިގެންނެވި ޝާހިދު ރިޔާސަތާ ހަވާލުވެވަޑައިގަތުމަށްފަހު މިރޭ ތަގުރީރެއް ދެއްވާނެ އެވެ.
އދ.ގެ 76 ވަނަ އާންމު މަޖިލިހުގެ ރިޔާސަތަށް ޝާހިދު ހޮވިވަޑައިގެންނެވީ، މިދިޔަ ޖޫން މަހު ނެގި ވޯޓުގައި އދ. ގެ މެމްބަރު 193 ގައުމުގެ ތެރެއިން 143 ގައުމުގެ ތާއީދާ އެކުގަ އެވެ.
މަގާމާ ހަވާލުވެވަޑައިގެންނެވުމުގެ ކުރިން ޝާހިދު ވަނީ އެ މަގާމުގެ ހައިސިއްޔަތުން ކުރައްވާ ރަސްމީ ދަތުރުފުޅުތަކުގެ ފުރަތަމަ މަންޒިލަކަށް އަވަށްޓެރި އިންޑިއާއަށް ވެސް ވަޑައިގެންފަ އެވެ.
އާންމު މަޖިލީހުގެ އާ ދައުރާއެކު ޝާހިދު ރިޔާސަތާ ހަވާލުވެވަޑައިގަންނަވާއިރު، ގިނަ ވަގުތު އޭނާ އެމެރިކާގައި ހުންނަވަން ޖެހިވަޑައިގަންނަވާނެކަމަށް މިނިސްޓްރީން ބުނެ އެވެ.
އދ. އާއްމު މަޖިލީހުގެ ރައީސުން އިންތިހާބު ކުރަނީ ދައުރުވާ އުސޫލުންނެވެ. މިގޮތުން އިންތިހާބުކުރަނީ ކޮންމެ އަހަރަކުވެސް އެފްރިކާ، އޭޝިއާ ޕެސިފިކް، އިރުމަތީ ޔޫރަޕު، ލެޓިން އެމެރިކާ، ކެރީބިއަންގެ އިތުރުން ހުޅަނގު ޔޫރަޕުގެ ގައުމުތަކުގެ ބޭފުޅެކެވެ. މިފަހަރު ފުރުސަތު ލިބުނީ އޭޝިއާ ޕެސިފިކް ގައުމުތަކަށެވެ. މި ސަރަހައްދަށް ބަލާއިރު، މީގެ ކުރިން އިންޑިއާ، ސްރީލަންކާ، ބަންގްލަދޭޝްގެ އިތުރުން އަފްގާނިސްތާނުން ވަނީ އދ. ގެ އާއްމު މަޖިލީހުގެ ރައީސްކަން ކޮށްފަ އެވެ.
މިއީ ބައިނަލްއަގުވާމީ މައިދާނުގައި ރާއްޖެއަށް ހޯދުނު އެންމެ ބޮޑު ކާމިޔާބީ އެވެ.
ގާނޫނު ހަދާ މަޖިލީހެއް ހިންގާ އުސޫލުން އދ. ގެ އާއްމު މަޖިލީހުގެ ޖަލްސާތަކުގެ ރިޔާސަތު ބެލެހެއްޓުމުގެ އިތުރުން، ބަހުސްތަކުގައި މެމްބަރު ގައުމުތަކަށް ވަގުތު ކަނޑައެޅުމާއި، ނިޒާމީ މައްސަލަތަކުގައި ގޮތް ނިންމުމުގެ ބާރު ވެސް ރައީސަށް ލިބިގެންވެ އެވެ. އަދި އާއްމު މަޖިލީހަށް ހުށަހެޅޭ މައްސަލަތަކުގެ އެޖެންޑާ ކަނޑައެޅުމުގެ ޒިންމާ ވެސް އުފުލަންޖެހޭނީ އެ މަޖިލީހެއްގެ ރައީސަށެވެ.
