ނިއު ޔޯކް، ޔުނައިޓެޑް ސްޓޭޓްސް (ސެޕްޓެމްބަރު 9) - އަރަމުން އަންނަ އިނގިރޭސި އަންހެން ޓެނިސް ތަރި އުމުރުން 18 އަހަރުގެ އެމާ ރަޑުކާނީ، އެންމެ ސެޓެއް ވެސް ނުގެއްލި މިހާރު ކުރިއަށްދާ ޔޫއެސް އޯޕަން ޓެނިސް މުބާރާތުގެ ސެމީ ފައިނަލުން ފުރުސަތު ހޯދައިފި އެވެ.
ދާދި ފަހުން އޭ ލެވަލް ޓެސްޓްތައް ހަދައި ހިސާބާއި އިކޮނޮމިކްސް އިން މަތީ މާކްސް ހޯދި އެމާ ޕްރޮފެޝަނަލް ޓެނިހަށް ފުރަތަމަ ފަހަަރަށް ނުކުމެ ޓެނިހުގެ ގްރޭންޑް ސްލޭމް މުބާރާތެއްގައި އަލަށް ވާދަކޮށް ވިމްބަލްޑަންގައި ތަފާތު ދެއްކި އެވެ. އެކަމަކު، ވިމްބަލްޑަންގެ ގަދަ 16 ކުޅުންތެރިންގެ ބުރުގެ މެޗުގެ ތެރެއިން އެމާ އަށް ނޭވާލާން އުނދަގޫ ވެގެން މެޗު ދޫކޮށްލަން ޖެހުނެވެ. ޕްރެޝަރުގައި އެމާ އަށް ޓެނިސް ކުޅެވިދާނެތޯ ސުވާލު އުފެއްދި މީހުންނަށް އެމާ އަންނަނީ މި ފަހަރު ޔޫއެސް އޯޕަންގައި ޖަވާބު ދެމުންނެވެ.
ޔޫއެސް އޯޕަންގައި މިހާތަނަށް ކުޅުނު ކޮލިފައިން ތިން މެޗާއި މެއިން ޑްރޯގެ ތިން މެޗުން ސެޓެއް ވެސް ގެއްލުވާނުލައި ހުރިހާ މެޗަކުން އެމާ ވަނީ މޮޅުވެފަ އެވެ. ރޭގެ ކުއާޓާ ފައިނަލް މެޗުން އެމާ ވަނީ މިދިޔަ މަހު އޮލިމްޕިކްގެ އަންހެން ސިންގަލްސް އިން ރަން މެޑަލް ހޯދި ސްވިޒަލެންޑްގެ ބެލިންޑާ ބެންޗިޗް ބަލިކޮށްފަ އެވެ. އެމާ ސެޓުތައް ގެންދިޔައީ 6-3 6-4 އިންނެވެ.
މި މޮޅާ އެކު އެމާ އަށް ޓެނިހުގެ ރޭންކިންގެ ގަދަ 50 ގެ ޖާގައެއް ކަށަވަރުވީ އެވެ. އޭނާ މި ފަހަރުގެ ޔޫއެސް އޯޕަން އަށް ނުކުތްއިރު އޮތީ 150 ވަނަ މަގާމުގަ އެވެ. ގަދަ 50 ޖާގަ ލިބުމާ އެކު އެމާ އަކީ އިނގިރޭސި އަންހެން ކުޅުންތެރިންނަށް ބަލާއިރު އެންމެ ރޭންކިން ރަނގަޅު ކުޅުންތެރިޔާ އެވެ.
އަންނަ ބުރާސްފަތި ދުވަހު ކުޅޭ ސެމީ ފައިނަލްގައި އެމާ ބައްދަލުކުރާނީ ޗެކް ރިޕަބްލިކްގެ ކެރޮލީނާ ޕްލިސްކޯވާ ނޫނީ ގްރީސްގެ މާރިއާ ސަކާރީ ތެރެއިން ކުޅުންތެރިއަކާ އެވެ. އެ މެޗުން އެމާ މޮޅުވެއްޖެނަމަ އޭނާ ވެގެންދާނީ ގްރޭންޑް ސްލޭމްގެ ތާރީހުގައި ކޮލިފައިން ބުރުން ގޮސް މުބާރާތުގެ ފައިނަލުގައި ކުޅޭ ފުރަތަމަ އަންހެން ކުޅުންތެރިޔާ އަށެވެ.
އެމާ އަކީ 2005 ވަނަ އަހަރަށް ފަހު ޔޫއެސް އޯޕަން ސެމީ ފައިނަލުން ފެންނާނެ އެންމެ ޒުވާން އަންހެން ކުޅުންތެރިޔާ އެވެ. މީގެ ކުރިން އެ ރެކޯޑް އޮތީ ރަޝިއާގެ ކުޅުންތެރިޔާ މާރިއާ ޝަރަޕޯވާ އަތުގަ އެވެ. ޔޫއެސް އޯޕަންގެ އަންހެން ސިންގަލްސްގެ އަނެއް ސެމީގައި ކެނަޑާ އަށް އުފަން 19 އަހަރުގެ ލޭލާ ފެނާންޑޭޒް ބައްދަލުކުރާނީ ބެލަރޫސްގެ އަރީނާ ސަބަލެންކާއާ އެވެ.
މި ފަަހަރުގެ ޔޫއެސް އޯޕަން އެމާ އަށް ކާމިޔާބު ކުރެވިއްޖެނަމަ އެމާ ވެގެންދާނީ 1977 ވަނަ އަހަރަށް ފަހު ގްރޭންޑް ސްލޭމް ތައްޓެއް ކާމިޔާބުކުރާ އިނގިރޭސި ފުރަތަމަ އަންހެން ކުޅުންތެރިޔާ އަށެވެ. އަދި 1968 ވަނަ އަހަރަށް ފަހު ޔޫއެސް އޯޕަން ކާމިޔާބުކުރާ އިނގިރޭސި ފުރަތަމަ އަންހެން ކުޅުންތެރިޔާ އަށެވެ.
