ޔަންގޯން، މިޔަންމާ (ސެޕްޓެމްބަރު 8) - މިޔަންމާގައި ހިންގާފައިވާ ބަގާވާތާ ދެކޮޅަށް "ދިފާއީ ހަނގުރާމައެއް" ފެށުމަށް ހިޔަނި ސަރުކާރުން ގޮވާލުމުން އާއްމުން ނުކުމެ ސިފައިން ހިންގާ މުވާސަލާތީ ޓަވަރުތަކަށް ގެއްލުން ދީފި އެވެ.
މިޔަންމާ ސިފައިން ބަގާވާތްކޮށް ވެރިކަމަށް އައީ މިދިޔަ ފެބްރުއަރީ މަހު އެވެ. އެއާއެކު ޑިމޮކްރަސީ އިއާދަކުރުމަށް ގޮވާލާ ބޮޑެތި މުޒާހަރާތައް ދަނީ ކުރަމުންނެވެ. އަދި ބޯޑަރު ސަރަހައްދުގައި ސިފައިންނާއި ހަނގުރާމަވެރި ގްރޫޕުތަކާ ދެމެދު ދަނީ ހަމަލާ ބަދަލުކުރަމުންނެވެ.
ހަމަނުޖެހުންތަކުގައި 1،000 އަށް ވުރެ ގިނަ ރައްޔިތުން މަރުވެފައި ވާއިރު، 8،000 އަށް ވުރެ ގިނަ މީހުން ވަނީ ޖަލުތަކުގައި ބަންދުކޮށްފަ އެވެ.
މުޒާހަރާގެ ބައިވެރިން ބުނީ ސިފައިން ހިންގާ މައިޓެލް ކުންފުނީގެ 11 މޮބައިލް ފޯން ޓަވަރަށް ގެއްލުން ދިން ކަމަށެވެ. މައިޓެލް އާއެކު ހަތަރު ކުންފުުންޏަކުން މިޔަންމާގައި މޮބައިލް ފޯނުގެ ހިދުމަތް ދެ އެވެ.
"ބޭނުމަކީ ސިފައިންގެ ވިޔަފާރިތަކަށް ގެއްލުން ދިނުން. ސިފައިންނަށް ބަގާވާތުގެ ވެރިކަމުގައި ތިބެވެނީ ވިޔަފާރިން ފައިދާ ލިބޭތީ. އެހެންވީމާ ވިޔަފާރިތަކަށް ގެއްލުން ދޭން ޖެހޭ،" މުޒާހަރާގެ ބައިވެރިއަކު އޭއެފްޕީ އަށް ބުންޏެވެ.
މިޔަންމާގެ މީޑިއާތަކުން އާއްމުކުރި ވީޑިއޯއަކުން ފެންނަނީ ފޯނު ޓަވަރެއްގެ ތިރީގައި ބޮޑު ގޮވުމެއް ގޮވާ މަންޒަރެވެ.
