ކާބުލް، އަފްގާނިސްތާން (ސެޕްޓެމްބަރު 7) - ޕާކިސްތާނާ ދެކޮޅަށް އަފްގާން ރައްޔިތުން ކާބުލްގައި ބޭއްވި މުޒާހަރާއެއް ރޫޅާލުން ތާލިބާނުން ވައިގެ ތެރެއަށް ބަޑި ޖަހައިފި އެވެ.
މިދިޔަ މަހު ވެރިކަމަށް އައި ތާލިބާނުން އަދިވެސް ސަރުކާރެއް އުފައްދާފައެއް ނުވެ އެވެ. ނަމަވެސް ތާލިބާނުންނާ ދެކޮޅަށް ކާބުލް އާއި ހިރާތު އަދި މަޒަރީ ޝަރީފުގެ ރައްޔިތުން މިހާރު ވެސް ދަނީ މުޒާހަރާތައް ބާއްވަމުންނެވެ.
މީގެ ކުރިން 1996 އިން 2001 އަށް ތާލިބާނުން ވެރިކަން ކުރިއިރު ގެންގުޅުނު ހަރުކަށި ގޮތްތައް ބަލައިނުގަންނާނެ ކަމަށް މުޒާހަރާ ކުރާ މީހުން ބުނެ އެވެ.
އަންގާރަ ދުވަހު ކާބުލްގައި ހުންނަ ޕާކިސްތާން އެމްބަސީ ކައިރިއަށް 70 ވަރަކަށް މީހުން ޖަމާވިއިރު، އޭގެ ތެރޭގައި ގިނައީ އަންހެނުންނެވެ. އެ މީހުން އަޑު އުފުލަމުން ދިޔެއީ އަފްގާނިސްތާނުގެ ދާހިލީ ކަންކަމަށް ޕާކިސްތާނުން ނުފޫޒު ފޯރުވަމުންދާ ކަމަށެވެ.
ޕާކިސްތާނުގެ ޖާސޫސީ ވެރިޔާ ފާއިޒް ހަމީދު ފާއިތުވި ހަފުތާ ބަންދުގައި ހުންނެވީ ކާބުލްގަ އެވެ. އެއީ ޕާކިސްތާން ސަފީރާ ބައްދަލު ކުރުމަށް ކުރެއްވި ދަތުރެއް ކަމަށް ބުނި ނަމަވެސް، ތާލިބާނުންނާ ބައްދަލުކުރި ކަމަށް ވަނީ އަޑުތައް ފެތުރިފަ އެވެ.
މުޒާހަރާ ރޫޅާލުމަށް ތާލިބާން ހަނގުރާމަވެރިން ވައިގެ ތެރެއަށް ބަޑި ޖެހި މަންޒަރު އޭއެފްޕީގެ ނޫސްވެރިންނަށް ވަނީ ފެނިފަ އެވެ.
ހޯމަ ދުވަހު ވެސް މަޒަރީ ޝަރީފްގެ އަންހެނުންތަކެއް ވަނީ ހައްގުތަކަށް ގޮވާލާ އެއްވެފަ އެވެ. އޭގެ ކުރިން މިދިޔަ ހަފުތާގައި ހިރާތުގެ އަންހެނުން ވެސް މުޒާހަރާ ކުރި އެވެ. އެ މީހުންގެ އެންމެ ބޮޑު އެއް ޑިމާންޑަކީ އާ ސަރުކާރު އުފެއްދުމުގައި އަންހެނުން ވެސް ބައިވެރިކުރުވުމެވެ.
