ނިއު ޔޯކް، ޔުނައިޓެޑް ސްޓޭޓްސް (ސެޕްޓެމްބަރު 7) - މި ފަހަރުގެ ޔޫއެސް އޯޕަން ޓެނިސް މުބާރާތުގައި އާދަޔާހިލާފު ނަތީޖާތަކެއް ނުކުންނައިރު، މި ވަގުތު އެންމެ ވަރުގަދަ އަށް ދެކެވެނީ ސްޕެއިނުގެ 18 އަހަރުގެ ކުޅުންތެރިޔާ ކާލޯސް އަލްކަރާޒްގެ ވާހަކަ އެވެ.
އޭނާ އަކީ 1989 ވަނަ އަހަރަށް ފަހު ޓެނިހުގެ ގްރޭންޑް ސްލޭމް މުބާރާތެއްގެ ކުއާޓާ ފައިނަލުން ފުރުސަތު ހޯދި އެންމެ ޒުވާން ކުޅުންތެރިޔާ އެވެ. މާނަ އަކީ އޭނާ ހާސިލް އެކުރި ކަމަކީ އެކާވީސް ވަނަ ގަރުނުގައި ޓެނިހުގެ ރަސްކަން ކުރަމުން އަންނަ ސްވިޒަލެންޑްގެ ރޮޖާ ފެޑެރާ އާއި ސްޕެއިނުގެ ރަފައެލް ނަޑާލް އަދި ސާބިއާގެ ނޮވަކް ޖޮކޮވިޗަށް ނުވެ އޮތް ކަމެކެވެ.
ނަޑާލް، 35، އާއި ފެޑެރާ، 40، އަށް ތަކުރާރުކޮށް ކުރިމަތިވަމުން އަންނަ އަނިޔާގެ މައްސަލަތަކާ ހުރެ މިދިޔަ ދެ އަހަރެއްހާ ދުވަހު ވެސް ގިނަ މުބާރާތްތަކެއް ވަނީ ގެއްލިފަ އެވެ. ޖޮކޮވިޗް، 34، ވެސް ކެރިއަރުގެ އެންމެ ޕީކުގައި ދެން ގިނަ އަހަރުތަކެއް ވަންދެން ކުޅެވިދާނެތޯ ޓެނިހުގެ ތަޖުރިބާކާރުން ސުވާލު އުފައްދަ އެވެ. ޓެނިހުގައި ކުރިއަރާނެ އާ ކުޅުންތެރިންތަކެއް ކައިރި މުސްތަގުބަލެއްގައި ފެންނާނެ ކަމަށް ބަލައިގެން ހުއްޓައި އަލްކަރާޒް މި ވަނީ އުއްމީދެއް ހޯދައިދީފަ އެވެ.
ޔޫއެސް އޯޕަން މެޗެއްގެ ތެރެއިން އަލްކަރާޒް.-- ފޮޓޯ: އޭއެފްޕީ
ޔޫއެސް އޯޕަންގެ ކުއާޓާ ފައިނަލުން އަލްކަރާޒް ފުރުސަތު ހޯދީ ގަދަ 16 ކުޅުންތެރިންގެ ބުރުގައި ފަހަތުން އަރައި ޖަރުމަނުގެ ޕީޓާ ގޮޔޯވްޗިކް އަތުން މޮޅުވެގެންނެވެ. އެ މެޗަށް ފަހު އަލްކަރާޒަށް ތައުރީފުކުރި އެކަކަކީ ޓެނިހުގެ ލެޖެންޑް މެޓް ވިލަންޑާ އެވެ. ވިލަންޑާ ބުނީ އަލްކަރާޒްގެ ފަރާތުން ފެނުނު ކަމަކީ ޒުވާން އުމުރުގައި ނަޑާލްގެ ފަރާތުން ފެނުނު ކޮލިޓީ ކަމަށެވެ.
ނަޑާލާއި އަލްކަރާޒް ވަނީ ދާދި ފަހުން މެޑްރިޑް އޯޕަންގައި ވާދަކޮށްފަ އެވެ. އެ މެޗަށް ފަހު ނަޑާލް ވަނީ އަލްކަރާޒަށް ތައުރީފުކޮށްފަ އެވެ. އަދި އަލްކަރާޒަކީ މޮޅު ކުޅުންތެރިއަކަށް ވާނެ ފެންވަރު ހުރި ކުޅުންތެރިއެއް ކަން ފާހަގަކޮށް، ނަޑާލް ބުނީ ޓެނިހުގައި ސްޕެއިނަށް ނިސްބަތްވާ ކުޅުންތެރިއަކު އަނެއްކާ ވެސް ވިދާލާނެތީ ވަރަށް އުފަލުން ހުރި ކަމަށެވެ.
އަލްކަރާޒަކީ ނަޑާލެކޭ އެއްގޮތަށް ރެއާލް މެޑްރިޑްގެ ސަޕޯޓަރެކެވެ. ރެއާލުން ވަނީ އަލްކަރާޒް އެންމެ ފަހުން ކުޅުނު މެޗުގެ ކުރިން ރެއާލްގެ ރަސްމީ ސޯޝަލް މީޑިއާ އެކައުންޓްތައް މެދުވެރިކޮށް އަލްކަރާޒަށް ހިތްވަރުގެ މެސެޖެއް ޕޯސްޓްކޮށްފަ އެވެ.
އަލްކަރާޒަށް ކަމުދަނީ ފެޑެރާގެ ސްޓައިލް؟
ނަޑާލާ އެއްގޮތް ކަންތައްތަކެއް އަލްކަރާޒްގެ ދިރިއުޅުމުގައި ހުރި ކަމުގައި ވިޔަސް ކުޅުމުގެ ސްޓައިލަށް ބަލާއިރު އަލްކަރާޒާ ވައްތަރު ގޮތެއް ހުރީ ފެޑެރާގެ އެވެ.
މެޑްރިޑް އޯޕަން މެޗެއްގެ ތެރެއިން ނަޑާލް (ކ) އާއި އަލްކަރާޒް ފޮޓޯ އަކަށް ހުއްޓިގެން.
އަލްކަރާޒް ބުނީ އެއްވެސް ކުޅުންތެރިއަކު ކޮޕީނުކުރާ ކަމަށެވެ. އެކަމަކު، ކުޅުން އެއްގޮތް ކުޅުންތެރިއަކު ހުރިތޯ ކުރާ ސުވާލަށް ޖަވާބެއް ދޭނަމަ ބުނެވޭނީ ފެޑެރާއާ ވައްތަރު ގޮތްތަކެއް ހުރެދާނެ ކަމަށެވެ.
"ހަގީގަތަށް ބުނާނަމަ އަހަރެން އެއްވެސް ކުޅުންތެރިއަކު ކޮޕީއެއް ނުކުރަން. އަހަރެން އަމިއްލަ ގޭމެއް ކުޅެން ބޭނުމީ. އެކަމަކު، އަހަންނާ ކުޅުން އެއްގޮތް ކަންތައްތަކެއް ހުންނަ ކަމަށް ކުޅުންތެރިއަކު ބުނާނަމަ އަހަންނަށް ފެންނަނީ އެއީ ފެޑެރާ ކަމަށް،" އަލްކަރާޒް ބުންޏެވެ.
އަހަރެން ވަރަށް ގިނައިން ފެޑެރާގެ ކަންކަން ދަސްކުރަން މަސައްކަތް ކުރަން - އަލްކަރާޒް
ފާއިތުވި އަހަރުތަކުގައި ގްރޭންޑް ސްލޭމް މުބާރާތްތަކުގެ ކޮލިފައިން ބުރު ފަހަނައަޅައި ދިއުން ވެސް އަލްކަރާޒަށް ވީ ޗެލެންޖަކަށެެވެ. ބުރަ މަސައްކަތުން އެކަމުން ކުރިހޯދައި މިހާރު އޭނާ ކުރިމަތިލައިގެން ހުރީ ތަފާތު ޗެލެންޖަކަށެވެ. ގްރޭންޑް ސްލޭމް މުބާރާތެއް ކާމިޔާބުކުރާ އެންމެ ޒުވާން ކުޅުންތެރިންގެ ލިސްޓުން ޖާގަ ހޯދާށެވެ. އޭނާ މިރޭ ކުޅޭ ޔޫއެސް އޯޕަންގެ ކުއާޓާ ފައިނަލުގައި ބައްދަލުކުރާނީ ކެނަޑާގެ ފެލިކްސް އޯގާ-އެލިއަސީމޭއާ އެވެ.
