ހަވާނާ، ކިއުބާ (ސެޕްޓެމްބަރު 7) - ކިއުބާގައި އުމުރުން ދެ އަހަރުން ފެށިގެން ކުޑަކުދިންނަށް ކޮވިޑް ވެކްސިން ދޭން ފަށައިފި އެވެ.
ކިއުބާގައި ދެމުން އަންނަނީ އެ ގައުމުގައި އުފައްދާފައިވާ އަދި ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ ހުއްދަ ލިބިފައި ނުވާ ވެކްސިނެކެވެ. ނަމަވެސް އެ ގައުމު ވެފައި މި ވަނީ ދެ އަހަރުން ފެށިގެން ކުޑަކުދިންނަށް ވެކްސިން ދޭން ފެށި ފުރަތަމަ ގައުމަށެވެ.
ކިއުބާގެ ލަނޑުދަނޑިއަކީ މިދިޔަ އަހަރުގެ މާޗް މަހުން ފެށިގެން ބަންދުކޮށްފައި ހުރި ސްކޫލުތައް އަލުން ހުޅުވަން ވާއިރަށް އެ ގައުމުގެ 11.2 މިލިއަން މީހުންގެ ވެކްސިން ފުރިހަމަ ކުރުމެވެ.
އާ ދިރާސީ އަހަރު ހޯމަ ދުވަހު ފެށި ނަމަވެސް މި ވަގުތު ކްލާސްތައް ކުރިއަށް ގެންދަނީ ގޭގައި ތިބެގެން ޓީވީ ޕްރޮގްރާމްތައް މަދުވެރިކޮށެވެ. ކިއުބާގެ ގިނަ ގެތަކުގައި އިންޓަނެޓުގެ ހިދުމަތެއް ނުހުރެ އެވެ.
ކިއުބާގައި އުފެއްދި އަބްޑަލާ އަދި ސޮބެރަނާ ކޮވިޑް ވެކްސިންގެ ޓެސްޓުތައް ނިންމުމަށް ފަހު ކިއުބާގައި ކުޑަކުދިންނަށް ވެކްސިން ދޭން ފެށީ މިދިޔަ ހުކުރު ދުވަހު އެވެ. އެންމެ ފުރަތަމަ ދޭން ފެށީ 12 އަހަރުން މަތީގެ ކުދިންނަށެވެ.
އޭގެ ފަހުން ހޯމަ ދުވަހުން ފެށިގެން އުމުރުން ދެ އަހަރާއި 11 އަހަރާ ދެމެދުގެ ކުދިންނަށް ވެސް ވަނީ ވެކްސިން ދޭން ފަށާފަ އެވެ.
ދުނިޔޭގެ އެހެން ބައެއް ގައުމުތަކުގައި ވެސް 12 އަހަރުން މަތީގެ ކުދިންނަށް އަންނަނީ ވެކްސިން ދެމުންނެވެ. އަދި އެއަށްވުރެ ހަގު ކުދިންގެ މެދުގައި ވެކްސިންގެ ޓެސްޓުތައް ދަނީ ހިންގަމުންނެވެ.
