އަފްގާނިސްތާނުގެ ޖަލުގައި ތިބި ދިވެހި ދެމަފިރިންނާއި އެ މީހުންގެ ހަތަރު ދަރިން މިދިޔަ ހަފްތާގެ ތެރޭގައި ޖަލުން މިނިވަން ވިނަމަވެސް ރާއްޖެ ގެނެވޭނެ ގޮތެއް އަދި ނެތް ކަމަށް އާއިލާއިން މިއަދު ބުނެފި އެވެ.
އަފްގާނިސްތާނު ޖަލުން މިނިވަންވީ ހ. މޫންލައިޓްވެލީ، އަލީ ޝާފިއު، 32، އާއި އޭނާގެ އަނބިމީހާ ގދ. ގައްދޫ، މާލިލީގޭ، ޝަހުދާ ހަމީދު، 33، އާއި އެމީހުންގެ ހަތަރު ކުދިންނެވެ.
މީގެ ތިން އަހަރު ކުރިން ނޮވެމްބަރު 11، 2018 ގައި އަފްގާނިސްތާނުގެ އަންގަރްހާރު ޕްރޮވިންސުން އެމީހުން ހައްޔަރުކޮށް އެ ގައުމުގެ ކޯޓަކުން ހުކުމްކުރީ 21 އަހަރަށް ޖަލަށްލުމަށެވެ. އެކަމަކު ތާލިބާނުން ވެރިކަމާ ހަވާލުވުމަށް ފަހު އެ މީހުން މައްސަލަ އަނބުރާ ބެލުމަށް ފަހު ކުށް ސާބިތު ނުވާ ކަމަށް ނިންމައި މިދިޔަ ހަފްތާގެ ތެރޭގައި އެ އާއިލާ މިނިވަންކުރީ އެވެ.
އަފްގާނިސްތާންގެ ބޯޑަރު ބަންދު ކޮށްފައި އޮތުމުގެ ސަބަބުން އަމިއްލައަށް އެގައުމުން ބޭރު ވުމަކީ މިހާރު ދަތި ކަމެކެވެ.
ޝާފިއުގެ އާއިލާ މެމްބަރަކު މިއަދު "އަދަދު" އަށް ބުނިގޮތުގައި ތާލިބާނުން އަންގާފައި ވަނީ ދިވެހި ސަރުކާރުން އެދެފި ނަމަ އެ އާއިލާ ރާއްޖެ ފޮނުވައި ދޭނެ ކަމަށެވެ. ނަމަވެސް މިހާތަނަށް ސަރުކާރުގެ އެއްވެސް އިދާރާއަކުން އެކަމުގެ ހަބަރެއް ނުދޭ ކަމަށް އޭނާ ބުންޏެވެ.
"ޝާފިއުގެ އާއިލާ ބޭނުންވޭ ރާއްޖެ އަންނަން. އެކަމަކު ސަރުކާރުގެ އެއްވެސް ތާކުން ހަބަރެއް ނުވޭ،" އޭނާ ބުންޏެވެ.
ޝާފިއުގެ އާއިލާ އަފްގާނިސްތާންގައި ތިބިއިރު ފައިސާގެ ދަތިކަމުގެ ސަބަބުން އެ މީހުންނަށް ރާއްޖޭގެ އާއިލާއާ ގުޅެނީ ވެސް ވަރަށް މަދުން ކަމަށް އާއިލާއިން ވާހަކަ ދެއްކި މީހާ ބުންޏެވެ.
އެ މައްސަލައާ ގުޅޭގޮތުން ހިއުމަން ރައިޓްސް ކޮމިޝަން (އެޗްއާރުސީއެމް) އާއި ދިވެހި ސަރުކާރުގެ ބަހެއް ވަނީ އަދި ލިބޭގޮތް ނުވެފަ އެވެ.
ޝާފިއުއަށް ގިނަ ތުހުމަތުތަކެއް
ޝާފިއު އޮކްޓޯބަރު، 2018، ގައި އަފްގާނިސްތާނަށް އެތެރެވީ ސްރީ ލަންކާ މަގުން ޕާކިސްތާނަށް ގޮސް އެ ގައުމުންނެވެ. ޝާފިއު ހައްޔަރުކޮށް އޭނާގެ މައްޗަށް ހުކުމް އިއްވީ އޭނާ އަފްގާނިސްތާނަށް ދަތުރު ކުރީ ޓެރަރިސްޓު ޖަމާއަތް އިސްލާމިކް ސްޓޭޓުގެ ގޮތްޕެއް ކަމަށްވާ "އިސްލާމިކް ސްޓޭޓް ހޮރިސާން ޕްރޮވިންސް" އާ ގުޅުމަށް ކަމަށް ތުހުމަތުކޮށެވެ.
އޭގެ ކުރިން 2015 ވަނަ ޖިހާދު ކުރަން ދާން ކަމަށް ބުނެ އަނބިމީހާ އާއި ދަރިއަކު ގޮވައިގެން ސީރިއާ ފުރަން އުޅޭ ކަމުގެ ތުހުމަތަށް ރާއްޖޭގެ އެއާޕޯޓުން ވެސް ޝާފިއު ހިފަހައްޓައިފައިވެ އެވެ.
އޭގެ އިތުރުން، ޝާފިއުއަކީ 2015 ވަނަ އަހަރު ބ. ހިބަޅިދޫ ފަޅުތެރެއިން ފެނުނު ސިފައިންގެ އިން ވަގަށް ނަގާފައިވާ ހަތިޔާރާއި ގޮވާތަކެއްޗާ ގުޅުން ހުރި ބައެއް ތަކެތި އޭނާގެ އަތުން ފެނުނު ކަމުގެ ތުހުމަތަށް ވެސް ހައްޔަރު ކުރި މީހެކެވެ. އެ މައްސަލައިގައި ހެކި ނެތިގެން ހަތަރު މަސް ފަހުން އޭނާ ވަނީ ދޫކޮށްލައިފަ އެވެ.
