ސިންގަޕޫރު (ސެޕްޓެމްބަރު 1) - ނޫސް ވެބްސައިޓެއްގެ އެޑިޓަރާއި ލިޔުންތެރިޔަކާ ދެކޮޅަށް އަބުރުގެ ދައުވާކޮށްގެން ސިންގަޕޫރުގެ ބޮޑު ވަޒީރަށް ބަދަލުގެ ގޮތުގައި 275،000 ޑޮލަރު ނަގައިދޭން އަންގައިފި އެވެ.
ފާޑުކިޔާ ފަރާތްތަކުން ބުނާ ގޮތުގައި އެފަދަ އަބުރުގެ ދައުވާތަކަކީ އިދިކޮޅު އަޑު ކަނޑުވާލުމަށް ސިންގަޕޫރުން ގެންގުޅޭ އުކުޅެކެވެ.
އޮންލައިން ސިޓިޒެން އޭޝިއާ ނޫހުގެ އެޑިޓަރު ޓެރީ ޒޫ އާއި އެ ނޫހުގެ ލިޔުންތެރިޔަކާ ދެކޮޅަށް އަބުރުގެ ދައުވާއާ ގުޅޭ ތަފާތު ދެ ޝަރީއަތެއް ކުރިއަށް ގެންދިޔަ އެވެ.
ލިޔުންތެރިޔާ ރުބާޝިނީ ޝުންމުގަނަތަން 2019 ވަނަ އަހަރު ލިޔުނު އާޓިކަލެއްގައި ބުނެފައި ވަނީ ބޮޑު ވަޒީރުގެ އާއިލާ ތެރޭގައި ބޮޑު ހަމަނުޖެހުންތަކެއް ހިނގަމުންދާ ކަމަށެވެ.
ފުރަތަމަ މައްސަލާގައި ސިންގަޕޫރުގެ ހައި ކޯޓުން އެޑިޓަރަށް އެންގީ ބަދަލުގެ ގޮތުގައި 156،000 ޑޮލަރު ދިނުމަށެވެ. ދެ ވަނަ މައްސަލާގައި ލިޔުންތެރިޔާ އަށް އެންގީ ބަދަލުގެ ގޮތުގައި 119،000 ޑޮލަރު ދިނުމަށެވެ.
ސްޓްރެއިޓްސް ޓައިމްސް ނޫހުން ބުނީ ބަދަލުގެ ގޮތުގައި ބޮޑު ވަޒީރަށް ލިބިވަޑައިގަންނަވާ ފައިސާ ހަދިޔާ ކުރާނީ ޗެރިޓީ އަށެވެ.
ބަދަލުގެ ގޮތުގައި ދައްކަން ޖެހޭ ފައިސާ ހޯދުމަށް އެޑިޓަރު ޒޫ ވަނީ ކްރައުޑް ފަންޑިން ކެމްޕެއިނެއް ފަށާފަ އެވެ. އޭނާގެ ނޫހަކީ ސިންގަޕޫރުގެ މެއިންސްޓްރީމް މީޑިއާއާ ހިލާފަށް ސަރުކާރަށް ފާޑުކިޔާ ނޫހެކެވެ.
މިދިޔަ މާޗް މަހު ބްލޮގަރު ލިއޮންގް ސްޒޭ ހިއާން ފޭސްބުކްގައި ހިއްސާކުރި ލިޔުމެއްގައި ބޮޑު ވަޒީރާ ގުޅޭ ކޮރަޕްޝަންގެ ވާހަކަތަކެއް ހިމެނުމުން، ބަދަލުގެ ގޮތުގައި 100،000 ޑޮލަރު ދޭން އޭނާ އަށް އެންގި އެވެ.
އޭނާ ވެސް އެ ފައިސާ އަނބުރާ ދެއްކީ ކްރައުޑް ފަންޑިން މެދުވެރިކޮށް، މަދު ދުވަސްތަކެއްގެ ތެރޭގައި ފައިސާ ހޯދައިގެންނެވެ.
