މެނީލާ، ފިލިޕީންސް (އޯގަސްޓު 25) - އަންނަ އަހަރު އޮންނަ ރިޔާސީ އިންތިހާބުގައި ނައިބު ރައީސް ކަމަށް ކުރިމަތިލައްވާނެ ކަމަށް ފިލިޕީންސްގެ މިހާރުގެ ރައީސް ރޮޑްރިގޯ ޑުޓާޓޭ އިއުލާނު ކުރައްވައިފި އެވެ.
ޑުޓާޓޭ ވިދާޅުވީ އެގޮތަށް ނިންމެވީ މަސްތުވާތަކެއްޗާއި ކުށްވެރިންނާ ދެކޮޅަށް ހިންގާ "ހަނގުރާމަ" ކުރިއަށް ގެންދެވޭނެ ގޮތެއް ހޯދުމަށް ކަމަށެވެ. ނަމަވެސް ބައެއް ފަރާތްތަކުން ބުނާ ގޮތުގައި އެ ނިންމެވުމަކީ ގިނަ ދުވަހު ބާރުގައި ހުންނެވުމަށާއި ވެރިކަން ނިމުމުން ޖިނާއީ ދައުވާއާ ކުރިމަތިލާން ޖެހުމުގެ ބިރު އޮތުމުން ޑުޓާޓޭ ނިންމެވި ނިންމެވުމެކެވެ.
ދެހާސް ސޯޅަ ވަނަ އަހަރު ރައީސްކަމަށް އިންތިހާބުވެވަޑައިގެންނެވި ޑުޓާޓޭ އަށް، ފިލިޕީންސްގެ ގާނޫނު އަސާސީގައިވާ ގޮތުން، އިތުރު ދައުރަކަށް ރައީސްކަމަށް ވާދައެއް ނުކުރެއްވޭނެ އެވެ. އެހެންވެ، މީގެ ކުރިން ވެސް ޑުޓާޓޭ ވަނީ ނައިބު ރައީސްކަމަށް ޝައުގުވެރިވާ ކަމަށް ވިދާޅުވެފަ އެވެ.
ޑުޓާޓޭގެ ސަރުކާރުން އަންނަނީ މަސްތުވާތަކެތި ވިއްކާ މީހުންނާއި އެ ބޭނުން ކުރާ މީހުންނާ ދެކޮޅަށް "ހަނގުރާމަ" ކުރަމުންނެވެ. އެ މަސައްކަތުގެ ތެރެއިން އެތައް ހާސް ބަޔަކު މަރުވެފައިވާ ކަމަށް ބެލެވެ އެވެ.
އިންޓަނޭޝަނަލް ކްރިމިނަލް ކޯޓް (އައިސީސީ) އިން މަސައްކަތް ކުރަމުން ދަނީ އެހާ ގިނަ އަދަދެއްގެ ބަޔަކު މަރުވެފައި ވާތީ އެކަން ތަހުގީގު ކުރުމަށެވެ.
