މޮސްކޯ، ރަޝިއާ (އޯގަސްޓު 25) - އަންނަ މަހު އޮންނަ ރަޝިއާގެ މަޖިލިސް އިންތިހާބާ ދިމާކޮށް ސަޕޯޓު ހޯދުމުގެ ގޮތުން ޕެންޝަނަރުންނަށް އިތުރު 135 ޑޮލަރު ދިނުމަށް ރައީސް ލެޑިމިއަ ޕޫޓިން އަންގަވައިފި އެވެ.
ތަކެތީގެ އަގު ބޮޑުވާއިރު އެއާ އެއް ވަރަށް އާއްމުންގެ އާމްދަނީ އިތުރު ނުވާތީ ސެޕްޓެމްބަރުގެ އިންތިހާބުގައި ޕޫޓިންގެ ޔުނައިޓެޑް ރަޝިއާ ޕާޓީ އަށް ތާއީދު ކުޑަ ވާނެ ކަމަށް ބެލެވެ އެވެ.
ކެމްޕެއިނާ ދިމާކޮށް އިޖުތިމާއީ ދާއިރާތަކަށް ކުރާ ހޭދަ ޕޫޓިން ވަނީ އިތުރު ކުރައްވާފަ އެވެ. ޕެންޝަން ފައިސާގެ ގޮތުގައި ލިބޭ މިންވަރުގެ ތެރެއަށް އަންނަ މަހު 135 ޑޮލަރު އިތުރު ކުރުމަށް ވަނީ އަންގާފަ އެވެ.
އާއްމުކޮށް ޕެންޝަންގެ ގޮތުގައި މަހަކު ލިބެނީ ވެސް 135 ޑޮލަރެވެ. އެހެންކަމުން ސެޕްޓެމްބަރު މަހު ޕެންޝަންގެ ގޮތުގައި ޖުމްލަ ލިބޭނީ އޭގެ ދެ ގުނަ އެވެ.
ޕާޓީ އޮފިޝަލުންނާއެކު ބޭއްވި ބައްދަލުވުމަކަށް ފަހު ޕޫޓިން ވިދާޅުވީ އިންފްލޭޝަންގެ އަސަރު އެންމެ ބޮޑަށް ކޮށްފައި ވަނީ ޕެންޝަނަރުންނަށް ކަމަށެވެ.
މަރުކަޒީ ބޭންކުގެ ތަފާސްހިސާބުތައް ދައްކާ ގޮތުގައި އިންފްލޭޝަން ވަނީ 6.5 ޕަސެންޓަށް އަރާފަ އެވެ. ބޭންކުގެ އިންޓްރެސްޓް ރޭޓު ވެސް ޖޫން މަހު ވަނީ އެ މިންވަރުން މަތިކޮށްފަ އެވެ.
ޕެންޝަނަށް ލިބޭ މިންވަރު އިތުރު ކުރުމަށް ފަހު އަސްކަރީ މުވައްޒަފުންނަށް 200 ޑޮލަރުގެ ބޯނަސް ދިނުމަށް ވެސް ޕޫޓިން އެންގެވި އެވެ.
މިދިޔަ ޖޫން މަހު ޕޫޓިން ވައުދުވެވަޑައިގެންނެވީ މަގުތަކާއި އާއްމު ދަތުރު ފަތުރު ވަރުގަދަކޮށް، އިންފްރާސްޓްރަކްޗާ އާއި ސިއްހީ ފަރުވާ ބިނާކުރަން އެތައް ބިލިއަން ޑޮލަރު ހޭދަ ކުރައްވާނެ ކަމަށެވެ.
ޔުނައިޓެޑް ރަޝިއާ އަށް އޮތް ތާއީދު ދަށްވާން ފެށީ 2018 ވަނަ އަހަރު ސަރުކާރުން ޕެންޝަނަށް ގެނައި އިސްލާހުގެ ދަށުން ރިޓަޔާ ކުރާ އުމުރު މަތި ކުރުމުންނެވެ.
ޕޯލްތަކުން ދައްކާ ގޮތުގައި އަންނަ މަހުގެ އިންތިހާބުގައި އެ ޕާޓީ އަށް ލިބޭނެ ކަމަށް ބެލެވެނީ 30 ޕަސެންޓު ވޯޓެވެ. އެއީ 2016 ވަނަ އަހަރުގެ އިންތިހާބާ އަޅާ ބަލާއިރު 10 ޕޮއިންޓުގެ ވެއްޓުމެކެވެ.
