މިލާން (އޮގަސްޓް 22) - އިޓާލިއަން ލީގުގެ އެންމެ ފަހުގެ ޗެމްޕިއަން އިންޓަ މިލާނުން މި ފަހަރުގެ ލީގުގައި ކުޅުނު ފުރަތަމަ މެޗުން 4-0 އިން ޖެނޯއާ އަތުން ރޭ މޮޅުވެއްޖެ އެވެ.
މިއީ އާ ކޯޗު ސިމޯން އިންޒާގީގެ އިރުޝާދުގެ ދަށުން ލީގުގައި އިންޓަ ކުޅުނު ފުރަތަމަ މެޗެވެ. މިދިޔަ ސީޒަނުގައި އިންޓަ އަށް ލީގު ކާމިޔާބު ކޮށްދިން ކޯޗު އެންޓޯނިއޯ ކޮންޓޭ ވަނީ މަގާމުން ވަކިވެފަ އެވެ. އެއީ އެ ކްލަބްގެ ހަރަދުތައް ކުޑަކުރަން މުހިއްމު ކުޅުންތެރިންތަކެއް ވިއްކާލަން މެނޭޖްމަންޓުން ނިންމުމުންނެވެ.
އިންޓަގެ ދަނޑުގައި ރޭ ކުޅުނު މެޗުގައި އެ ޓީމުގެ ފުރަތަމަ ގޯލު ޖެހީ ހަ ވަނަ މިނިޓްގައި ސްލޮވާކިއާގެ ޑިފެންޑަރު މިލާން ސްކްރީނާ އެވެ. މިއީ މި ސީޒަނުގައި އޭސީ މިލާން ދޫކޮށް އިންޓަ އަށް ބަދަލުވި ތުރުކީގެ ހަކަން ޗަނޮނޮގްލޫ ދިން ބޯޅައަކުން ސްކްރީނާ ބޮލުން ޖެހި ގޯލެކެވެ. މެޗުގެ 14 ވަނަ މިނިޓްގައި ޗަނޮނޮގްލޫ ވަނީ އިންޓަގެ ލީޑުފުޅާކޮށްދީފަ އެވެ. މިއީ އެޑިން ޒެކޯ ދިން ބޯޅައަކުން ޗަނޮނޮގްލޫ ޖެހި ގޯލެކެވެ.
ޖެނޯއާގެ ފަރާތުން އިންޓަ އަށް މާ ބޮޑު ނުރައްކަލެއް މި މެޗުގައި ކުރިމަތިނުވެ އެވެ. އިންޓަ އިން ފަހު ދެ ގޯލު ޖެހީ މެޗުގެ ފަހު 15 މިނިޓް ތެރޭގަ އެވެ.
އިންޓަގެ ތިން ވަނަ ގޯލު ޖެހީ މެޗުގެ 75 ވަނަ މިނިޓްގައި ނިކޯލޯ ބަރޭލާ ދިން ބޯޅައަކުން އާޓޫރޯ ވިޑާލް އެވެ. މެޗު ނިމެން ތިން މިނިޓަށް ވެފައި ހުއްޓައި ވިޑާލް ދިން ބޯޅައަކުން އިންޓަގެ ފަހު ގޯލު ޖެހީ ޒެކޯ އެވެ. ޒެކޯ އަކީ އިންޓަ އިން ރޮމެލޫ ލުކާކޫ ވިއްކާލުމަށް ފަހު ކުރިއަށް ކުޅެން ގަތް ކުޅުންތެރިއެކެވެ. ޒެކޯ ކުރިން ކުޅުނީ ރޯމާ އަށެވެ.
އިންޓަގެ ކޯޗު އިންޒާގީ ބުނީ ޕްރީ ސީޒަނުން ފެށިގެން މިހާތަނަށް ކުރެވުނު މަސައްކަތުގެ ޕޮޒިޓިވް ކަންކަން ދަނޑުމަތީގައި ފެނުުމުން ވަރަށް ހިތްހަމަ ޖެހޭ ކަމަށެވެ. އަދި ވަރުގަދަކޮށް ސީޒަން ފެށުމަކީ އިންޓަގެ ކުޅުންތެރިންގެ ކޮންފިޑެންސް ރަނގަޅުވުމުގެ އިތުރުން ސަޕޯޓަރުންނަށް ވެސް ހިތްހަމަޖެހުން ލިބޭނެ ކަމެއް ކަމަށް އިންޒާގީ ވަނީ ބުނެފަ އެވެ.
އިޓާލިއަން ލީގުގައި ރޭ ކުޅުނު އެހެން މެޗުތަކަށް ބަލާއިރު، ހެލަސް ވެރޯނާ ދަނޑުގައި ސަސުއޯލޯ ވަނީ 3-2 އިން މޮޅުވެފަ އެވެ. ޓޮރިނޯ ދަނޑުގައި 2-1 އިން އެޓަލަންޓާ މޮޅުވިއިރު، މައުރީޒިއޯ ސާރީގެ ކޯޗުކަމުގައި ލާޒިއޯ ކުޅުނު ފުރަތަމަ މެޗުން ވަނީ އެމްޕޮލީ ދަނޑުގައި 3-1 އިިން މޮޅުވެފަ އެވެ.
