އެމްޑީޕީގެ މަސައްކަތް ބައިބައިވެ ދެ ފެކްޝަނަކާ އެކު ހިޔާލުތަފާތުވުން ބޮޑުވެފައި އޮތަސް "ޕާޓީ ހަލާކުވިޔަ ނުދެއްވާނެ" ކަމުގެ ޔަގީންކަން ރައީސް އިބްރާހިމް މުހައްމަދު ސޯލިހް ރޭ ދެއްވައިފި އެވެ.
އެމަނިކުފާނު މި ޔަގީންކަން ދެއްވީ އެމްޑީޕީގެ އެންމެ އިސް ލީޑަރުގެ ހައިސިއްޔަތުން އެ ޕާޓީގެ މެމްބަރުންނާ ތ. ތިމަރަފުށީގައި ބައްދަލުކުރައްވަ އެވެ.
ރައީސްގެ ތަރުޖަމާން މުހައްމަދު މަބްރޫކް އަޒީޒް ކުރެއްވި ޓުވީޓެއްގައި ވިދާޅުވީ އެމްޑީޕީގެ މެމްބަރުންނާ ބައްދަލުކުރައްވައި ދެއްކެވި މުހިއްމު ވާހަކަފުޅުގެ ތެރޭގައި އެމަނިކުފާނުު އެމްޑީޕީ ދޫކޮށްނުލައްވާނެ ކަމަށާއި ހުންނަވާނީ އެމްޑީޕީގައި ކަމަށް ވިދާޅުވި އެވެ.
ޕާޓީގެ ކުރިއެރުމަށް ހަރަކާތްތައް އިތުރުކުރަން ޖެހިފައިވާ ކަމަށް އެމަނިކުފާނު ވިދާޅުވި ކަމަށާއި ޕާޓީ އޮފީސް ހެދުމަށް ބޭނުންވާ ހުރިހާ އެހީތެރިކަމެއް ދެއްވާނެ ކަމަށް ވިދާޅުވި ކަމަށެވެ.
ދެމިހުންނަވާނީ އެމްޑީޕީގައި ކަމަށް ރައީސް ތިމަރަފުށީގައި މި ތަކުރާރުކުރެއްވީ، އެމްޑީޕީގެ ތެރޭގައި އޮތް ބައިބައިވުން ހައްލުނުވެ ދެމިގެން ގޮސް، އަލަށް އުފައްދާ ސިޔާސީ ޕާޓީ، އެމްއެންޕީއާ ގުޅިވަޑައިގެންފާނެ ކަމަށް ވާހަކަ ފަތުރަމުން ދަނިކޮށެވެ.
އެމަނިކުފާނުގެ ދަތުރުތަކާއި ބައްދަލުވުންތަކުގައި އެމްޑީޕީގެ އެންމެ އިސް ލީޑަރު ކަމަށް މީގެ ކުރިން ބެނާ ދަމާފައި ނުވިޔަސް ތިމަރަފުށީގައި ރައްޔިތުންނާ ބައްދަލުކުރެއްވީ އެ ހައިސިއްޔަތާ އެކުގަ އެވެ.
އެމްޑީޕީގެ މެމްބަރުންނާ ރައީސް ވާހަކަ ދައްކަވަނީ: ޕާޓީ އިތުރަށް ވަރުގަދަކުރަން ޖެހޭ ކަމަށް ވިދާޅުވި.
އެމަނިކުފާނަކީ އެމްޑީޕީގެ އިސް ލީޑަރުކަން އަމިއްލަފުޅަށް މިދިޔަ ހަފުތާގައި ހާމަކުރެއްވީ އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދާ ދެމެދު އެކި ކަންކަމުގައި ވަރަށް ބޮޑަށް ހިޔާލުތަފާތުވުން އުފެދިފައި ވަނިކޮށެވެ. ރައީސް ސޯލިހާ އެކު ސިޔާސީ މަސައްކަތް ކުރައްވަން ބޭނުން ނުވާ ކަން ވެސް ނަޝީދު އޮތީ މުޅި ދުނިޔެއަށް އިއުލާންކުރައްވައިފަ އެވެ.
އެމްޑީޕީން ބޭނުން ވަނީ އިދިކޮޅު ޕީޕީއެމާ އެކު އިއްތިހާދުވެ ސަރުކާރެއް އެކުލަވާލަން ކަަމަށް ވެސް ނަޝީދު ވިދާޅުވެފައިވެ އެވެ.
ނަޝީދު، ޕީޕީއެމަށް މި ދެއްވި ދައުވަތާ ދެކޮޅު ކަމަށް ރައީސް ސޯލިހް ވިދާޅުވި އެވެ. އެއީ ސިޔާސީ ނިޒާމް ރޫޅިދާނެ ކަމެއް ކަމަށާއި އެފަދަ ކަމަކަށް އެމްޑީޕީގެ މެމްބަރުން ތާއީދު ނުކުރަން ރައީސް އެދިވަޑައިގަތެވެ.
ރައީސް ސޯލިހާއި ނަޝީދާ ދެމެދު އުފެދުނު ހިޔާލުތަފާތުވުންތައް ބޮޑުވީ ބަރުލަމާނީ ނިޒާމެއް ގެނެސް ބޮޑުވަޒީރަކަށް ވެވަޑައިގަތުމުގެ ފުރުސަތު ދެއްވަން ނަޝީދު އެދިވަޑައިގެން ތަކުރާރުކޮށް އެ ވާހަކަ ދައްކަވަން ފެއްޓެވުމުންނެވެ. ބަރުލަމާނީ ނިޒާމަކަށް ނަޝީދު މަސައްކަތް ކުރެއްވިޔަސް ރައީސް ވިދާޅުވަނީ އެކަން އޮތީ ރައްޔިތުންގެ އަތްމަތީގައި ކަމަށެވެ.
ނަޝީދު ބޭނުންފުޅު ވަނީ 2023 ގެ ރިޔާސީ އިންތިހާބު ނުބާއްވައި، ބަރުލަމާނީ ނިޒާމަކަށް ބަދަލުވާށެވެ. އެކަމަކު މި ފަހުން ރައީސް ސޯލިހް ވަނީ އެމަނިކުފާނަށް ރިޔާސީ އިންތިހާބުގައި ވާދަކުރެއްވުމުގެ ފުރުސަތު ބަންދުނުވާ ކަމަށް ވިދާޅުވެ، އިންތިހާބުގައި ވާދަކުރައްވަފާނެ ކަމުގެ އިޝާރާތެއް ދެއްވައިފަ އެވެ.
މިކަންކަމާ ހެދި ދެ ރައީސުންގެ ދެމެދުގައި އުފެދިފައިވާ ހިޔާލުތަފާތުވުން ނައްތާލައި ސުލްހަކުރެއްވުމެގެ މަސައްކަތް އެމްޑީޕީގެ ޗެއާޕާސަން ހަސަން ލަތީފް ވަނީ ފައްޓަވައިފަ އެވެ. އެކަމަކު ދެ ރައީސުންގެ ފަރާތްޕުޅުން މިހާތަނަށް އެކަމަކަށް އެއްބާރުލުން ލިބިވަޑައިގަތް ކަމެއް ހަސަން މިހާތަނަށް ވިދާޅުވެފައެއް ނުވެ އެވެ.
