އަފްގާނިސްތާނުގެ ގާނޫނީ ސަރުކާރު ވެއްޓި ހަނގުރާމަވެރި ތާލިބަނުންގެ އަތްމައްޗަށް އެ ގައުމު ގޮސް ހިނގަމުންދާ ހަމަނުޖެހުންތަކުގެ ސަބަބުން ރާއްޖޭގެ ރައްކާތެރިކަމާއި ސަލާމަތަށް އެއްވެސް ނުރައްކަލެއް އޮތްތޯ ބެލުމަށް ރައްޔިތުންގެ މަޖިލީހުން އިސްނެގުމަށް މަޖިލީހުގެ ނައިބު ރައީސް އީވާ އަބްދުﷲ އެދިވަޑައިގެންފި އެވެ.
މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ޓެރަރިސްޓް ހަމަލާއަށް ފަހު، މަޖިލީހުގެ ރިޔާސަތު ބަލަހައްޓަވަމުން ގެންދަވާ އީވާ، މަޖިލީހުގެ ސަލާމަތީ ހިދުމަތްތަކާބެހޭ (241) ކޮމިޓީއަށް ފޮނުއްވި ސިޓީގެ ކޮޕީ "އަދަދު" އަށް ވަނީ ލިބިފަ އެވެ.
އެ ކޮމިޓީގެ މުގައްރިރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމަށް މިދިޔަ ހޯމަ ދުވަހު ފޮނުއްވި ސިޓީގައި އީވާ ވަނީ އަފްގާނިސްތާނު ވެއްޓިފައިވާ ހާލަތުގެ ސަބަބުން ރާއްޖެއަށް އެއްވެސް ނުރައްކަލެއް އޮތްތޯ ބެލުމަށްޓަކައި ކަމާގުޅޭ އިދާރާތަކުން ހަދާފައިވާ ރިސްކު އެސެސްމަންޓް ދެނެގަތުމަށް ނުވަތަ އެފަދަ ރިސްކް އެސެސްމަންޓެއް ހެދުމަށް ހުށަހަޅުއްވައިފަ އެވެ.
އޭގެ އިތުރުން، އެހީއަށް ބޭނުންވެފައިވާ އަފްގާނިސްތާނުގެ ރައްޔިތުންނަށް، ހާއްސަކޮށް އަންހެނުންނާއި ކުޑަކުދިންނަށް އެހީތެރިކަން ފޯރުކޮށްދިނުމުގައި ގައުމެއްގެ ގޮތުގައި ރާއްޖެއަށް ކުރެވިދާނެ ކަންކަން ދެނެގަތުމަށް ވެސް އީވާ ވަނީ 241 ކޮމިޓީއަށް ހުށަހަޅުއްވައިފަ އެވެ.
ލޭ އޮހޮރުވުމަށް ފުރުސަތު ނުދޭން ކަމަށް ވިދާޅުވެ އަފްގާނިސްތާނުގެ ރައީސް އަޝްރަފް ގަނީ ގައުމު ދޫކޮށް ވަޑައިގެންނެވުމާއެކު، 20 އަހަރުވީ ދިގު ހަނގުރާމައިން މޮޅުވެ، އަފްގާނިސްތާނުގެ ފުރިހަމަ ކޮންޓްރޯލް ތާލިބާނުންނަށް ވަނީ ލިބިފަ އެވެ.
އެންމެ 10 ދުވަސް ތެރޭގައި ތާލިބާނުން ވަނީ އަފްގާނިސްތާނުގެ ހުރިހާ ބޮޑެތި ސިޓީތަކެއް ހިފައިފަ އެވެ. އެމެރިކާ ސިފައިންގެ އެހީތެރިކަން ނެތި، އަފްގާނިސްތާނުގެ ސިފައިން ވަނީ ހަތިޔާރު ބަހައްޓައި އަމާން ދީފަ އެވެ.
ތާލިބާނުން ބުނީ ބޭނުންވަނީ "ސުލްހަވެރިކަމާ އެކު ވެރިކަމުގެ ބާރުތައް ބަދަލު ކުރަން" ކަމަށެވެ. ނަވާރަ ސަތޭކަ ނުވަދިހަ ހަޔަކުން ފެށިގެން އޮތް ތާލިބާނު ވެރިކަން ވެއްޓުނީ ސެޕްޓެމްބަރު 11، 2001 ގެ ޓެރަރިސްޓު ހަމަލާތަކާ ގުޅިގެން އެމެރިކާ އިން އަފްގާނިސްތާނުގެ ފަސްގަނޑަށް އެރުމުންނެވެ.
ތާލިބާނުގެ އަތްމައްޗަށް ދިޔުމުން، އަފްގާނިސްތާނު އަނެއްކާވެސް ޓެރަރިސްޓުންގެ ހާއްޔަކަށްވެ، ދީނީ ހައްދުފަހަނައެޅުމުގެ ފިކުރު އެ ގައުމުގެ ތެރެއިން ފެތުރުމުގެ ކަންބޮޑުވުން އެހެން ގައުމުތަކުން ވެސް ވަނީ ފާޅުކޮށްފަ އެވެ.
