ކުއަލަ ލަމްޕޫރް، މެލޭޝިއާ (އޯގަސްޓު 17) - މެލޭޝިއާގެ އާ ބޮޑުވަޒީރު އައްޔަނުކުރުމުގެ މަސައްކަތް އަންގާރަ ދުވަހު ފެށުމާއެކު، ކޮވިޑްގެ ހާލަތު ކޮންޓްރޯލް ކުރުމަށް ވާދަވެރި ސިޔާސީ ވެރިން އެއްބައިވާން ރަސްގެފާނު ގޮވާލައްވައިފި އެވެ.
ބޮޑުވަޒީރު އައްޔަނުކުރުމުގެ ބާރު ލިބިވަޑައިގަންނަވަނީ ރަސްގެފާނަށެވެ. އެނެލިސްޓުން ބުނީ ކުރީގެ ބޮޑުވަޒީރު މުހްޔިއްދީން ޔާސީން ހޯމަ ދުވަހު އިސްތިއުފާ ދެއްވުމާ ގުޅިގެން ރަސްގެފާނު މަސައްކަތް ކުރައްވަނީ އެއްބައިވަންތަކަމުގެ ސަރުކާރެއް އެކުލަވާލުމަށް ކަމަށެވެ.
ބޮޑުވަޒީރުކަން ސަތާރަ މަސް ދުވަހު ކުރެއްވުމަށް ފަހު ޔާސީން އިސްތިއުފާ ދެއްވީ ޕާލިމެންޓުގެ މެޖޯރިޓީ ގެއްލުމުންނެވެ. އޭނާ ވެރިކަމުގައި ހޭދަކުރެއްވި ކުރު މުއްދަތުގައި ގިނަ ފާޑުކިޔުންތަކެއް އަމާޒުވިއިރު، އެންމެ ބޮޑަށް ފާޑުކިޔާފައި ވަނީ ކޮވިޑާ ގުޅިގެން އަޅާ ފިޔަވަޅުތަކާ ގުޅޭ ގޮތުންނެވެ.
ކޮވިޑާ ގުޅިގެން އިންތިހާބެއް ބާއްވާނެ ޖާގައެއް ނެތް ކަމަށް ރަސްގެފާން ސުލްތާން އަބްދުﷲ ސުލްތާން އަހްމަދު ޝާހް ވަނީ ކަނޑައަޅުއްވާފަ އެވެ. އެހެންކަމުން ތާއީދު އޮތް ކެންޑިޑޭޓެއް ބެއްލެވުމަށް ފަހު ބޮޑު ވަޒީރުގެ މަގާމަށް އެ ބޭފުޅަކު އައްޔަނު ކުރައްވާނީ ރަސްގެފާނު އަމިއްލަފުޅަށެވެ.
ނަމަވެސް އުމުރުން 74 އަހަރުގެ ޔާސީނަށް ފަހު ބޮޑުވަޒީރުކަމަށް ވަޑައިގަންނަވާނީ ކޮން ބޭފުޅެއް ކަމެއް މިހާތަނަކަށް ސާފެއް ނުވެ އެވެ. ޕާޓީތަކުގެ މެދުގައި ހަދާފައިވާ އެއްވެސް ކޯލިޝަނަކަށް ޕާލިމެންޓުގެ މެޖޯރިޓީއެއް ނުލިބެ އެވެ.
އިދިކޮޅު ޕާޓީތަކެއް ގުޅިގެން މަސައްކަތް ކުރަނީ އަންވަރް އިބްރާހިމް ބޮޑުވަޒީރު ކަމަށް ގެނައުމަށެވެ. ޔާސީންގެ ސަރުކާރުގެ ބައެއް ބޭފުޅުން ވެސް ކޯލިޝަނެއް އުފެއްދޭތޯ ބަލަމުން ދާއިރު، ކޮވިޑް ކޮންޓްރޯލް ކުރެވެންދެން ހުރިހާ ޕާޓީތަކެއް ހިމެނޭ އެއްބައިވަންތަކަމުގެ ސަރުކާރެއް ގާއިމްކުރަން އެހެން ޕާޓީތަކުން ވަނީ ގޮވާލާފަ އެވެ.
ޕާޓީތަކުގެ ވެރިންނާއެކު ރަސްގެފާނުގެ ގަނޑުވަރުގައި އޮތް ބައްދަލުވުމަށް ފަހު އިދިކޮޅު ލީޑަރު އަންވަރު ވިދާޅުވީ "ގައުމަށް ސިޔާސީ އަދި ދުސްތޫރީ ކާރިސާއެއް ކުރިމަތިވެފައިވާ ކަމަށް" ރަސްގެފާނު ވިދާޅުވި ކަމަށެވެ.
"އެހެންވެ، ޕާޓީތައް އެއްބައިވެ ކޮވިޑާ ދެކޮޅަށް މަސައްކަތްކޮށް، އިގްތިސާދު ހަމައަކަށް އަޅުވަން މަސައްކަތް ކުރަން ޖެހޭ ކަމަށް ވިދާޅުވި،"
"ފެންނަ ފެނުމަށް ހީވަނީ ހުރިހާ ޕާޓީތަކަށް ވެސް އެއްބަސްވުމަކަށް އާދެވިއްޖެހެން... އެއީ މުސްކުޅި ސިޔާސީ ގޮތް ދޫކޮށްލަން... އަދި ގައުމުގެ ތަރައްގީއަށް އަމާޒު ހިފަން."
ރަސްގެފާނު ސިޔާސީ ޕާޓީތަކުގެ ވެރިންނާ ބައްދަލުކުރެއްވި އިރު، ރަސްގެފާނުގެ ނައިބު ވެސް އެ ބައްދަލުވުމުގައި ބައިވެރިވެވަޑައިގެންނެވި އެވެ.
ސިންގަޕޯ އިންސްޓިޓިއުޓް އޮފް އިންޓަނޭޝަނަލް އެފެއާޒްގެ އެނެލިސްޓު އޯ އެއި ސުން ވިދާޅުވީ އެކަމުން ދައްކުވައިދެނީ މެލޭޝިއާގެ ޝާހީ އާއިލާތަކުގެ މެދުގައި އެއްބައިވަންތަކަމުގެ ސަރުކާރެއް ގެނައުމަށް ނިންމާފައިވާ ކަމެވެ.
ބޮޑުވަޒީރުގެ މަގާމަށް ފެންނަ ބޭފުޅުންގެ ނަން ބުދަ ދުވަހުގެ މެންދުރުގެ ކުރިން ރަސްގެފާނަށް ހުށަހަޅުއްވަން ޕާލިމެންޓު މެމްބަރުންނަށް ވަނީ އަންގަވާފަ އެވެ. ބެލެވޭ ގޮތުގައި އާ ބޮޑުވަޒީރަކު އައްޔަނު ކުރުމަށް ފަހު އިއުލާނު ކުރަން ދުވަސްތަކެއް ހޭދަވާނެ އެވެ.
ބޮޑު ވަޒީރުގެ މަގާމަށް އަންނަ ބޭފުޅަކަށް ޕާލިމެންޓުގެ ތިރިގޭގެ 222 މެމްބަރުންގެ ތެރެއިން މަދުވެގެން 111 މެމްބަރުންގެ ތާއީދު ބޭނުންވާނެ އެވެ.
މެލޭޝިއާގެ ސިޔާސީ މަޝްރަހު ހަލަބޮލިވީ 60 އަހަރު ވެރިކަމުގައި އޮތް ކޯލިޝަންގެ ގިނަ މައްސަލަތަކެއް ފެންމަތިވުމަށް ފަހު، 2018 ގެ އިންތިހާބުން ބަލިވުމުންނެވެ. އެ އިންތިހާބަށް ފަހު ވެރިކަމަށް އައީ އިސްލާހީ ބަދަލު ހުށަހެޅި ކޯލިޝަނެކެވެ.
ނަމަވެސް އެ ސަރުކާރަށް ވެސް ޕާލިމެންޓުގެ ތާއީދު ނުލިބި، ޔާސީން ވެރިކަމަށް ވަޑައިގެންނެވީ މިދިޔަ އަހަރުގެ މާޗް މަހު އިންތިހާބަކާ ނުލަ އެވެ.
