ހޮޓަލެއްގެ ނަމުގައި ބުކިން ހައްދައިދީ, އޮޅުވާލައިގެން ރާއްޖެއަށް ޓޫރިސްޓުންތަކެއް ގެނެސް އެ މީހުން މަގުމަތިކުރުމަކީ ހިއުމަން ޓްރެފިކިންގެ އަމަލެއް ކަމަށް ވިދާޅުވެ ޓޫރިޒަމް މިނިސްޓަރު އަހްމަދު މައުސޫމް މިއަދު ކަންބޮޑުވުންފާޅުކުރައްވައިފި އެވެ.
ކޮވިޑުގެ ދަތި އުނދަގޫ ހާލަތަށް ފަހު ރާއްޖޭގެ ޓޫރިޒަމް ރަނގަޅުވެ، ގިނަ ޓޫރިސްޓުންތަކެއް ރާއްޖެ އަންނަމުންދާ އިރު މަކަރާއި އޮޅުވާލުމުގެ އަމަލުތަކެއް ދަނީ ހިންގަމުންނެވެ. މިފަދަ މައްސަލައެއް ރޭ މާލޭގައި ފެންމަތިވި އެވެ. ހޮޓަލެއް ކަމަށް ބުނުމުން ފައިސާ ދައްކައި މާލެ އައުމުން ވަންނާނެ ތަނެއް ނުދައްކައި ޓޫރިސްޓުންތަކެއް މަގުމަތިކުރީ އެވެ.
އެނގިފައިވާ ގޮތުގައި އެއީ ޕާކިސްތާނުގެ ބައެކެވެ.
އެ މީހުން އެޑްވާންސްކޮށް ފައިވް ސްޓާ ހޮޓަލަކަށް ފައިސާ ދައްކައި ކުދިން ގޮވައިގެން ރާއްޖެ އައުމުން ދެއްކީ ބަންކް ބެޑް ޖަހާފައި ހުރި ތަނެކެވެ. އެ މީހުން އެތަނުގައި ތިބެން ދެކޮޅު ހެދުމުން އަޅާނުލައި މަގުމަތީގައި ބޭއްތިއްބީ އެވެ.
އެ މީހުންނަށް އެހީވެ މައްސަލަ ޕޮލިހަށް ރިޕޯޓްކޮށްދިނީ އާއްމުންނެވެ. ހުޅުމާލެ ގެސްޓް ހައުސްތައް ހިންގާ މީހުން ވެސް އެހީތެރިކަން ފޯރުކޮށްދޭން އެ ސަރަހައްދަށް ދިޔަ އެވެ.
ގެސްޓް ހައުސްތަކުގެ ނަމުގައި ބުކިން ހައްދައިގެން ބައެއް ރަށްރަށަށް ދާ މީހުންނަށް ވެސް އެކި އުޒުރުތައް ދައްކައި މިފަދަ ކަންކަން ކުރިމަތިވެފައި އެބަހުއްޓެވެ.
މިފަދަ އަމަލުތަަކަކީ، ޓޫރިޒަމް މިނިސްޓަރު އަބްދުﷲ މައުސޫމް ހަނދާންކޮށްދެއްވި ގޮތުގައި ރާއްޖޭގެ ގާނޫނުގައި ވެސް ބޮޑެތި އަދަބުތައް ކަނޑައަޅާފައިވާ ހިއުމަން ޓްރެފިކިންގެ އަމަލެކެވެ.
މިނިސްޓަރު ވިދާޅުވީ ހުއްދަ ނެތި އެކި ތަންތަނުގައި ޓޫރިސްޓުން ބޭތިއްބުމަކީ ޓޫރިޒަމެއް ނޫން ކަމަށެވެ. އެއީ އިންސާނީ ވަގުފާރި ކަމަށް ވިދާޅުވި އެވެ.
އޭނާ ވިދާޅުވި ގޮތުގައި އެ މައްސަލަ ކަމާގުޅޭ އިދާރާތަކުން ބަލައި ފިޔަވަޅު އަޅާނެ ކަމަށް ވިދާޅުވުމަކީ ލިބިވަޑައިގަތް ހިތްހަމަޖެހުމެކެވެ.
ފުލުހުން ބުނިގޮތުގައި ޓޫރިސްޓުންތަކެއް ރާއްޖެ ގެނެސް މަގުމަތިކޮށްލި މައްސަލަ ބަލަމުން އަންނަނީ ކަމާބެހޭ އިދާރާތައް ގުޅިގެންނެވެ.
މާލޭގައި ރޭ މި މައްސަލަ ކުރިމަތިވި އިރު، ރާއްޖެއަށް އަންނަ ބިދޭސީން އެޗްޕީއޭގެ އުސޫލަށް ބެލުމެއް ނެތި ރަށްރަށުގެ ގެސްޓްހައުސްތަކާއި ގޭގައި ބައިތިއްބާ ކަމަށް ބުނެ ބައެއް ކައުންސިލްތަކުން އަންނަނީ ބަޔާން ނެރެމުންނެވެ. ކަރަންޓީން މުއްދަތު ފުރިހަމަ ކުރަން ޖެހޭ މީހުން ވެސް ރަށުތެރެއަށް ނުކުމެ އާއްމުންނަށް ނުރައްކާވާ ގޮތަށް އުޅުމަކީ ކަންބޮޑުވުމެއް ކަމަށް އެ ކައުންސިލްތަކުން ބުނެ އެވެ.
