ކުއަލަ ލަމްޕޫރް، މެލޭޝިއާ (އޯގަސްޓު 15) - ގިނަ ބަޔެއްގެ ނުރުހުން އަމާޒުވެފައިވާ މެލޭޝިއާގެ ބޮޑުވަޒީރު މުހްޔިއްދީން ޔާސީން ހޯމަ ދުވަހު ރަސްގެފާނަށް އިސްތިއުފާ ހުށަހަޅުއްވާނެ ކަމަށް މިނިސްޓަރަކު ވިދާޅުވެއްޖެ އެވެ.
ވެރިކަމުގައި 17 މަސް ހޭދަކުރައްވާފައިވާ ޔާސީންގެ ކޯލިޝަނަށް ޕާލިމެންޓް މެޖޯރިޓީ ވަނީ ގެއްލިފަ އެވެ. ކޮވިޑްގެ ބަލިމަޑުކަން ކޮންޓްރޯލް ކުރަން އެމަނިކުފާނުގެ ސަރުކާރުން އެޅި ފިޔަވަޅުތަކަށް ވަނީ ފާޑުކިޔުން އަމާޒުވެފަ އެވެ.
އިސްތިއުފާ އަށް ޕްރެޝަރު ބޮޑުވެފައި ވަނިކޮށް ޔާސީން މިދިޔަ ހުކުރު ދުވަހު ވެސް ވަނީ ވެރިކަމުގައި ހުންނެވުމަށް އިދިކޮޅު މެމްބަރުންނަށް ޑީލެއް ހުށަހަޅުއްވާފަ އެވެ. އިދާރަތަކަށް އިސްލާހީ ބަދަލު ގެންނަވާނެ ކަމަށް އެ މަނިކުފާނު ވިދާޅުވި ނަމަވެސް، އިދިކޮޅު މެމްބަރުން އެކަން ބަލައިގެންފައެއް ނުވެ އެވެ.
މިނިސްޓަރު މުހައްމަދު ރެދްޒުއާން ޔޫސުފް އޭއެފްޕީ އަށް ވިދާޅުވީ އާދީއްތަ ދުވަހު އޮތް ޕާޓީގެ ބައްދަލުވުމެއްގައި ބޮޑުވަޒީރުގެ މަގާމުން އިސްތިއުފާ ދެއްވަން ނިންމެވި ކަމަށް ޔާސީން އިއުލާން ކުރެއްވި އެވެ.
"އެމަނިކުފާނުގެ އެންމެ ފަހު ކެބިނެޓް ބައްދަލުވުން ހޯމަ ދުވަހު ބޭއްވުމަށް ފަހު، ރިޔާސީ ގަނޑުވަރަށް ވަޑައިގެން އިސްތިއުފާގެ ސިޓީ ހުށަހަޅުއްވާނެ،" ބޮޑު ވަޒީރުގެ ޑިޕާޓްމަންޓުގައި އުޅުއްވާ މިނިސްޓަރު ޔޫސުފް ވިދާޅުވި އެވެ.
"އެމަނިކުފާނު އެ މަގާމުގައި މަޑު ކުރައްވާތޯ އަޅުގަނޑުމެން މަސައްކަތް ކުރިން. ނަމަވެސް ވިދާޅުވީ ބޭނުންވާ މިންވަރަށް ޕާލިމެންޓު މެމްބަރުންގެ ތާއީދު ނެތް ކަމަށް".
ޕާޓީ ބައްދަލުވުމުގައި ޔާސީން ވިދާޅުވީ އިސްތިއުފާ ގަބޫލު ކުރެއްވުމާއި ނުކުރެއްވުން އޮންނާނީ ރަސްގެފާނުގެ އަތްޕުޅުގައި ކަމަށެވެ. މީގެ ކުރިން ރަސްގެފާނު ވަނީ ޔާސީންގެ ސަރުކާރަށް ފާޑުވިދާޅުވެފަ އެވެ.
ޔާސީން އިސްތިއުފާ ދެއްވައިފި ނަމަ އާ ސަރުކާރެއް އެކުލަވާލާނީ އިންތިހާބަކާ ނުލައި ކަމަށް އަޑުތައް ފެތުރިފައިވެ އެވެ. އެއީ އިންތިހާބެއް ބާއްވައިފި ނަމަ ކޮވިޑްގެ ހާލަތު ގޯސްވެދާނެތީ އެވެ.
އާ ބޮޑު ވަޒީރަކަށް ވަޑައިގަންނަވާނެ ބޭފުޅަކު ސާފު ނުވާއިރު، ސަރުކާރެއް ހިންގޭ ވަރުގެ ކޯލިޝަނެއް އުފެއްދުމަށް ޕާލިމެންޓު މެމްބަރުންގެ މެދުގައި ދުވަސްތަކެއް ވަންދެން ވާދަވެރިކަން އޮންނާނެ ކަމަށް ބެލެވެ އެވެ.
މެލޭޝިއާގެ ގާނޫނު އަސާސީގައިވާ ގޮތުގެ މަތިން ޕާލިމެންޓުގެ ތާއީދު އޮތް ކަމަށް ބެލެވޭ ބޭފުޅަކު ބޮޑުވަޒީރު ކަމަށް އިހްތިޔާރު ކުރެއްވުމުގެ ބާރު ރަސްގެފާނަށް ލިބިވަޑައިގަންނަވަ އެވެ.
ޔާސީން ބޮޑުވަޒީރުގެ މަގާމަށް ވަޑައިގެންނެވީ މިދިޔަ އަހަރުގެ މާޗް މަހު، އިންތިހާބަކާ ނުލަ އެވެ. އޭގެ ކުރިން އެ މަގާމުގައި ހުންނެވި މަހާތީރް މުހައްމަދުގެ ސަރުކާރަށް ވެސް ވަނީ އެދެވޭ ބަދަލުތައް ނުގެނެވި، މެޖޯރިޓީ ގެއްލިފަ އެވެ.
މުހްޔިއްދީންގެ ސަރުކާރުގެ ފުރަތަމަ ދުވަހުން ފެށިގެން ވެސް ޕާލިމެންޓުގެ ތާއީދު ކުޑަ އެވެ. އެ ސަރުކާރުގެ ގާނޫނީ ސައްހަކަމާ މެދު ޕާލިމެންޓު މެމްބަރުން ސުވާލު އުފެއްދި އިރު، އިދިކޮޅު ލީޑަރު އަންވަރު އިބްރާހީމްގެ ފަރާތުން ގިނަ ގޮންޖެހުންތައް ދިމާވި އެވެ.
ޔާސީންގެ ސަރުކާރަށް ތާއީދު ކުރި އެންމެ ބޮޑު ޕާޓީ، ޔުނައިޓެޑް މެލޭޒް ނެޝެނަލް އޯގަނައިޒޭޝަމް (އުމްނޯ) އަށް ނިސްބަތްވާ ޕާލިމެންޓު ބައެއް މެމްބަރުން، ބޮޑުވަޒީރަށް ކުރެއްވި ތާއީދު އަނބުރާ ގެންދެވުމުން އިސްތިއުފާ އަށް ޕްރެޝަރު ބޮޑު ވާން ފެށި އެވެ.
އިސްތިއުފާ ދެއްވަން ނިންމެވުމުގެ ކުރިން ޔާސީން މަސައްކަތް ކުރެއްވީ އިތުބާރު އޮތްތޯ ބެލުމުގެ ވޯޓެއް ސެޕްޓެމްބަރު މަހު ޕާލިމެންޓުގައި ބޭއްވުމަށެވެ. ބެލެވޭ ގޮތުގައި އިސްތިއުފާ ދޭން ނިންމެވީ އެ ވޯޓުން ކުރި ހޯދޭނެ ވަރަށް މެމްބަރުންގެ ތާއީދު ލިބިވަޑައިނުގެންނެވުމުންނެވެ.
