ސިންގަޕޫރު (އޯގަސްޓު 10) - ސިންގަޕޫރުގެ ނަރުދަމާ ފެން ޕްރޮސެސްކޮށް، އިންސާނުންނަށް ބޯން އެކަށޭނަ ސާފު ފެން އުފައްދަމުން އެބަދެ އެވެ.
ސިންގަޕޫރަކީ ގުދުރަތީ ވަސީލަތްތައް މަދު ކުޑަ ގައުމެކެވެ. ޒަމާންތަކެއް ވަންދެން ސިންގަޕޫރަށް ބޭނުންވާ ސަޕްލައި ހޯދަން ބަރޯސާ ވާން ޖެހިފައި ވަނީ ކައިރީގައި އޮންނަ މެލޭޝިއާ އަށެވެ.
އެހެންވެ އެހެން ގައުމުތަކަށް ބަރޯސާވުން ކުޑަ ކުރުމުގެ ގޮތުން ސަރުކާރުން ވަނީ ނަރުދަމާ ފެން ރީސައިލް ކުރެވޭނެ އެޑްވާންސް ސިސްޓަމެއް އުފައްދާފަ އެވެ. އެ ސިސްޓަމުގައި ހިމެނެނީ އެންމެ ފަހުގެ ޓެކްނޮލޮޖީ އެކުލެވޭ ޕްލާންޓުތަކާއި ބިމު އަޑީގައިވާ ޓަނަލް ނެޓްވޯކެވެ.
އެއާއެކު ރީސައިކް ކޮށްފައިވާ ނަރުދަމާ ފެނުގެ އެހީގައި ސިންގަޕޫރަށް ބޭނުންވާ ބޯ ފެނުގެ 40 ޕަސެންޓު މިހާރު ދަނީ އުފައްދަމުންނެވެ. އެ ގައުމުގެ ފެނާބެހޭ އޭޖެންސީން ބުނީ އާ ސިސްޓަމުގެ އެހީގައި 2060 ވަނަ އަހަރާ ހަމައަށް ދާއިރު، ގައުމަށް ބޭނުންވާ ފެނުގެ 55 ޕަސެންޓު އުފެއްދޭނެ ކަމަށެވެ.
ރީސައިކަލް ކުރާ ފެނުގެ ބޮޑު ބައި ބޭނުން ކުރަނީ ސިނާއީ ބޭނުންތަކަށެވެ. ނަމަވެސް 5.7 މިލިއަން މީހުން ދިރިއުޅޭ އެ ގައުމުގެ ބޯފެން ސަޕްލައިއަށް ވެސް އޭގެ ތެރެއިން ބައެއް ފޯރުކޮށްދެ އެވެ.
ފެން ފޯރުކޮށްދިނުމުގެ އިތުރުން ކަނޑު ތަގައްޔަރުވުމުގެ މައްސަލައަށް ވެސް އެ އާ ނިޒާމުގެ ސަބަބުން ވަނީ ހައްލު ލިބިފަ އެވެ. މިހާރު ސިންގަޕޫރުގައި ޓްރީޓު ކުރާ ނަރުދަމާ ފެނުގެ ތެރެއިން ކަނޑަށް ބޭރު ކުރަނީ މަދު މިންވަރެކެވެ.
މިއީ އެހެން ގައުމުތަކާ މުޅިން ތަފާތު ކަމެކެވެ. އދ. އިން އަންދާޒާ ކުރާ ގޮތުގައި ދުނިޔޭގައި އުފައްދާ ނަރުދަމާ ފެނުގެ 80 ޕަސެންޓު ކަނޑަށް ނުވަތަ އިކޯސިސްޓަމަށް ދޫކޮށްލަނީ ޓްރީޓު ނުކޮށް އަދި ރީސައިކަލް ނުކޮށެވެ.
"ސިންގަޕޫރުގެ ގުދުރަތީ ވަސީލަތްތައް މަދު، ބިން ވެސް މަދު. ފެން ލިބޭނެ އިތުރު ގޮތްތައް ފެނޭތޯ އަބަދު މަސައްކަތް ކުރަން ޖެހެނީ އެހެންވެ، އަޅުގަނޑުމެންގެ މައިގަނޑު ސްޓްރެޓެޖީ އަކީ ކޮންމެ ފެން ތިއްކެއް ވެސް ރައްކާކުރުމަށް ފަހު އަލުން ބޭނުން ކުރެވޭނެ އެންމެ ގިނަ ދުވަހެއް ވަންދެން ބޭނުން ކުރުން،" " ޕަބްލިކް ޔުޓިލިޓީޒް ބޯޑުގެ ވޯޓާ ރިކްލެމޭޝަން ޑިޕާޓްމަންޓުގެ ޗީފް އިންޖިނިއަރު ލޯ ޕެއި ޗިން އޭއެފްޕީއަށް ވިދާޅުވި އެވެ.
ފެނުގެ ސަޕްލައި ހުއްޓުމެއް ނެތި ލިބޭނެ ކަން ކަށަވަރު ކުރުމަށް ސިންގަޕޫރުން ގިނަ މަސައްކަތްތަކެއް ކުރެ އެވެ. އެގޮތުން ފެން އިމްޕޯޓުކޮށް، އަދި ލޮނުފެން ޑީސެލިނޭޓް ކުރެ އެވެ.
މި ރީސައިކްލިން މަސައްކަތުގައި އެންމެ ފާހަގަކުރެވެނީ ހައި ޓެކް ޗަންގީ ވޯޓާ ރިކްލެމޭޝަން ޕްލާންޓެވެ. އެ ތަން ހުންނަނީ ސިންގަޕޫރުގެ އިރުމަތީ އައްސޭރި ފަށުގަ އެވެ.
ބިމުގެ ދަތިކަން އޮންނާތީ ރީސައިކަލް ކުރާ ފެސިލިޓީގެ ބައެއް ބައިތައް ހުންނަނީ ބިމު އަޑީގަ އެވެ. އެގޮތުން ބިމު އަޑިއަށް 25 ފަންގިފިލާއަށް ވާ ތަންތަން ވެސް ހުރެ އެވެ. އެ ތަނަށް ނަރުދަމާ ފެން އަންނަނީ 48 ކިލޯމީޓަރު ދިގު ޓަނަލް އަކުންނެވެ.
އެތަނުގައި ސްޓީލް ހޮޅި އާއި، ޓިއުބާއި، ޓޭންކު އަދި ފިލްޓްރޭޝަން ނިޒާމު ފަދަ އެކި މެޝިން ހުރެ އެވެ. ދުވާލެއްގެ މައްޗަށް 900 މިލިއަން ލީޓަރުގެ ފެން ޓްރީޓު ކުރެވެ އެވެ.
އެ އިމާރާތުގައި ވެންޓިލޭޓަރު ނެޓްވޯކް ގާއިމްކޮށްފައި ހުންނަނީ ނުބައި ވަސް ބޭރު ކުރުމަށެވެ.
އެ ޕްލާންޓަށް އަންނަ ނަރުދަމާ ފެން ފިލްޓަރު ކުރުމަށް ފަހު ބާރުގަދަ ޕަމްޕުތަކެއްގެ އެހީގައި ބިމުގެ މަތީގައި ހުންނަ ފެސިލިޓީތަކަށް ފޮނުވަނީ އިތުރަށް ސާފު ކުރުމަށެވެ. ފެނުގައި ހުންނަ ބެކްޓީރިއާ އާއި ވައިރަސް ނައްތާލުމަށް ފަހު އަލްޓްރާ ވަޔަލެޓް ރޭގެ އެހީގައި ޑިސްއިންފެކްޓު ކުރެ އެވެ.
ފެން ޓްރީޓުކޮށް ނިމުމުން ކިޔާ ނަމަކީ "ނިއުވޯޓާ" އެވެ. މި ފެން އާއްމުކޮށް ބޭނުން ކުރަނީ މައިކްރޯޗިޕް އުފައްދާ ޕްލާންޓުތަކާއި އިމާރަތްތަކުގެ ކޫލިން ސިސްޓަމަށެވެ.
އޭގެ އިތުރުން ބޯ ފެނުގެ ސަޕްލައި އަށް ވެސް ބަޔެއް ލިބެ އެވެ. ފެނުގެ ދަތިކަން ދިމާވާން ފެށުމުން ނުވަތަ ވާރޭ ނުވެހޭ ދުވަސްވަރު އެ ފެން ފޮނުވަނީ އެކި ފެސިލިޓީތަކަށެވެ. އެ ތަންތަނުގައި އިތުރަށް ޓްރީޓް ކުރުމަށް ފަހު ގެތަކުގެ ފެން އިސްކުރަށް ދޫކުރެ އެވެ.
ސިންގަޕޫރުން އަދިވެސް މަސައްކަތް ކުރަނީ ފެން ރީސައިކަލް ކުރާ ނިޒާމް ބޮޑު ކުރުމަށެވެ.
އެގޮތުން ބިމު އަޑީގެ އިތުރު ޓަނެލް އަކާއި ބޮޑު ރިކްލެކްމޭޝަން ޕްލާންޓެއް ސިންގަޕޫރުގައި 2025 ގެ ކުރިން ގާއިމް ކުރާނެ އެވެ. އެ މަސައްކަތް ނިމޭއިރު ފެން ޓްރީޓް ކުރުމުގެ އިންފްރާސްޓްރަކްޗާއަށް 7.4 ބިލިއަން ޑޮލަރު ހޭދަވާނެ އެވެ.
