ޖެނީވާ، ސްވިޓްޒަލޭންޑް (އޯގަސްޓު 10) - ނުރައްކާތެރި އެބޭލޯ ވައިރަހާ ގުޅިފައިވާ މާބާގް ވައިރަސްގެ ކޭސްއެއް ފުރަތަމަ ފަހަރަށް ހުޅަނގު އެފްރިކާގެ ގައުމެއް ކަމަށްވާ ގިނީން ފެނިއްޖެ އެވެ.
ކޮވިޑް-19 ފަދައިން މާބާގް ވައިރަހަކީ ވެސް ޖަނަވާރުންގެ ގައިން އިންސާނުންގެ ހަށިގަނޑަށް އެތެރެވި އެއްޗެކެވެ. މިއީ ވާލުގެ ހަށިގަނޑުގައި އުޅޭ ވައިރަހަކަށް ވާއިރު، ބަލި ޖެހޭ މީހުންގެ 88 ޕަސެންޓު މަރުވެ އެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނީ ގިނީގެ ދެކުނު ގުއެކެޑޫ ޕްރީފެކްޗާގައި އޯގަސްޓު ދެ ވަނަ ދުވަހު މަރުވި މީހެއްގެ ހަށިގަނޑުން ނެގި ސާމްޕަމް މާބާގް ވައިރަހަށް ޕޮޒިޓިވްވެފައިވާ ކަމަށެވެ.
"މާބާގް ވައިރަސް ހަލުވިކަމާއެކު ބޮޑު ސަރަހައްދަކަށް ފެތުރުމުގެ ކުރިން ކޮންޓްރޯލް ކުރަން ޖެހޭނެ،" ޑަބްލިއުއެޗްއޯއިން އެފްރިކާއަށް ކަނޑައަޅާފައި ހުންނަ ޑިރެކްޓަރު ޑރ. މަޓްޝިޑީސޯ މޮއޭޓީ ވިދާޅުވި އެވެ.
މިދިޔަ އަހަރު ގިނީގައި އެބޯލާ ވެސް ފެތުރެނެވެ. އެ ފަހަރު 12 މީހަކު މަރުވިއިރު، އެބޯލާ ފެތުރުން ހުއްޓުނު ކަމަށް ޑަބްލިއުއެޗްއޯއިން ކަނޑައެޅީ މީގެ ދެ މަސް ކުރިންނެވެ. އެއީ ގިނީގައި އެބޯލާ ފެތުރުނު ދެ ވަނަ ފަހަރެވެ.
"އަޅުގަނޑުމެން މި ދަނީ ކަމާ ބެހޭ އިދާރާތަކާ އެކު އެބޯލާ ކޮންޓްރޯލް ކުރަން ކުރި މަސައްކަތް ފަދައިން ރޭވުންތެރިކަމާ އެކު މި ފަހަރު ވެސް މަސައްކަތް ކުރެވޭތޯ ބަލަމުން،" މާބާގް އާއި އެބޯލާ ވައިރަސް ފެތުރެނީ ދާދި އެއް ގޮތަކަށް ކަން ފާހަގަކުރައްވަމުން މޮއެޓީ ވިދާޅުވި އެވެ.
މާބާގް ވައިރަސް އާއްމު ގޮތެއްގައި ޖެހެނީ ވާލުގެ ބާވަތެއް ކަމަށްވާ ރޮސެޓަސް، ދިރިއުޅޭ ހޮހޮޅަތަކާއި މައިނުތަކަށް އެކްސްޕޯޒްވުމުންނެވެ. މި ވައިރަސް އިންސާނެއްގެ ހަށިގަނޑަށް ވަދެއްޖެ ނަމަ، އެހެން މީހުންނަށް ފެތުރެނީ ހަށިގަނޑުގައި ފްލުއިޑުންނެވެ. ނުވަތަ ބަލި ޖެހިފައިވާ މީހަކު އަތްލާ ތަންތަނުން ވެސް ވައިރަސް އެހެން މީހެއްގެ ގަޔަށް އެތެރެވެދާނެ އެވެ.
ޑަބްލިއުއެޗްއޯގެ 10 ތަޖުރިބާކާރުން މިހާރު ވެސް ތިބީ ގިނީގަ އެވެ. އޭގެ ތެރޭގައި އެޕިޑެމިއޮލޮޖިސްޓުންނާއި ސޯޝިއޯ އެންތްރޮޕޮލޮޖިސްޓުން ހިމެނެ އެވެ.
ބަލި ކޮންޓްރޯލް ކުރަން އަޅާ އަވަސް ފިޔަވަޅުތަކުގެ ތެރޭގައި ނުރައްކާ އޮތް މިންވަރު ދެނެގަތުމާއި، ބައްޔަށް ސްކްރީން ކުރުމާއި ކްލިނިކަލް ފަރުވާ ފޯރުކޮށްދިނުން ހިމެނެ އެވެ.
އޭގެ އިތުރުން އެހެން ގައުމަކަށް ބަލި އެތެރެވިޔަ ނުދިނުމަށް ގިނީގެ ބޯޑަރު ހުރަސްކޮށް ދަތުރު ކުރާ ފަރާތްތައް ބޮޑަށް މޮނީޓާ ކުރުމުގެ މަސައްކަތް ވެސް ވަނީ ހަރުދަނާކޮށްފަ އެވެ.
މީގެ ކުރިން މާބާގް ވައިރަސް ފެނިފައި ވަނީ ދެކުނު އެފްރިކާ، އެންގޯލާ، ކެންޔާ، ޔުގެންޑާ އަދި ޑިމޮކްރެޓިކް ރިޕަބްލިކް އޮފް ކޮންގޯ އިންނެވެ. ނަމަވެސް މިއީ ހުޅަނގު އެފްރިކާގެ ގައުމަކުން މި ވައިރަސް ފެނުނު ފުރަތަމަ ފަހަރެވެ.
ބަލީގެ އަލާމާތްތަކުގެ ތެރޭގައި ކުއްލިއަކަށް ގަދަޔަށް ހުން އައުމާއި، ގަދަޔަށް ބޮލުގައި ރިހުމާއި، ހަށިގަނޑަށް އުނދަގޫވުން ހިމެނެ އެވެ.
ޑަބްލިއުއެޗްއޯއިން ބުނީ ކުރިން ބަލި ފެތުރިފައިވާ ގޮތަށް ބަލާއިރު މީހުން މަރުވުމުގެ ރޭޓު އުޅެނީ 24 ޕަސެންޓުން ފެށިގެން 88 ޕަސެންޓާ ދެމެދުގައި ކަމަށެވެ. އެކަން ބިނާވަނީ ވައިރަހުގެ ސްޓްރެއިން އާއި މެނޭޖުކުރާ ގޮތެއްގެ މައްޗަށެވެ.
މި ބައްޔާ ދެކޮޅަށް އެއްވެސް ވެކްސިނެއް އަދި ފަރުވާއެއް ވެސް ހޯދިފައެއް ނުވެ އެވެ. ނަމަވެސް ހަށިގަނޑުގެ ހައިޑްރޭޝަން އިތުރުކޮށް، އަލާމާތްތަކަށް ހާއްސަ ފަރުވާ ދީގެން ހާލު ރަނގަޅުވެ، ދިރިހުރުމުގެ ފުރުސަތު އޮވެ އެވެ.
