މޮސްކޯ، ރަޝިއާ (އޯގަސްޓު 10) - ރަޝިއާގެ އުތުރު އޮސޭޓިއާގެ ވެރިރަށް ވްލެޑިކަވްކާޒްގެ ހޮސްޕިޓަލެއްގެ އޮކްސިޖަން ހޮޅިއެއް ފަޅައިގެން ގޮސް، ކޮވިޑް ބައްޔަށް ފަރުވާ ހޯދަމުން ދިޔަ ނުވަ މީހަކު މަރުވެއްޖެ އެވެ.
"ރިޕަބްލިކް ކްލިނިކަލް ހޮސްޕިޓަލް އޮފް ވްލެޑިކަވްކާޒްގައި ތިބި ކޮވިޑް ބަލީގެ ނުވަ މީހަކު މަރުވީ އޮކްސިޖަން ނުލިބުމުގެ ސަބަބުން،" ރަޝިއާގެ ނިއުސް އޭޖެންސީތަކުން ހެލްތު މިނިސްޓްރީއާ ހަވާލަދީ ބުންޏެވެ.
ވްލެޑިކަވްކާޒްގެ އެކްޓިން ހެޑް ސާގެއި މިންޔައިލޯ ވިދާޅުވީ އޮކްސިޖަން ސަޕްލައި އަށް ހުރަސް އެޅުނީ ހޮސްޕިޓަލުގެ އޮކްސިޖަން ޕައިޕެއް ފަޅައިގެން ދިޔުމުން ކަމަށެވެ.
ޓަސް ނިއުސް އެޖެންސީން ބުނީ ރަޝިއާގައި ބޮޑެތި ކުށްތައް ތަހުގީގު ކުރާ އިންވެސްޓިގޭޓިވް ކޮމިޓީން އެކަމާ ގުޅޭ ޖިނާއީ ތަހުގީގެއް ފަށާފައިވާ ކަމަށެވެ.
ހެލްތު މިނިސްޓްރީން ބުނީ އެ ހާދިސާ ހިނގިއިރު 71 ބަލި މީހުން ތިބީ އައިސީޔޫގައި ކަމަށާއި 13 މީހަކު އޮތީ ވެންޓިލޭޓަރުގައި ކަމަށެވެ. މަރުވި ނުވަ މީހުންނަކީ ވެސް ވެންޓިލޭޓަރުގައި އޮތް މީހުންނެވެ.
މިންޔައިލޯ ވިދާޅުވީ އޮކްސިޖެން ކެނޑުމުގެ ކުރިން ވެސް އެ ނުވަ މީހުންގެ ފުއްޕާމެޔަށް ވަނީ 90 ޕަސެންޓު ގެއްލުންވެފައި ކަމަށާއި އެހެންކަމުން މަރުވީ އެ ހާދިސާގެ ސަބަބުން ކަމަށް ބުނަން މާ އަވަސް ކަމަށެވެ.
އޭނާ ވިދާޅުވީ އޮކްސިޖެން ކެނޑިފައިވާ މައްސަލަ ފާހަގަވީ 30 މިނެޓު ފަހުން ކަމަށާއި އެއާއެކު ބަލި މީހުންނަށް އޮކްސިޖަން ސިލިންޑަރުގެ އެހީގައި އޮކްސިޖަން ފޯރުކޮށްދޭން ފެށި ކަމަށެވެ.
ކޮވިޑުގެ ބަލިމަޑުކަމުގައި ރަޝިއާގެ ހޮސްޕިޓަލުތަކުގައި ހިނގާ އެކި ހާދިސާތަކުގައި ބަލި މީހުން މީގެ ކުރިން ވެސް މަރުވެފައި ވެ އެވެ.
އެގޮތުން ރިޔަޒަން ސިޓީގެ ހޮސްޕިޓަލެއްގައި ހިނގި އަލިފާނުގެ ހާދިސާއެއްގައި މިދިޔަ ޖޫން މަހު ތިން މީހަކު މަރުވި އެވެ. އަލިފާން ރޯވީ ވެންޓިލޭޓަރެއްގައި މައްސަލަ ޖެހިގެން ކަމަށް ރިޕޯޓުތައް ބުންޏެވެ.
އޭގެ އިތުރުން މިދިޔަ އަހަރުގެ މޭ މަހު މޮސްކޯ އާއި ސެއިންޓް ޕީޓާޒްބާގްގެ ބައެއް ހޮސްޕިޓަލްތަކުގައި ވެސް އެގޮތަށް ރޯވެ ބައެއް މީހުން މަރުވި އެވެ.
އޭއެފްޕީގެ ތަފާސްހިސާބުން ދައްކާ ގޮތުގައި ކޮވިޑުގެ އަސަރު އެންމެ ބޮޑަށް ކޮށްފައިވާ ގައުމުތަކުގެ ތެރެއިން ހަތަރު ވަނަ އަށް އޮތޯ ރަޝިއާ އެވެ. އެ ގައުމުން ޖުމްލަ 6.5 މިލިއަން ކޭސް ފެނިފައި ވެ އެވެ.
