މި އަހަރުގެ ސާފް ޗެމްޕިއަންޝިޕް ބޭއްވުމުގެ ފުރުސަތު ރާއްޖެ އަށް ދޭން ސައުތު އޭޝިއާގެ ފުޓްބޯޅަ ފެޑެރޭޝަނުން ނިންމައިިފި އެވެ.
މިއަދު ކުރިއަށް ދިޔަ ސާފްގެ މެމްބަރު ގައުމުތަކުގެ ބައްދަލުވުމުގައިވަނީ ރާއްޖެ އަށް މުބާރާތް ހޯސްޓްކުރުމުގެ ފުރުސަތު ދޭން ނިންމައިފަ އެވެ. މިއީ ރާއްޖޭން ސަރަހައްދުގެ ފުޓްބޯޅަ މުބާރާތް ހޯސްޓްކުރާނެ ދެ ވަަނަ ފަހަރެވެ. މި އަހަރުގެ މުބާރާތް ކުރިއަށްދާނީ އޮކްޓޫބަރު 1-15 އަށެވެ.
ރާއްޖޭން އެންމެ ފުރަަތަމަ ސާފް ޗެމްޕިއަންޝިޕް ހޯސްޓްކުރީ 2008 ވަނަ އަހަރު ސްރީލަންކާއާ ގުޅިގެންނެވެ. މި ފަހަރު ވެސް ސާފް ބާއްވަން އެންމެ ފުރަތަމަ ރާއްޖޭން ބިޑް ކުރަން މަޝްވަރާކުރީ ލަންކާއާ ގުޅިގެންނެވެ. އެކަމަކު، ފަހުން ނިންމީ ރާއްޖޭން އެކަނި ސާފް ބޭއްވުމަށެވެ.
މި ފަހަރުގެ ސާފް ޗެމްޕިއަންޝިޕަކީ އެންމެ ފުރަތަމަ މިދިޔަ އަހަރު ބަންގްލަދޭޝްގައި ބާއްވަން ނިންމި މުބާރާތެކެވެ. އެކަމަކު މި އަހަރަށް ފަސްކުރަން ޖެހުނީ މިދިޔަ އަހަރު ކޮވިޑް-19ގެ ހާލަތު ވަރަށް ބޮޑަށް ގޯސްވުމުންނެވެ. ގިނަ މަސައްކަތްތަކެއް ކޮށްގެން ވެސް މި އަހަރު ބަންގްލަދޭޝްގައި މުބާރާތް ހޯސްޓްކުރަން ކުރި މަސައްކަތް ކާމިޔާބުވާ ގޮތެއްނުވި އެވެ. އެހެންވެ، ޖެހުނީ މުބާރާތް ބާއްވާނެ ގައުމެއް ކަނޑައަޅަން ބިޑަށް ހުޅުވާލާށެވެ.
ސާފް ހޯސްޓްކުރަން މި ފަހަރު އެންމެ ފުރަތަމަ ޝައުގުވެރިކަން ފާޅުކުރީ ރާއްޖެ އާއި ނޭޕާލް އަދި އިންޑިއާ އިންނެވެ. އެކަމަކު، ރަސްމީކޮށް ބިޑްކުރީ ރާއްޖެ އާއި ނޭޕާލުންނެވެ. ނޭޕާލް ފުޓްބޯޅަ ފެޑެރޭޝަނުން ބުނީ ރާއްޖޭގައި ސާފް ބޭއްވުމުގެ ފުރުސަތު ދޭން ނިންމީ ނޭޕާލަށް ވުރެ ރާއްޖޭގައި ކޮވިޑް-19ގެ ހާލަތު ރަނގަޅުވުމުން ކަމަށެވެ.
މިއީ މިދިޔަ ދެ އަހަރެއްހާ ދުވަސް ތެރޭ އެފްއޭއެމުން ބައިނަލްއަގުވާމީ ފުޓްބޯޅަ މުބާރާތެއްގެ މެޗުތައް ހޯސްޓްކުރުމުގެ ބިޑް ކާމިޔާބުކުރި ހަތަރު ވަނަ ފަހަރެވެ. އޭއެފްސީ ކަޕްގެ ދެކުނު އޭޝިއާގެ ގްރޫޕްގެ މެޗުތައް ހޯސްޓްކުރުމުގެ ބިޑް ތިން ފަހަރެއްގެ މަތިން ކާމިޔާބުކުރި އެވެ. އަދި މި ފަހަރު ސާފް ޗެމްޕިއަންޝިޕްގެ ބިޑް ވެސް މި ވަނީ ކާމިޔާބުކޮށްފަ އެވެ. އޭއެފްސީ ކަޕްގެ ދެކުނު އޭޝިއާގެ ގްރޫޕްގެ މެޗުތައް މި މަހު މާލޭގައި ކުރިއަށްގެންދާނެ އެވެ.
އެންމެ ފަހުން ސާފް ޗެމްޕިއަންޝިޕް ބޭއްވީ 2018 ވަނަ އަހަރު ބަންގްލަދޭޝްގެ ޑާކާގަ އެވެ. އެ ފަހަރުގެ މުބާރާތުގެ ފައިނަލުގައި އިންޑިއާ ބަލިކޮށް ރާއްޖޭން ވަނީ ދެ ވަނަ ފަހަރަށް ސަރަހައްދުގެ ޗެމްޕިއަންކަން ހޯދައިފަ އެވެ.
މި ފަހަރުގެ ސާފް ޗެމްޕިއަންޝިޕްގައި ޔަގީނުން ވެސް ޕާކިސްތާނަށް ނުކުޅެވޭނެ އެވެ. އެއީ އެ ގައުމު މި ވަގުތު އޮތީ ފީފާގެ ސަސްޕެންޝަނެއްގައި ކަމަށްވާތީ އެވެ. ބޫޓާނުން މީގެ ކުރިން މުބާރާތުގައި ނުކުޅެވޭނެކަމަށް އަންގާފައިވީ ނަމަވެސް މުބާރާތް ރާއްޖޭގައި ހޯސްޓްކުރާނަަމަ ބޫޓާން ވެސް ކުޅުމުގެ ފުރުސަތު ބޮޑެެވެ. އެއީ މިދިޔަ އޭޕްރީލް މަހު ބޫޓާންގެ ތިމްޕޫ ސިޓީ، މާލެ އައިސް އޭއެފްސީ ކަޕްގެ ކޮލިފައިން މެޗެއްގައި އީގަލްސްއާ ދެކޮޅަށް ކުޅެފައިވާތީ އެވެ.
ފަސް ގައުމު ކުޅޭނަމަ ސާފްގެ ވިސްނުމަކީ މި ފަހަރުގެ މުބާރާތް ލީގު އުސޫލުން ކުޅުމެވެ. އެކަމަކު، ބޫޓާން ކުޅޭނަމަ މި ފަަހަރުގެ ސާފްގެ މެޗުތައް ކުރިއަށްދާނީ ހަ ގައުމުގެ މެދުގައި ދެ ގްރޫޕަށް ބަހާލައިގެންނެވެ. އެއީ ރާއްޖެ، އިންޑިއާ، ނޭޕާލް، ބަންގްލަދޭޝް، ސްރީ ލަންކާ އަދި ބޫޓާންގެ މެދުގަ އެވެ.
ސާފް ޗެމްޕިއަންޝިޕް އެންމެ ފަހުން ދެ ފަހަރު (އިންޑިއާ އާއި ބަންގްލަދޭޝްގައި) ބޭއްވިއިރު، މުބާރާތުގެ ސްޕޮންސަރަކަށް ހަމަޖައްސާފައިވަނީ ސުޒުކީ އެވެ. އެހެންވެ، މުބާރާތަށް ނަން ދެވިފައި އޮތީ ވެސް ސާފް ސުުޒުކީގެ ނަމުންނެވެ.
އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) މީގެ ކުރިން "އަދަދު" އަށް ދެއްވި އިންޓަވިއުއެއްގައި ވިދާޅުވީ ސާފް އަށް ލޯކަލް އަދި އިންޓަނޭޝަނަލް ވަރަށް ގިނަ ސްޕޮންސަރުން ޝައުގުވެރިކަން ފާޅުކޮށްފައިވާ ކަމަށާއި އެކަން ކަމަށް މަސައްކަތް ފެށޭނީ ބިޑް ކާމިޔާބު ކުރެވޭ ހިސާބުން ކަމަށެވެ.
ރާއްޖޭން އެންމެ ފުރަތަަމަ ސާފް ޗެމްޕިއަންކަން 2008 ވަަނަ އަހަރު ހޯދިއިރު، މެޗުތައް ބަލަން ދަނޑަށް ވަންނަން ސަޕޯޓަރުންގެ މެދުގައި ޓިކެޓްގެ ޑިމާންޑް ވަރަށް ބޮޑަށް އުފުލުނެވެ. އެކަމަކު، މި ފަހަރު ރާއްޖޭން މުބާރާތް ހޯސްޓްކުރާއިރު، ކޮވިޑް-19ގެ ސަބަބުން ގިނަ އަދަދެއްގެ ސަޕޯޓަރުން ނުވެއްދޭނެ އެވެ. އަނެއް ކޮޅުން ބާވެ، މަރާމާތުކުރަން ޖެހިފައިވާތީ ރައްކާތެރިކަމުގެ ފިޔަވަޅެއްގެ ގޮތުން ގަލޮޅު ދަނޑުގެ ދެ ފަޅިއެއްގެ ސިޑިބަރި އޮތީ ބަންދުކޮށްފަ އެވެ. އެހެންވެ، އެންމެ ފަހުން ބޭއްވި ވޯލްޑް ކަޕް ކޮލިފައިން މެޗުތަކުގައި ވެސް ގިނަ ސަޕޯޓަރުންނަށް ދަނޑަށް ނުވަދެވުނެވެ.
