ލޯކަލް ކައުންސިލްތަކަށް ސެކްރެޓަރީ ޖެނެރަލް (އެސްޖީ)ން އަންނަ މަހު އައްޔަންކުރަން ފަށާނެ ކަމަށް ސިވިލް ސާވިސް ކޮމިޝަނުން (ސީއެސްސީ) އިން މިއަދު ބުނެފި އެވެ.
އެ ކޮމިޝަނުން ކުރިން މަސައްކަތް ކުރަމުން އައީ މި މަހުގެ ތެރޭގައި އައްޔަންކުރާށެވެ. އެކަމަކު އެކި ސަބަބުތަކާ ހުރެ އެކަން ލަސްވީ ކަމަށް ސީއެސްސީން ބުންޏެވެ.
ކައުންސިލްގެ ސެކްރެޓަރީ ޖެނެރަލްއަކީ އެ ކައުންސިލެއްގެ އެންމެ އިސް އިދާރީ މުވައްޒަފެވެ. ލާމަރުކަޒީ ގާނޫނު މިހާރު އޮންނަ ގޮތުން އެ މަގާމަށް މީހުން އައްޔަނުކުރަނީ އެ ކައުންސިލެއްގެ ލަފާގެ މަތިން، ސިވިލް ސާވިސް ކޮމިޝަން (ސީއެސްސީ)އިންނެވެ.
ހުރިހާ ކައުންސިލަކަށް ސެކްރެޓަރީ ޖެނެރަލްގެ މަގާމަށް ފުރުސަތު ހުޅުވާލުމުން 511 މީހަކު ވަނީ ކުރިމަތިލައިފަ އެވެ. އެއީ ރަށު ކައުންސިލްތަކަށް ކުރިމަތިލި 371 މީހަކާއި އަތޮޅު ކައުންސިލްތަކަށް ކުރިމަތިލި 86 މީހެއްގެ އިތުރުން ސިޓީ ކައުންސިލްތަކަށް ކުރިމަތިލި 54 މީހެކެވެ.
ކައުންސިލްތަކުގެ އެސްޖީންގެ މަގާމަށް ކުރިމަތިލާފައިވާ މީހުންނަށް އިމްތިހާނު ދެނީ: އަންނަ މަހު އެސްޖީން އައްޔަން ކުރަން ފެށޭނެ ކަމަށް ސީއެސްސީން ބުނޭ-- ފޮޓޯ: ސީއެސްސީ
ސީއެސްސީން އިއްޔެ ވަނީ އެސްޖީންގެ މަގާމަށް ޝޯޓް ލިސްޓް ކޮށްފައިވާ މީހުންނަށް އިމްތިހާން ބާއްވައިފަ އެވެ. މި އިމްތިހާނުގައި ރާއްޖޭގެ އެކި ކަންކޮޅުތަކުން 272 މީހަކު ބައިވެރިވެފައިވެ އެވެ.
ސީއެސްސީގެ ޑިރެކްޓާ ޖެނެރަލް އަބްދުﷲ ސައީދު، "އަދަދު" އަށް ވިދާޅުވީ އެސްޖީން އައްޔަން ކުރުމުގެ ގޮތުން ގިނަ ކަންތައްތަކެއް ހަމަޖައްސަން ޖެހޭ ކަމަށެވެ. އެގޮތުން އިންޓަވިއު ކުރުމާއި ޕްރެޒެންޓޭޝަން ހުށަހެޅުމުގެ އިތުރުން އިވެލުއޭޝަނަށް ފަހު ލިބޭ މާކްސް އާއްމުކޮށް ޝަކުވާއެއް އޮތްނަމަ ހުށަހެޅުމުގެ ފުރުސަތު ވެސް ދޭން ޖެހޭ ކަމަށް އޭނާ ވިދާޅުވި އެވެ.
އެއަށް ފަހު ސީއެސްސީން ނަންތަކެއް ފާސްކޮށް އެ ކައުންސިލަކުން ދެކޭ ގޮތެއް ބެލުމަށް ފޮނުވަން ޖެހެ އެވެ.
"އަދިވެސް ވަގުތު ނަގާނެ ކަންކަން އެބަހުރި މީގެ ތެރޭގައި. އެކަމަކު އަޅުގަނޑުމެން މި ބަލަނީ އަންނަ މަހުގެ ތެރޭގައި އައްޔަން ކުރަން ފެށޭނެ ކަމަށް،" ސައީދު ވިދާޅުވި އެވެ.
ބައެއް ކައުންސިލްތަކުގެ އެސްޖީންގެ މަގާމަށް ކުރިމަތި ނުލާވާތީ އެ މަގާމުތަކަށް އަލުން ހުޅުވާލާނެ ކަމަށް ވެސް ސައީދު ވިދާޅުވި އެވެ.
ރަށު ކައުންސިލްގެ ސެކްރެޓަރީ ޖެނެރަލަކަށް މުސާރައިގެ ގޮތުގައި މަހަކު 18،170 ރުފިޔާ ލިބެ އެވެ. އަތޮޅު ކައުންސިލްގެ ސެކްރެޓަރީ ޖެނެރަލްގެ މުސާރައަކީ 21،000 ރުފިޔާ އެވެ. ސިޓީ ކައުންސިލްގެ ސެކްރެޓަރީ ޖެނެރަލަކަށް މަހަކު 35،500 ރުފިޔާ ލިބޭނެ އެވެ.
ކައުންސިލްތަކަށް ސެކްރެޓަރީ ޖެނެރަލުން އައްޔަން ކުރަނީ ފަސް އަހަރުގެ މުއްދަތަށެވެ.
