ދުނިޔޭގައި މިހާތަނަށް ވިހެއި "އެންމެ ތުއްތު" ކުއްޖާގެ ގޮތުގައި ބެލެވިފައިވާ ކްވެކް ޔޫ ޒުއާން އަށް ސިންގަޕޫރުގެ ހޮސްޕިޓަލެއްގައި 13 މަސް ވަންދެން ފަރުވާ ކުރުމަށް ފަހު ގެޔަށް ދޫކޮށްލައިފި އެވެ.
ޔޫ ޒުއާން ވިހެއި އިރު ބަރުދަނަކީ އެންމެ 212 ގްރާމެވެ. އެއީ ކުޑަ އާފަލެއްގެ ބަރުދަނެވެ. އޭރު އޭނާގެ ދިގު މިނަކީ 24 ސެންޓިމީޓަރެވެ. ޔޫ ޒުއާން ވިހާފައި ވަނީ އޭނާގެ މަންމަގެ ބަނޑަށް 25 ހަފްތާ ވާން ގާތްވެފައި ވަނިކޮށެވެ.
މީގެ ކުރިން ވިހެއި އިރު "އެންމެ ތުއްތު" ކުއްޖާގެ ރިކޯޑު އޮތީ 245 ގްރާމާ އެކު އެމެރިކާގައި 2018 ވަނަ އަހަރު އުފަންވި އަންހެން ކުއްޖެކެވެ.
ޔޫ ޒުއާންގެ މަންމަ ވިއްސަން ޖެހުނީ އެމެޖެންސީގައި ސިޒޭރިއަން ހަދައިގެންނެވެ. ވިހަން ތާވަލު ކުރި ދުވަހަށް ވުރެ ހަތަރު މަސް ކުރިން ވިއްސަން ޖެހުނީ މަންމަ އާއި ދަރިފުޅަށް ނުރައްކާތެރި ހާލަތެއް ކަމަށްވާ "ޕްރީ އެކްލޭމްޕިސާ" ހުރިކަން އެނގުމުންނެވެ.
މާބަނޑުއިރު ދިމާވާ "ޕްރީ އެކްލޭމްޕްސިއާ" ގައި މަންމަގެ ލޭގެ ޕްރެޝަރު އާދަޔާ ހިލާފަށް މައްޗަށް ގޮސް، މުހިއްމު ގުނަވަންތަކަށް ގެއްލުން ލިބުމުގެ ފުރުސަތު އޮވެ އެވެ.
ސިންގަޕޫރުގެ ނޭޝަނަލް ޔުނިވާސިޓީ ހޮސްޕިޓަލުން ދޫކޮށްލިއިރު، ޔޫ ޒުއާންގެ ބަރުދަނުގައި 6.3 ކިލޯ އެބަ ހުއްޓެވެ. އޭނާއަށް ފަރުވާ ދޭން ފެށިއިރު ހޮސްޕިޓަލުން ބުނީ "ދިރިހުރުމުގެ ފުރުސަތު ކުޑަ" ކަމަށެވެ.
"ވިހެއި އިރު އެކި ސިއްހީ މައްސަލަތައް ދިމާވި ނަމަވެސް، ޔޫ ޒުއާން މި ވަނީ އޭނާ ވަށައިގެންވާ މީހުންނަށް ނަމޫނާއެއްގެ ގޮތުގައި ހިތްވަރާ އެކު ބޮޑުވެ، އާދަޔާ ހިލާފު ކޮވިޑް-19 "ބޭބީއެއްގެ" ލަގަބު ހޯދާފައި،" ހޮސްޕިޓަލުގެ ބަޔާނުގައި ބުންޏެވެ.
ޔޫ ޒުއާން.-- ފޮޓޯ: ކްވެކް އާއިލާ
ޔޫ ޒުއާން އަށް ތަފާތު އެކި ފަރުވާތައް ކުރިއިރު، އޭނާގެ ހަށިގަނޑުގެ އެކި ގުނަވަންތައް ރަނގަޅަށް އުފެދެން ދެން އެކި މެޝިން ބޭނުން ކުރި އެވެ. ޑޮކްޓަރުން ބުނީ ފަރުވާތަކަށް ފަހު ހާލު މިހާރު ރަނގަޅު ކަމަށާއި ގެޔަށް ދޫކޮށްލަން ނިންމީ އެހެންވެ ކަމަށެވެ.
ޔޫ ޒުއާންގެ ފުއްޕާމޭގެ ބައްޔެއް އަދިވެސް ހުރިއިރު، ނޭވާ ލުމަށް އެހީ ބޭނުންވާނެ އެވެ. ނަމަވެސް އެންޔޫއެޗްގެ ޑޮކްޓަރުން ބުނީ ދުވަސް ވާ ވަރަކަށް އެކަން ވެސް ރަނގަޅުވަމުން ދާނެ ކަމަށެވެ.
ޔޫ ޒުއާންގެ މަންމަ ވޮންގް މެއި ލިންގް ބުނީ ދަރިފުޅު ވިހަން ޖެހުނު ގޮތާއި ވިހެއި އިރު ތުއްތު ކަމުން ބޮޑު ޝޮކެއް ލިބުނު ކަމަށެވެ. އޭނާގެ ފުރަތަމަ ދަރިފުޅަށް މިހާރު ހަތަރު އަހަރު ފުރިފައި ވާއިރު، އެ ކުއްޖާ ވިހެއީ 40 ހަފްތާ ހަމަކުރުމަށް ފަހު އެވެ.
ޔޫ ޒުއާންގެ ހޮސްޕިޓަލްގެ ބިލްތަކަށް ފައިސާ ހަމަޖެއްސީ ކްރައުޑް ފަންޑިން ކެމްޕޭނެއްގެ ދަށުން ހޯދި 270،601 ޑޮލަރުންނެވެ.
